ጾሳዉ እምያዋ ሺሽያ ዎጋ
1 መና ጎዳይ ሙሳ ሀዋዳን ያጌዳ፤ 2 "እስራኤልያ አሳዉ ሀዋዳን ያጋደ ኦዳ፤ ‘እት አሳይ መና ጎዳዉ እማናዉ ሺቆፐ፥ ኔን ቆፕያዋዳን ሄ አሳ ድራዉ ሚሻ ጭጎ። 3 ሄዌነ ላታሙ ላይፐ ቢደ ኡሱፑን ታሙ ላይ ጋካናዉ ደእያ አቱማዎ ኡሱፑን ጼቱ ግራምያ ዴጽያ ጻጋራ ብራ ጭጎ። 4 ማጫ አሳ ግዶፐ ቃይ ሀታሙ ጻጋራ ብራ ጭጎ። 5 ቃይ እቼሹ ላይፐ ቢደ ላታሙ ላይ ጋካናዉ ደእያ አቱማዎ ላታሙ ጻጋራ ብራነ ማጫንዉ ታሙ ጻጋራ ብራ ጭጎ። 6 ቃይካ እት አግናፐ ቢደ እቼሹ ላይ ጋካናዉ ደእያ አቱማዎ እቼሹ ጻጋራ ብራነ ማጫንዉ ሄዙ ጻጋራ ብራ ጭጎ። 7 ሄዋዳንካ ቃይ ኡሱፑን ታሙ ላይነ ሄዋፐ ቦላና ደእያ አቱማዎ ታማነ እቼሹ ጻጋራ ብራነ ማጫንዉ ታሙ ጻጋራ ብራ ጭጎ። 8 ቃይ ሺቄዳ ብታኒ ኔን ቆፕዳዋ ጭጋናዉ ዳንዳየና ዳሮ ማንቆ ግዶፐ፥ እ ባረ ሺቁዋ ጋናዉ እሜዳ አሳ አሂደ ቄስያ ስንን ኤሶፐ ሺቄዳ ብታኒ ጭጋናዉ ዳንዳይያዋ ኬና ቆፒደ ቄሲ ጋማቶ።
9 " ‘እ ሺቀቴዳዌ አሳይ መና ጎዳዉ ያርሽያ ሳኣ ማላ መህያ ያርሻናዉ ግዶፐ፥ ሄዋ ማላ አሳይ መና ጎዳዉ እምያ መሂ ኡባይ ጌሻ። 10 እ ሄ መህያ ድራዉ ሀራ መህያ እሞፖ፤ ዎይ አ ሀራ መህያና ላሞፖ። ሎኡዋ ኢታና ዎይ ቃይ ኢታካ ሎኡዋና ላሞፖ፤ ሽን እ ላሞፐ፥ ኮይሮ መህያነ ላምያ እሜዳ መሂ ላኡካ ጌሻ። 11 እ ሺቀቴዳ መሂ መና ጎዳዉ ያርሹዋ ኦደ ሺሻናዉ ጌሻ ግደና መህያ ግዶፐ፥ ሄ ብታኒ ሄ መህያ ቄስያ ስን አሆ። 12 ሎኦ ግድና ኢታ ግድና፥ ቄሲ ሄ መህያ ጋማቶ፤ ያቶፐ ቄሲ ጋማቴዳዌ አ ጋትያ ግዶ። 13 ሽን ሄ መህያ ጎዳይ አ ዛሪደ ዎዛናዉ ኮዮፐ፥ ሄ መህያ ጋትያ ቦላ ጼቱዋፐ ላታሙ ኩሽያ ጉጆ።
14 " ‘እት አሳይ ባረ ጎልያ ጌሻ ግዳናዳን መና ጎዳዉ ዱማዮፐ፥ ሎኦ ግድና ኢታ ግድና፥ ቄሲ ሄ ጎልያ ጋማቶ። ያቶፐ ቄሲ ጋማቴዳዋዳን አ ጋቲ ሄዋዳንካ ግዶ። 15 ቃይ ባረ ጎልያ ጾሳዉ ጌሻ ኦ ዱማዬዳ አሳይ ዛረደ ዎዛናዉ ኮዮፐ፥ ሄ ጎልያ ጋትያ ቦላን ጼቱዋፐ ላታሙ ኩሽያ ጉጆ፤ ያቶፐ ጎሊ አሳ ግዴ።
16 " ‘እት አሳይ ባረ ላታ ጋድያፐ ሻኪደ ጌሻ ኦ መና ጎዳዉ ዱማዮፐ፥ ሄ ጋድያ ጋቲ አን ዘርያ ዘረን ቆፈቶ። ሄዌነ ላታሙ ኪሎ ግራመ ባንጋ ዘርያ ኬሻ ሾይቃ ግዶፐ፥ ታሙ ጻጋራ ብራ ጭጎ። 17 እ ባረ ጋድያ እሻታማን ላይ ባላፐ ዶሚደ ጌሻ ኦ ጾሳዉ ዱማዮፐ፥ ሄ ጋድያዉ ኩመን ጋትያ ጭጎ። 