Marcos 14

ክርስቶሳ ቦላ ማቀቴድኖ

1 ፓስጋ ባላ ግያዋ ቦንችያ ጋላሳይነ ጫልቤና ኡክ ሙሳ ቦንችያ ባላ ጋላሳይ ጋካናዉ ላኡ ጋላሳይ አቴዳ፤ ቄሳቱዋ ካፓቱነ ህግያ ታማርስያዋንቱ አሳይ ኤረናን የሱሳ ኦይቂደ ዎና ኦግያ ኮዪኖ።✝14:1 ከሳ 12:1-27 2 "አሳይ ዋላሳ ከሰና ማላ፥ ፓስጋ ቦንችያ ጋላስ ሄዋ ኦኮ" ያጌድኖ።

የሱሳ ሽቱዋ ኦኬዳ ምሽራቶ

3 የሱስ ቢታንያ ጋድያን ኦሉዋ ሀርግያ ስሞና ሶይን ቁማ ማናዉ ኡቴዳ ዎደ፥ እት ምሽራታ አልባስጽሮሳ ባሬታ ኩሜዳ ናርዶሳ ግያ ዳሪ አልኦ ሽቱዋ*14:3 ዳሪ አልኦ ሽቱዋ፦ ጉሳይ ሎይ ሳዊያዋ ጉሳ። አካደ ያዱ፤ ሄ አልባስጽሮሳ ባሬታ መንደ ሽቱዋ የሱሳ ሁጲያን ትጋዱ። 4,5 ሄዋን ደእያ አሳፐ እቱ እቱ ሀንቀቲደ፥ "ሀ ሽቱዋ ጮ አያዉ ባይዛይ? ሀ ሽቱዋ ሄዙ ጼቱ ብራ ሳንትምያን*14:4-5 ብራ ሳንትምያ፦ 6:37 ጼልተ። ዛልኢደ፥ ሚሻ ህዬሳዉ እማናዉ ዳንዳየቴ" ያጊደ ባረንቱ ግዶን ሃሳዪኖ፤ ያቲደ ሄ ምሽራቶ ዳርስ ሀንቀቴድኖ።

6 ሽን የሱስ ሀዋዳን ያጌዳ፤ "ሀ ምሽራቶ አይነ ጎፕተ፤ እዞ አያዉ መቶቴ? እዛ ታዉ ሎኦባ ኦዱ። 7 ህዬሳቱ ኡባ ዎደ ህንተንቱና ደኢኖ፤ ህንተ ኮዬዳ ዎደ አዉደነ ኡንቱንታ ማዳናዉ ዳንዳዪታ፤ ሽን ታን ኡባ ዎደ ህንተንቱና ደእከ።✝14:7 ዛረ. 15:11 8 እዛ ባረዉ ዳንዳየቴዳዋ ኦዱ፤ ቃይ ታ አሳተይ ሞገታናፐ ካሰታደ ሞጎ ጊግሳናዉ ሽቱዋ ኦካዱ። 9 ታን ህንተንቶ ቱሙዋ ኦዳይ፤ ሳኣ ኡባን ዎንጋላ ምሽራቹዋ ኦድያሳን ሀቃንኔካ፥ አሳይ እዞ ቆፓና ማላ፥ ሀ እዛ ኦዳዌ ኦደታና" ያጌዳ።

ይሁዳ አስቆሮቱ የሱሳ አደ እማናዉ ዞረታ ኤኖ ጌዳ

10 ታማነ ላኡ የሱሳ ካልያዋንቱፐ እቱ ይሁዳ አስቆሮቱ*14:10 ይሁዳ አስቆሮቱ፦ 3:19 ጼልተ። ግያዌ፥ የሱሳ ቄሳቱዋ ካፓቶ አደ እማናዉ ኡንቱንቱኮ ቤዳ። 11 ኡንቱንቱ ሄዋ ስሴዳ ዎደ ናሸቲደ፥ "ኑን ነዉ ሚሻ እማና" ያጌድኖ፤ ይሁዳ አስቆሮቱ የሱሳ አደ እማናዉ እንጀትያ ዎድያ ዎቼ።

የሱስ ባረና ካልያዋንቱና ፓስጋ ቁማ ሜዳ

12 ጫልቤና ኡክ ምያ ባላ ጋላሳ ቦንችያ ኮይሮ ጋላስ፥ ፓስጋ ቁማ ማናዉ ዶርሳ ሹክያ ዎደ፥ የሱሳ ካልያዋንቱ አ፥ "ፓስጋ ቦንችያ ጋላስ ኔን ማና ቁማ ኑን ሀቃ ቢደ ጊግሳኔ?" ያጊደ ኦቼድኖ።

