ጋልባ ሀርግያፐ ፓጽያ አሳይ ጌይያ ዎጋ
1 መና ጎዳይ ሙሴዉ ሀዋዳን ያጊደ ኦዴዳ፤ 2 "ዎልቃማ ጋልባ ሀርጊ ኦይቄዳ ብታኒ ጌይያ ጋላስ ኦናዉ ኮሽያ ዎጋይ ሀዋ። ሄ ብታንያ ቄስያኮ አፋናዉ ኮሼ።14:2 ማቶሳ 8:4፤ ማር. 1:44፤ ሉቃሳ 5:14፤ 17:14 3 ቄሲ አሳይ ዱንካኔዳ ሳኣፐ ጋጻ ከሲደ፥ አ ሀርግያ በኦ። ሄ ዎደ ዎልቃማ ጋልባ ሀርጊ ብታንያ ቦላፐ ዬዳዋ ግዶፐ፥ 4 ቄሲ ፓጻ ደእያ ላኡ ጌሻ ካፎቱዋ፥ ጽድያ ም፥ ዞኦ ቃጭናነ ህሶጵያ ቦንጭያ ሄ ዎልቃማ ጋልባ ሀርግያፐ ጌይያ ብታንያ ድራዉ አሀናዳን ኡንቱንታ አዛዞ። 5 ሄዋፐ ጉይያን፥ ቃይ ቄሲ ላኡ ካፎቱዋፐ እቱዋ ከርያን ደእያ ፑልቶ ሃ ቦላ ሹካናዳን አዛዞ። 6 ፓጻ ደእያ ካፉዋ፥ ቃይ ዝጋና፥ ዞኦ ቃጭናናነ ህሶጵያ ቦንጭያና አክ አፊደ፥ ከርያን ደእያ ፑልትያ ሃ ቦላ ሹኬዳ ካፉዋ ሱ ግዶ ናቆ። 7 ከሴዳ ሱ ሄ ዎልቃማ ጋልባ ሀርግያፐ ፓጽያ ብታንያ ቦላ ላፑ ገደ ጫጫፎ፤ ያቲደ ሄ ብታኒ ጌሻ ግድያዋ ኤርሶ፤ ፓጻ ደእያ ካፉዋ ገደ ደምባ የዶ።
8 "ሄ ሀርግያፐ ጌዬዳ ብታኒ ባረ ማዩዋ ሜጮ፤ ባረ ቦላን ደእያ እስክያ ኡባ ሜደቶ፤ ባረ ቦላካ ሜጨቶ፤ ያቶፐ እ ጌሻ ግዳናዋ። ሄዋፐ ጉይያን፥ እ ዱንካኔዳ ሳኣ ዮ፤ ሽን ግዶፐነ ባረ ዱንካንያ ገለናን ላፑን ጋላሳ ካረና ጋምኦ። 9 ላፑን ጋላሳን ባረ ሁጲያ፥ ቡቻ፥ ጎማነ ባረ ቦላን ደእያ ሀራ እስክያ ኡባ ሜደቶ፤ ቃይ ባረ ማዩዋ ሜጮ፤ ባረ ቦላካ ሜጨቶ፤ ሄዋፐ ጉይያን፥ እ ጌሻ ግዳናዋ።
10 "ሆስፑን ጋላሳን ትላ ቦላና ደእያ ላኡ ዶርሳ ማራቱዋነ እት ላይ ግዴዳ እት ዶርሳቶ አሆ፤ ቃይ ካ ያርሾ ዛይትያን ሙናቀቴዳ ኡሱፑን ኪሎ ግራመ ልያነ እት ሊትሮ ዎጋራ ዛይትያዉ ሄዘን ኩሽያ አሆ። 11 አ ጌሽያ ቄሲ ብታንያ እ አሄዳዋንቱና እትፐካ መና ጎዳ ዱንካንያ ፐንገ መና ጎዳ ስን ሺሾ።