18 ሽን እ ባረ ጋድያ እሻታማን ላይ ባላይ አ ስምና ጌሻ ኦ ጾሳዉ ዱማዮፐ፥ ካሊደ ደእያ እሻታማን ላይ ባላይ ጋካናዉ ደእያ ዎድያ ቄሲ ፓይዶ፤ ያቶፐ አ ኩመን ጋትያፐ ዎ። 19 ሄ ጋድያ ጌሻ ኦ ጾሳዉ ዱማዬዳ አሳይ ዛረ ዎዛናዉ ኮዮፐ፥ እ ጋማተቴዳ ሚሻ ቦላ ጼቱዋፐ ላታሙ ኩሽያ ጉጆ፤ ያቶፐ ጋዲ ስሚደ አዋ ግዴ። 20 ሽን እ ጋድያ ዛረደ፥ ዎዛናፐ ካሰቲደ ሀራ አሳዉ ዛልኦፐ፥ ሄ ጋድያ ዎዛናዉ ዳንዳየና። 21 እሻታማን ላይ ባላይ ጋክና ጋዲ የደቲያ ዎደ፥ ሄ ጋዲ ላኤን ጉየ አካናዋዳን መና ጎዳዉ ጌሻ ግዴ። ሄ ግሹ ቄስያሳ።
22 " ‘እት አሳይ ሀራ አሳፐ ሻሜዳ ጋድያ ጌሻ ኦ መና ጎዳዉ ዱማያናዉ ኮዮፐ፥ 23 ካልያ እሻታማን ላይ ባላይ ጋካናዉ ደእያ ጋትያ ቄሲ ጋማቶ፤ ብታኒ ሄ ጋላስካ ሄ ግምትያ ጭጎ፤ ሄ ሚሻይ መና ጎዳዉ ዱማቴዳ ሚሻ ግዳናዋ። 24 እሻታማን ላይ ባላይ ጋክያ ዎደ፥ ሄ ጋዲ ኮይሮ ላታን አኪደ ዛልኤዳ ብታንያዉ ስሜ።
25 " ‘አ ጋቲ ጾሳ ዱንካንያን ኤረቲያ ሚዛናን ጋማተቴ።
26 " ‘ሽን ኦንነ ባይራ የለቴዳ መህያ መና ጎዳዉ ዱማዪደ ሺሻናዉ ዳንዳየና፤ አያዉ ጎፐ፥ እ ካሰካ መና ጎዳሳ። ሚዛ ማራ ግድና ዎይ ዶርሳ ማራ ግድናካ እ መና ጎዳዋ። 27 ሄ መሂ ጌሻ ግዳና ዮፐ፥ ነ ጋማቴዳ ጋትያ ቦላ ጼቱዋፐ ላታሙ ኩሽያ ጉጂደ አ ጎዳይ ዛረደ ዎዞ። እ ዎዛና ዮፐ፥ ነ ጋማቴዳ ጋትያን ሀራ አሳዉ ዛልኤቴዳ።
28 " ‘እት አሳይ ባረዋፐ መና ጎዳዉ እሜዳዌ አያ ግዶፐካ፥ አሳ ግድና መህያ ግድና፥ ዎይ አ ላታን ጋኬዳ ጋደ ግድናካ፥ ዛልኤተናነ ዎዘተና። ዱማዬዳዌ ኡባባይ መና ጎዳዉ ጌሻ ኡባፐ እቱዋ ግዴዳ ጌሻ ያርሹዋ።27:28 ፓይ. 18:14 29 አሳ ግዶፐ ሻከቲደ ያናዳን እመቴዳ አሳይ ዎዘቶፖ፤ ሄ አሳይ ሀይቆ።
30 " ‘ቢታ አስራታይ ኡባይ ጋድያፐ ሞኬዳ ካ ግድና ዎይ ም አይፍያ ግድናካ መና ጎዳሳ። ሄዌ መና ጎዳዉ ጌሻ።27:30-33 ፓይ. 18:21፤ ዛረ. 14:22-29 31 እት አሳይ ባረ አስራታ ዎዛናዉ ኮዮፐ፥ አ ጋትያ ቦላን ጼቱዋፐ ላታሙ ኩሽያ ጉጆ። 32 ሚዛ አስራታ ግድና፥ ዶርሳ አስራታ ግድና፥ ዎይ ዴሻ አስራታ ግድናካ፥ ሄንንቻ ጋትማፐ ጋርሳና አያ ሀቃዌነ ታሙን መና ጎዳዉ ጌሻ። 33 ታሙን መህያ ኢታ ግድና ሎኦ ግድናካ ዶሮፖ፤ ዎይ አ ሀራና ላሞፖ። ላሞፐነ ኮይሮዌነ ላምያ እሜዳዌነ ላኡካ ጾሳዉ ጌሻ ግዲኖፐ አትና፥ ዛሪደ ዎዛናዉ ዳንዳየና’ ያጋ" ያጌዳ።
34 ሲና ደርያ ቦላን መና ጎዳይ ሙሴ ባጋና እስራኤልያ አሳ አዛዜዳ አዛዞቱ ሀዋንታ።