ዎጋ 15

አሳ ቦላፐ ጎግያ ቱንስያባ

1 መና ጎዳይ ሙሳነ አሮና ሀዋዳን ያጌዳ፤ 2 "እስራኤልያ አሳዉ ሀዋዳን ያጊደ ኦድተ፤ ‘አይ አሳ አቱንፐ አያይኔካ ጎጎፐ፥ ሄ ጎግያባይ ቱና። 3 ሄ ጎግያዋፐ ደንዴዳዋን ሄ ኡራይ ቱና ግድያ ዎጋይ ሀዋ: ሄ ጎግያባይ አገናን ጎግናካ ዎይ ቃይ ጎግያዋ አግንቶካ ሄ አ ግዶን ደእያባይ አ ቱንሴ።

4 " ‘አ ቦላፐ አያይኔካ ጎግያ አሳይ ግስያ አይ ግሱካ ቱና፤ ቃይ እ ኡትያባይ አያ ግዶፐካ ቱና። 5 አ ግሱዋ ቦችያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና። 6 ጎግያዋና ደእያ አሳይ ኡቴዳዋ ቦላ ኡትያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

7 " ‘ጎግያባይ ደእያ አሳ ቦላ ቦችያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

8 " ‘ጎግያባይ ደእያ አሳይ ጌሻ አሳ ቦላ ጩቾፐ፥ ሄ አሳይ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

9 " ‘ቃይ ጎግያባይ ደእያ አሳይ ኡትያ አይ ኮራይካ ቱና። 10 ባረፐ ጋርሳና ደእያዋ አያን ግዶፐካ ቦችያ ኦንነ ኦማርስ ጋካናዉ ቱና፤ ቃይ ሄዋንታ ማላትያዋንታ ቶክያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

11 " ‘ጎግያዋና ደእያ አሳይ ባረ ኩሽያ ሜጨተናን ደኢደ ቦችያ አሳይ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

12 " ‘ቃይ ጎግያባይ ደእያ አሳይ ቦችያ ኡርቃ ሚሻ ኡባ መንተ፤ ምፐ ኦሰቴዳ ሚሻ ኡባይ ቃይ ሃን ሜጨቶ።

13 " ‘ጎግያባይ ደእያ አሳይ ሄ ጎግያዋፐ ጌይያ ዎደ፥ ባረዉ ላፑን ጋላሳ ፓይዶ። ባረ ማዩዋ ሜጮ፤ ባረ ቦላካ ፑልቱዋ ሃን ሜጨቶ፤ ያቲደ እ ጌሻ ግዴ። 14 ሆስፑን ጋላስ ላኡ ማራ ሀራጰቱዋ ዎይ ላኡ ማራ ዶጎማቱዋ አኪደ፥ መና ጎዳ ዱንካንያ ፐንግያ መና ጎዳ ስን ዪደ፥ ቄስያዉ ኡንቱንታ እሞ። 15 ቄሲ ሀራጰቱዋፐ እቱዋ ናጋራ ያርሾ፥ ላኤንዋ ቃይ ጹግያ ያርሾ ያርሼ፤ ያቲደ ቄሲ ብታንያ ቦላፐ ጎግያዋ ድራዉ መና ጎዳ ስንን አ ናጋራ አቶ ጊሴ።

16 " ‘አይ አቱማ አሳይነ ባረ አቱማተፐ ዘረይ ጉኮፐ፥ ባረ ኩመን ቦላ ሃን ሜጨቶ፤ ቃይ ኦማርስ ጋካናዉ እ ቱና። 17 አቱማተፐ ጉኬዳ ዘረይ ቦቼዳ ማዩዋ ኡባይ ዎይ ጋልባ ኡባይ ሃን ሜጨቶ፤ ቃይ ኦማርስ ጋካናዉ እ ቱና። 18 ቃይ እት አቱማ አሳይ ማጫ አሳና ግስና፥ አ አቱማተፐ ዘረይ ጉኮፐ፥ ላኡካ ሃን ሜጨትኖ፤ ቃይ ኦማርስ ጋካናዉ ኡንቱንቱ ቱና።