13 የሱስ ባረና ካልያዋንቱፐ ላአቱዋ ሀዋዳን ያጊደ ኪቴዳ፤ "ካታማ ቢተ፤ ህንተ ቢሽን፥ ኦቱዋን ሃ ቶኬዳ እት ብታኒ ህንተንቱና ጋከታናዋ፤ አ ካልተ። 14 እ ቢደ ገልያ ጎልያዉዋ፥ ‘ታማርስያዌ ኔና፥ "ታን ታና ካልያዋንቱና ፓስጋ ቁማ ማናዉ ታ እማ ክፍሊ ሀቃኔ?" ያጌ’ ያግተ። 15 ጎልያዉ ህንተንታ ፖቅያ ቦላን ደእያ ጊግ ኡቴዳ አኮ ክፍልያ በሳና፤ ሄዋን ኑዉ ጊግስተ" ያጌዳ።

16 ሄ ላኡ የሱሳ ካልያዋንቱ ከሲደ፥ ካታማ ቤድኖ፤ የሱስ ባረንቶ ኦዴዳዋዳንካ ኡባባ ደሚደ፥ ፓስጋ ቁማ ጊግሴድኖ።

17 ሳአይ ኦማርስያ ዎደ የሱስ ታማነ ላኡ ባረና ካልያዋንቱና ያ ቤዳ። 18 ኡንቱንቱ ኡቲደ ሳምፓፐ ቁማ ሚሽን፥ የሱስ ኡንቱንታ፥ "ታን ህንተንቶ ቱሙዋ ኦዳይ፤ ህንተንቱፐ እቱ ታናና ምያዌ፥ ታና አደ እማናዋ" ያጌዳ።✝14:18 ማዝ. 41:9

19 አ ካልያዋንቱ ሎይ ስሰትና፥ ሁጲያን ሁጲያን አ፥ "ቱሙ ታኔሻ?" ግያዋ ዶሜድኖ።

20 የሱስ ዛሪደ፥ "እ ሀ ህንተንቱ ታማነ ላአቱዋፐ እቱዋ፤ እ ታናና እትፐ ቱሻናዉ ባረ ዳቡዋ ሻታን የድያዋ። 21 ታን፥ አሳ ናአይ፥ ጾሳ ማጻፋይ ሀይቃና ጌዳዋዳን ሀይቃና፤ ሽን ታና፥ አሳ ናኣ፥ አደ እምያ ኡራዉ አዬሮ፤ ሄ ኡራይ የለተናን አቴደንቶ፥ አዉ ሎአ ሽን" ያጌዳ።

ጎዳ ካዉዋ አክያ ዎጋ

22 ኡንቱንቱ ሚሽን፥ የሱስ ዳቡዋ አኪደ፥ ጾሳ ጋላቴዳ፤ ሄ ዳቡዋ መንደ፥ ባረና ካልያዋንቶ እሚደ፥ "ሄይተ፤ ሀዌ ታ አሹዋ" ያጌዳ።

23 ጹኣ አኪደ፥ ጾሳ ጋላቲደ፥ ኡንቱንቶ እሜዳ፤ ኡባይ ሄ ጹኣፐ ኡሼድኖ። 24 የሱስ፥ "ሀዌ ኦራ ጫቁዋን*14:24 ኦራ ጫቁዋ፦ ጾሳይ ባረ አሳዉ የሱሳ ሀይቁዋ ባጋና ቃላ ገሌዳ ኦራ ቃላ ጫቁዋ። ሄዌኔካ አ ጋክያ ጹኣ፥ እ ባረ ሱ ጉሲደ አ እሜዳ አ ደኡዋ። ሄዌኔካ፥ ኑ ኤጫ አሳተይ ኡባይ ላመትና፥ ኦራጼዳ ጾሳ ህጊ ኑ ዎዛናን ጻፈቴዳዋ ኦዴ። ጮራ አሳ ድራዉ ጉክያ ታ ሱ።✝14:24 ከሳ 24:8፤ ኤር. 31:31-34 25 ታን ህንተንቶ ቱሙዋ ኦዳይ፤ ታን ጾሳ ካዉተን ኦራ ዎይንያ ኤሳ ኡሻና ጋላሳይ ጋካናዉ፥ ላኤንዋ ሀ ዎይንያ ኤሳ ኡባካ ኡሽከ" ያጌዳ።