12 "ቄሲካ ላኡ ዶርሳ ማራቱዋፐ እቱዋ አኪደ፥ ሊትሮ ሄዘን ኩሽያ ዛይትያና እትፐ ናቁዋ ያርሹዋ ኦደ ሺሾ፤ ሄ ሺሼዳዋ ቃይ ቃያ ያርሹዋ ኦደ መና ጎዳ ስንን ቃ። 13 ያቲደ እ ሄ ዶርሳ ማራ ናጋራ ያርሹዋነ ጹግያ ያርሹዋ ሹክያ ጌሻ ሳኣን ሹኮ፤ ናጋራ ያርሹዋዳን ናቁዋ ያርሹካ ቄስያዉ እመቴ፤ እካ ሎይ ጌሻ። 14 ቄሲ ናቁዋ ያርሹዋ ሱፐ ጉ አኪደ፥ ሄ ጌይያ ብታንያዉ ኡሸቻ ባጋ ሀይ ጼራ፥ ኡሸቻ ኩሽያዉ ዎጋ ብራያነ ኡሸቻ ገድያዉ ዎጋ ብራያ ኦኮ። 15 ሄዋፐ ጉይያን፥ ቄሲ ዎጋራ ዛይትያፐ ጉ አኪደ፥ ባረ ሀድርሳ ኩሽያ ጎምፓን ትጎ።
16 "ሄ ሀድርሳ ኩሽያ ጎምፓን ደእያ ዎጋራ ዛይትያን ባረ ኡሸቻ ኩሽያ ብራያ ናቂደ፥ መና ጎዳ ስንን ላፑ ገደ ጫጫፎ። 17 ያት ስሚደ ባረ ኩሽያ ጎምፓን አቴዳ ዛይትያፐ አኪደ፥ ጌይያ ብታንያዉ ኡሸቻ ሀይ ጼራ፥ ኡሸቻ ኩሽያዉ ዎጋ ብራያነ ኡሸቻ ገድያዉ ዎጋ ብራያ ካሰ ናቁዋ ያርሹዋ ሱ ኦከቴዳ ሳኣን ኦኮ። 18 ቃይ ባረ ኩሽያ ጎምፓን አቴዳ ዛይትያ ቄሲ ጌይያ ብታንያ ሁጲያን ጉሶ፤ ያቲደ መና ጎዳ ስንን ሄ ብታንያ ናጋራ አቶ ጊሶ።
19 "ሄዋፐ ጉይያን ቄሲ ባረ ቱናተፐ ጌይያ ብታንያ ናጋራ አቶ ጊሳናዉ ናጋራ ያርሾ ሺሼዳ መህያ ሹኬ፤ ሄዋፐ ስሚደ ቃይ ጹግያ ያርሾ ሺሼዳ መህያ ያርሼ። 20 ቃይ ቄሲ ሄ ጹግያ ያርሹዋ ካ ያርሹዋና እትፐ ያርሽያ ሳኣ ቦላን ዎደ ጹጌ፤ ያቲደ ብታንያ ናጋራ አቶ ጊሴ፤ ብታኒካ ጌሻ ግዴ።
21 "ሽን ብታኒ ሄዋ ኡባ አሀናዉ ዳንዳየና ማንቆ ግዶፐ፥ ጾሳ ስንን ቃደ አ ናጋራ አቶ ጊሳናዉ፥ ባረ ናቁዋ ያርሾ እት ዶርሳ ማራ አሆ። ቃይ ካ ያርሾካ ዎጋራ ዛይትያን ሙናቀቴዳ ላኡ ኪሎ ግራመ ሎኦ ልያነ እት ሊትሮ ሄዘን ኩሽያ ዛይትያ እትፐ አሆ። 22 ቃይካ ባረዉ ዳንዳዬዳዋዳን ላኡ ማራ ሀራጰቱዋ ዎይ ላኡ ማራ ዶጎማቱዋ፥ እቱዋ ናጋራ ያርሾ፥ እቱዋ ቃይ ጹግያ ያርሾ አሆ።
23 "ሆስፑን ጋላሳን ባረ ናጋራፐ ጌያናዉ ብታኒ ሀዋንታ ቄስያኮ መና ጎዳ ዱንካንያ ፐንገ መና ጎዳ ስን አሆ። 24 ቄሲ ናቁዋ ያርሾ አሄዳ ዶርሳ ማራነ ልትሮ ሄዘን ኩሸ ዛይትያ አኪደ፥ ቃያ ያርሹዋ ኦደ መና ጎዳ ስንን ቃ። 