19 " ‘ማጫ አሳዉ አግናን አግናን ይያ ፒላይ ዮፐ፥ ላፑን ጋላሳ ጋካናዉ እዛ ቱና፤ ቃይ እዞ ቦችያ ኦንነ ኦማርስ ጋካናዉ ቱና።

20 " ‘ሄ ፒላ ዎደ እዛ ግስያዌ ኡባይ ቱና፤ ቃይ እዛ ኡትያዌ ኡባይካ ቱና። 21 እዛ ግስያ ግሱዋ ቦችያ ኡባይ ባረ ማዩዋ ሜጮ፤ ሃንካ ሜጨቶ፤ ኦማርስ ጋካናዉ እ ቱና። 22 እዛ ኡትያዋ ቦችያ ኡባይ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና። 23 እዛ ግስያ ግሱዋ ግድናካ ዎይ እዛ ኡትያዋ ቦችያ ኦንነ ኦማርስ ጋካናዉ ቱና።

24 " ‘አይ አቱማ አሳይነ ሄ ፒላ ዎደ ኢናና ግሶፐ፥ ሄ ፒላይ ቃይ አ ቦቾፐ፥ ላፑን ጋላሳ ጋካናዉ እ ቱና፤ እ ግስያ ግሱ ኡባይካ ቱና።

25 " ‘እት ማጫ ምሽራትዉ እዝ ፒላ ዎድያ ግደናን ሀራ ዎድያን ሱይ ጎጎፐ፥ ዎይ ቃይ እዝ ፒላይካ ባረ ዎድያፐ አደ ኤቀናን እጺደ ጎጎፐ፥ እ ኤቃና ጋካናዉ እዛ ቱና። ባረ ፒላ ዎድያን ቱና ግድያዋዳን፥ ሄ ዎደካ እዛ ቱና። 26 ሄ ሱይ ኢፐ ጎግያ ዎድያን እዛ ግሴዳ ግሱ ኡባይ፥ ባረ ፒላ ዎደ እዛ ግሴዳ ግሱዋካ ማላ ቱና፤ ቃይ እዛ ኡትያባይ ኡባይካ ባረ ፒላ ዎደ እዛ ኡትያባይ ቱና ግድያዋዳን ቱና። 27 ቃይ ሄ ቱኔዳባቱዋ ቦችያ ኦንነ ቱና፤ እ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

28 " ‘እዝፐ ጎግያባይ ኤቆፐ፥ እዛ ሄ ዎድያፐ ዶማደ ላፑን ጋላሳ ፓይዱ፤ ሄዋፐ ጉይያን፥ እዛ ጌሻ ግዳና። 29 ሆስፑን ጋላሳን እዛ ላኡ ማራ ሀራጰቱዋ ዎይ ላኡ ማራ ዶጎማቱዋ አካደ፥ ጾሳ ዱንካንያ ፐንግያ ቄስያኮ አሁ። 30 ቄሲ ሀራጰቱዋፐ እቱዋ ናጋራ ያርሾ እቱዋ ቃይ ጹግያ ያርሾ ያርሾ። ያቲደ ቄሲ ኢፐ ጎግያዋ ቱናተ ድራዉ መና ጎዳ ስንን እ ናጋራ አቶ ጊሴ።

31 " ‘ባረንቱ ግዶን ደእያ ጾሳ ዱንካንያ ቱንሲደ እስራኤልያ አሳይ ሀይቀናዳን፥ ኔን ሀዋዳን ኦደ ኡንቱንቱ ባረና ቱንስያዋፐ ሻከቲደ ደአናዳን ናጋ።

32 " ‘አ ቦላፐ አያይኔካ ጎግያ አሳዉነ አ አቱማተፐ ጉኬዳ ዘረን ቱንያ አሳዉ፥ 33 ቃይ ባረ ፒላ ጋሱዋን ቱንያ ማጫ አሳዉ፥ አቱማ ግድና ማጫዋ ግድና ጎግያባይ ደእያ አሳዉነ ቱኔዳ ማጫ አሳና ግስያ አቱማ አሳዉ እመቴዳ ዎጋይ ሄዋ’ ያግተ" ያጌዳ።