26 ማዝሙርያ የጼዳዋፐ ጉይያን፥ ደብረ ዛይተ ደርያ ቤድኖ።

ጰጽሮስ ካዳናዋ የሱስ ካሰቲደ ኦዴዳ

27 የሱስ ባረና ካልያዋንቶ፥

"ህንተንቱ ኡባይ ታና የጊደ ዎጻንታ፤ አያዉ ጎፐ፥

ጾሳ ማጻፋይ፥ ‘ጾሳይ ዶርሳ ሄምያዋ ዎና፤

ሄዋፐ ጉይያን ዶርሳይ ኡባይ ላለታና ጌ’

ያጌዳ።✝14:27 ዛካ. 13:7 28 ሽን ታን ሀይቁዋፐ ደንዴዳዋፐ ጉይያን፥ ህንተንቱፐ ካሰታደ ጋሊላ ባና" ያጌዳ።

29 ጰጽሮስ ዛሪደ፥ "ኡንቱንቱ ኡባቱ ኔና የጊደ ቦፐካ፥ ታን ኔና ሙለካ የግከ" ያጌዳ።

30 የሱስ ጰጽሮሳ፥ "ታን ነዉ ቱሙዋ ኦዳይ፤ ሀቼ ቃማ ኩቱ ላኤንዋ ዋሳናፐ ካሰ፥ ኔን ታና ሄዙ ገደ ካዳናሳ" ያጌዳ።

31 ሽን ጰጽሮስ ካሰዋፐካ ምንሲደ፥ "ታን ሀራይ አቶ፥ ኔናና እትፐ ሀይቂንቶካ፥ ኔና ሙለካ ካድከ" ያጌዳ። ቃይ ሀራቱ ኡባቱካ ሄዋዳን ጌድኖ።

የሱስ ጌተሰማንያን ዎሴዳ

32 ጌተሰማነ ግያ ሳኣ ቤድኖ፤ የሱስ ባረና ካልያዋንታ "ታን ጾሳ ዎሳናዉ፥ ህንተንቱ ሀዋን ኡትሽተ" ያጌዳ።

33 የሱስ ጰጽሮሳ፥ ያቆባነ ዮሃንሳ ባረናና አፌዳ፤ ዳሪ ካዮቴዳነ መቶቴዳ። 34 ቃይ ኡንቱንታ፥ "ታን ሀይቃና ጋካናዉካ ካዮታይ፤ ሀዋን ታክሽተ፤ ገምእሾፕተ" ያጌዳ።

35 ጉ ስንኮ ሺቂደ፥ ሳኣን ጉፋኒደ፥ ዳንዳየትያዋ ግዶፐ፥ ሄ ዎዲ ባረፐ አና ማላ፥ ጾሳ ዎሴዳ። 36 ቃይካ፥ "አባቦ፥*14:36 አባ፦ ጉሳይ ግሪከ ቃላንካ "አባ" ግድያ ዎደ፥ አራማይከ ቃላን "አባ" ግያዋ። ታ አቦ፥ ኡባባይ ነዉ ዳንዳየቴ፤ ሀ ጹኣ ታፐ ድጋ፤ ሽን ነ ሸንያዳን ሀኖፐ አትን፥ ታ ሸንያዳን ሀኖፖ" ያጌዳ።

37 የሱስ ባረና ካልያዋንቱኮ ስም ዪደ፥ ገምእሼዳዋንታ ደሚደ ጰጽሮሳ፥ "ስሞና፥ ገምእሻዲ? ኔን እት ሳተንቶነ ናጋናዉ ዳንዳያበይኪ? 38 ፓጭያን ህንተ ገለና ማላ፥ ናገትተነ ጾሳ ዎስተ፤ አያናይ ጊግ ኡቴዳ፤ ሽን አሹ ዳቡራንቻ" ያጌዳ።

39 ቃይካ ቢደ ካሰዋዳንካ ጾሳ ዎሴዳ። 40 አ ካልያዋንቱኮ ጉየ ስሚደ እ ይያ ዎደ፥ ገምእሼዳዋንታ ደሜዳ፤ ኡንቱንቱ አይፍያ ገምእሹ ጎዝ ዎዳ ድራዉ፥ አዉ አያ ሃሳዪኖንቶካ ኤርበይክኖ።