25 ያቲደ ናቁዋ ያርሾ አሄዳ ዶርሳ ማራ ሹኪደ ሄ ናቁዋ ያርሹዋ ሱፐ ጉ አኪደ፥ ሀ ጌይያ ብታንያዉ ኡሸቻ ሀይ ጼራ፥ ኡሸቻ ኩሽያዉ ዎጋ ብራያነ ኡሸቻ ገድያዉ ዎጋ ብራያ ኦኮ። 26 ቃይ ቄሲ ዛይትያፐ ጉ ባረ ሀድርሳ ኩሽያ ጎምፓን ትጎ። 27 ሄ ሀድርሳ ኩሽያ ጎምፓን ደእያ ዛይትያፐ ኡሸቻ ኩሽያ ጼራን ጉ አኪደ፥ መና ጎዳ ስንን ላፑ ገደ ጫጫፎ። 28 ቃይካ ቄሲ ባረ ኩሽያ ጎምፓን ደእያ ዛይትያፐ ጉ አኪደ፥ ጌይያ ብታንያዉ ኡሸቻ ሀይ ጼራ፥ ኡሸቻ ኩሽያዉ ዎጋ ብራያነ ኡሸቻ ገድያዉ ዎጋ ብራያ ካሰ ናቁዋ ያርሹዋ ሱ ኦከቴዳ ሳኣን ኦኮ። 29 ቃይ መና ጎዳ ስንን ብታንያ ናጋራ አቶ ጊሳናዉ፥ ቄሲ ባረ ኩሽያን አቴዳ ዛይትያ ጌይያ ብታንያ ሁጲያን ኦኮ። 30 ሄዋፐ ጉይያን፥ ሄ አዉ ባረዉ ዳንዳዬዳዋዳን ሀራጵያ ማራ ግድና ዎይ ማራ ዶጎሙዋ ግድና፥ 31 እቱዋ ናጋራ ያርሾ ላኤንዋ ቃይ ጹግያ ያርሾ ካ ያርሹዋና እትፐ ያርሾ። ቃይ ቄሲካ ሄ ጌይያ ብታንያዉ መና ጎዳ ስንን አ ናጋራ አቶ ጊሶ። 32 ባረ ቦላን ደእያ ዎልቃማ ጋልባ ሀርግያፐ ጌያናዉ ኮሽያ ዎጋ ፖላናዉ ማንቆታይ ድጌዳ ኡራዉ ደእያ ዎጋይ ስም ሀዋ" ያጌዳ።
ጎልያ ቦላ ከስያ ቦሮቁዋ
33 መና ጎዳይ ሙሳነ አሮና ሀዋዳን ያጌዳ፥ 34 "ታን ህንተንቶ አቆ ኦደ እምያ ካናነ ቢታ ህንተ ገልያ ዎደ፥ ቃይ ሄ ጋድያን ደእያ ህንተ ኬፐ እቱዋን ታን ቦሮቁዋ የድያ ዎደ፥ 35 ሄ ጎልያዉ ቄስያኮ ቢደ፥ ‘ታ ሶን አያ ቦሮቀንቶ ደኤ’ ያጊደ ኦዶ። 36 ጎለን ደእያባይ ኡባይ ቱና ጌተተናዳን፥ ቄሲ ቦሮቁዋ በአናዉ ገላናፐ ካሰቲደ፥ ሶን ደእያዋ ኡባ ካረ ከሳናዳን አዛዞ፤ ያት ስምና ቄሲ በአናዉ ጎለ ገሎ። 37 ሄዋን በእያ ዎደ፥ ቦሮቆ ሳአይ ጎዳ ቦላን ማታ ማላትያ፥ ዎይ ዞኦ ማላ በሶፐነ ቃይ ጎዳፐ ኦላቲደ ግዶ ገሎፐ፥ 38 ቄሲ ጎለፐ ካረ ከሲደ፥ ጎልያ ላፑን ጋላሳ ጋካናዉ ጎርዶ። 39 ላፑን ጋላሳን ቄሲ ሄ ጎልያ ዛረደ፤ ጼልያ ዎደ ሄ ቦሮቁ ጎልያ ጎዳ ቦላን አኮፐ፥ 40 ቦሮቁ ደእያ ሹቻቱዋ ኡባ ጎዳፐ ሾዲደ፥ ካታማፐ ጋጻ ያ ቱኔዳ ሳአዉ ኦላናዳን አዛዞ። 41 ቃይ ጎዳ ዱፌዳ ኡርቃ ሶ ባጋና ቦክሽን፥ ዩሽ አደ ቆቆፋናዳን ኦ፤ ያቲደ ሄ ቆቆፌዳ ኡርቃ ካታማፐ ጋጻን ደእያ ቱና ሳኣን ኦልኖ። 42 ሄዋፐ ጉይያን፥ ሄ ሾዴዳ ሹቻቱ ሳኣን ሀራ ሹቻቱዋ ዎኖ፤ ቃይ ሀራ ኡርቃንካ ጎልያ ዱፍኖ።