41 ሄዘንዋ ኡንቱንቱኮ ዪደ፥ "ሀእ ጋካናዉካ ገምእሺቴነ ሸምፒቴ? ግዳና፤ ዎዲ ጋኬዳ፤ በእተ፥ ታና፥ አሳ ናኣ፥ ናጋራንቻ አሳቱዋ ኩሽያን አደ እምያ ዎዲ ጋኬዳ። 42 ደንድና ቦይተ፤ በእተ፥ ታና አደ እምያዌ ሀዌኩ ጋኬዳ" ያጌዳ።

የሱስ ባረ ሞርከቱዋ ኩሽያን ኦይቀቴዳ

43 የሱስ ሄዋ ብሮ ሃሳይሽን፥ ታማነ ላኡ አ ካልያዋንቱፐ እቱ፥ ይሁዳ አስቆሮቱ፥ ኤለካ ጋክ ዎዳ፤ ቃይ ቄሳቱዋ ካፓቱ ህግያ ታማርስያዋንቱነ ጭማቱ ኪትና፥ ማሻነ ጻምኣ ኦይቄዳ ጮራ አሳይ አናና እትፐ ዬዳ። 44 የሱሳ አ እምያዌ ሄ ጮራ አሳዉ፥ "ታን የርያዌ አ፤ አ ኦይቂደ ሎይ ናጊደ፥ አፍተ" ያጊደ ማላ ኦድ ዎዳ።

45 ይሁዳ አስቆሮቱ ጋኮሳናካ የሱሳኮ ሺቂደ፥ "ታማርስያዎ" ያጊደ የሱሳ የር አኬዳ። 46 ሄ ጮራ አሳይ የሱሳ ምንስ ኦይቄዳ። 47 ሽን ማታን ኤቄዳዋንቱፐ እቱ ባረ ጩብያ ሾድነ ቄሳቱዋ ኡባቱዋ ካፑዋ ቆማ ሾጪደ፥ አ ሀይ ቃንጽ ኦሌዳ።

48 የሱስ ዛሪደ፥ ሄ ሺቄዳ ጮራ አሳ፥ "ታና ቦንቃንቻ ከሲደ፥ ቦንቃንቻ ኦይቂያዋዳን ኦይቃናዉ ጩብያነ ጻምኣ ኦይቂደ ዬድቴ? 49 ታን ጌሻ ጎልያን ታማርሳደ፥ ጋላሳን ጋላሳን ህንተንቱና ደእያ ዎደ ታና ኦይቂበይክታ፤ ሽን ጾሳ ማጻፋቱ ጌዳዌ ፖለታናዉ በሴ" ያጌዳ።

50 የሱሳ ካልያዋንቱ ኡባቱ አ የጊደ ብ አጌድኖ።

51 ናጻላ ጻላላ ማዬዳ እት ያላጋ ብታኒ የሱሳ ካልያዋ አሳይ ኦይቄዳ። 52 ሽን ሄ ብታኒ ናጻላ ኦሊደ፥ ካሎ ጺራ ዎጼዳ።

የሱሳ ፕርድያ ሻንጋቱዋኮ አፌድኖ

53 አሳይ የሱሳ ቄሳቱዋ ኡባቱዋ ካፑዋ ሶይ፥ ቄሳቱዋ ካፓቱዋ ኡባቱ፥ ጭማቱነ ህግያ ታማርስያዋንቱ ሺቄዳሳ አፌድኖ። 54 ጰጽሮስ ቄሳቱዋ ኡባቱዋ ካፑዋ ድርሳ ግዱዋ ጋካናዉ ሃኩዋን አ ካሌዳ፤ ያን ናግያዋና ታማ ካሺደ፥ ኡት አጌዳ።

55 ቄሳቱዋ ካፓቱነ ሄዋን ሺቄዳ አሳይ ኡባይ የሱሳ ዎናዉ አ ቦላ ማርካ ኮዬድኖ፤ ሽን አይነ ደምበይክኖ። 56 አያዉ ጎፐ፥ ጮራ አሳቱ አ ቦላን ዎርዱዋ ማርካቴድኖ፤ ሽን ኡንቱንቱ ማርካተይ እት ማላ ግደና።

57,58 እት እት አሳቱ ደንድ ኤቂደ የሱሳ ቦላ፥ "እ፥ ‘ታን አሳይ ኬጼዳ ሀ ጌሻ ጎልያ ኮላደ፥ አሳይ ኬጽቤና ሀራ ጌሻ ጎልያ ሄዙ ጋላሳ ግዶን ኬጻና’ ጊሽን፥ ኑን ስሴዶ" ያጊደ ዎርዱዋ ማርካቴድኖ። 59 ሽን ሀራይ አቶ ኡንቱንቱ ማርካተይ ሄዋን እት ማላ ግድቤና።