43 "ሹቻቱዋ ሾድ ድግና፥ ቃይ ኡርቃካ ቆቆፊደ ሀራ ኡርቃ ዱፊ ስምና፥ ላኤንዋ ስሚደ ቦሮቁ ጎልያ ግዶን አኮፐ፥ 44 ቄሲ ሄዋ በእያ ዎደ፤ ቦሮቁ ሄ ጎልያ ግዶን አኮፐ፥ ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ ሄ ጎሊ ቱና። 45 ሄዋ ድራዉ እ ሄ ጎልያ፥ አ ሹቻ፥ አ ምነ እ ዱፈቴዳ ኡርቃ ኡባ ኮሎ፤ ሄዋንታ ካታማፐ ጋጻ አፊደ፥ ቱና ሳኣን ኦሎ። 46 ቃይ ሄ ጎሊ ጎርዳን ታክያ ዎድያን አ ግዶ ገልያ ኦንነ ሳአይ ቃማና ጋካናዉ ቱና። 47 ሄ ጎልያን ግስያ ኡራይ ዎይ ቁማ ምያ ኡራይ ባረ ማዩዋ ሜጮ።
48 "ሽን ቄሲ ዪደ ጼልያ ዎደ፥ ጎሊ ዱፈት ስምና ላኤንዋ ስሚደ አካና ዮፐ፥ ቦሮቁ ዬዳ ድራዉ፥ ሄ ጎሊ ጌሻ ግድያዋ ቄሲ ኤርሶ። 49 ጎልያ ጌሻናዉ ላኡ ካፎቱዋ፥ ጽድያ ም፥ ዞኦ ቃጭናነ ህሶጵያ ቦንጭያ አሆ። 50 ካፎቱዋፐ እቱዋ ከርያን ደእያ ፑልቱዋ ሃ ቦላን ሹኮ። 51 ሄዋፐ ጉይያን ጽድያ፥ ህሶጵያ ቦንጭያ፥ ዞኦ ቃጭናነ ፓጻ ደእያ ካፉዋ እትፐ አኪደ፥ ከርያን ደእያ ሹኬዳ ካፉዋ ሱንነ ፑልቱዋ ሃን የግ ከሲደ፥ ላፑ ገደ ሄ ጎልያ ጫጫፎ። 52 ያቲደ ሄ ጎልያ ቄሲ ካፉዋ ሱን፥ ፑልቱዋ ሃን፥ ፓጻ ደእያ ካፉዋን፥ ጽድያን፥ ህሶጵያ ቦንጭያንነ ዞኦ ቃጭናን ጌሾ። 53 ቃይ ፓጻ ደእያ ካፉዋ ካታማፐ ጋጻ ህን ደምባ የዶ። ሄዋዳን ኦደ፥ ጎልያ ጌሽያ ዎጋ ፖሌ፤ ጎሊካ ጌሻ ግዴ።
54 "አይ ዎልቃማ ጋልባ ሀርገ ግዶፐካ ሀዌ ዎጋ፤ ቃጨችያዋ ግድና፥ 55 ማዩዋ ቦላን ዎይ ጎልያ ቦላን ከስያ ቦሮቆ ግድና፥ 56 ጋፉዋ ግድና፥ ሳ ማዱ ግድና ዎይ እላሁዋ ግድናካ፥ 57 እትባይ ቱና ግድያዋነ ጌሻ ግድያዋ ኤርሳናዉ ዎልቃማ ጋልባ ሀርግያነ ቦሮቁዋ ዎጋይ ሀዋ" ያጌዳ።