60 ቄሳቱዋ ኡባቱዋ ካፑ አሳ ኡባ ስንን ደንድ ኤቂደ የሱሳ፥ "ሀዋንቱ ኔና ሞትያ ሞቶ ነዉ ዛርያባይ ባዌ?" ያጊደ ኦቼዳ። 61 ሽን የሱስ ጮኡ ጊደ፥ አይነ ዛርቤና፤ ቄሳቱዋ ኡባቱዋ ካፑ አ፥ "አንጀቴዳ ጾሳ ናአይ ክርስቶስ ኔኔ?" ያጊደ ላኤንዋ ኦቼዳ።

62 የሱስ ዛሪደ፥ "ኤ፥ ታና፤ ህንተ ታና፥ አሳ ናኣ፥ ዎልቃማ ጾሳፐ ኡሸቻ ባጋና ኡትደእሽናነ ሳሉዋ ሻርያና ዪሽን በአና" ያጌዳ።✝14:62 ዳኔላ 7:13

63 ቄሳቱዋ ኡባቱዋ ካፑ ባረ ማዩዋ ፔ ኦሊደ፥ "ኑና ሀዋፐ ስንን አያዉ ሀራ ማርካ ኮሺ? 64 ህንተንቱ አ ቦርያ ስሴድታ፤ ህንተ ቆፋይ አዬ?" ያጌዳ፤ ኡንቱንቱ ኡባይ፥ "እ ሀይቃና በሴ" ያጊደ አ ቦላ ፕርዴድኖ።✝14:64 ዎጋ 24:16

65 ኡንቱንቱፐ እቱ እቱ አ ቦላ ጩሸ ዶሜድኖ፤ አ አይፍያ ካም ደቺደ፥ "ኔና ደቼዳዌ ኦኔ? አነ ትምቢትያ ኦዳ!" ያጌድኖ፤ ቃይ ናግያዋንቱካ አ ቅንጻልያ ባቂደ አፌድኖ።

ጰጽሮስ የሱሳ ካዴዳ

66 ጰጽሮስ ድርሳ ግዶን ህርክና ደእሽን፥ ቄሳቱዋ ኡባቱዋ ካፑዋ ማጫ ቆማቱዋፐ እትና ያዱ። 67 ጰጽሮስ ታማ ካሽያዋ በኣደ፥ ጫዳ ጼላደ፥ "ኔንካ ናዝሬትያ የሱሳና እትፐ ደኣ" ያጋዱ።

68 ሽን ጰጽሮስ፥ "ኔን ግያዌ አየንቶ ታን ኤርከ፤ ታዉ አኬከተና" ያጊደ ካዴዳ፤ ያቲደ ድርሳ ፐንግያኮ ከሴዳ፤ ኩቱካ ዋሴዳ።*14:68 ኩቱካ ዋሴዳ፦ ሀ ቃላይ በን ብለቴዳ እት እት ብለን ባዋ።

69 ሄ ቆማታ ጰጽሮሳ በኣደ፥ አ ማታን ኤቄዳ አሳቱዋ፥ "ሀ ብታኒካ ኡንቱንቱና ደኤ" ጋደ ጉጃደ ኦዱዋ ዶማዱ። 70 ሽን ጰጽሮስ ቃይካ ካዴዳ።

ጉ ጋምእሽን፥ ማታን ኤቄዳ አሳቱ ላኤንዋ ጰጽሮሳ፥ "ኔን ቱማ ኡንቱንቱና እትፐ ደኣ፤ አያዉ ጎፐ፥ ኔን ጋሊላ ጋድያ አሳ" ያጌድኖ።

71 ሽን ጰጽሮስ፥ "ታን ሄዋ ህንተ ግያ ብታንያ ኤርከ!" ያጊደ ባረና ሸቃነ ጫቁዋ ዶሜዳ።

72 ኤለካ ኩቱ ላኤንዋ ዋስ አጌዳ፤ ጰጽሮስ ባረና የሱስ፥ "ኔን ኩቱ ላኤንዋ ዋሳናፐ ካሰ ሄዙ ገደ ታና ካዳናሳ" ጌዳዋ ሀሳዪደ፥ ዳሪ ዬኬዳ።