ማርቆሳ ምሽራቹዋ 8

የሱስ ኦይዱ ሻአ አሳ ምዜዳ

1 ሄ ዎደ፥ ጮራ አሳይ ቃይ የሱሳኮ ሺቄዳ፤ አሳዉ ምያባይ ይና፥ የሱስ ባረና ካልያዋንታ ባረኮ ጼሲደ፥ 2 "ሀ ጮራ አሳይ ታናና ሄዙ ጋላሳይ ጋካናዉ ጋምኢደ፥ ምያባ አይነ ደምቤና ድራዉ፥ ታን ኡንቱንቶ ቃረታይ። 3 ታን ኡንቱንታ ኮሻና ሶይ የዶፐ፥ ቢደ ኦግያን ዳቡሪደ ኩንዳና፤ አያዉ ጎፐ፥ እቱ እቱ ሃኮ ሳፐ ዬዳ" ያጌዳ።

4 አ ካልያዋንቱ ዛሪደ፥ "ሀ አሳይ ባይና ሳን ሀ አሳ ኡባ ምዛናዉ ግድያ ቁማ ደማናዉ ዳንዳይያዌ ኦኔ?" ያጌድኖ።

5 የሱስ ኡንቱንታ፥ "ህንተንቶ አፑን ዳቡ ደኢ?" ያጊደ ኦቼዳ።

ኡንቱንቱ፥ "ላፑ ዳቡ ደኤ" ያጌድኖ።

6 የሱስ አሳ፥ "ሳኣን ኡትተ" ያጊደ አዛዜዳ፤ ቃይ ላፑ ዳቡዋ አኪደ፥ ጾሳ ጋላቴዳ፤ ሄ ዳቡዋ መንደ፥ አሳዉ ግሻና ማላ፥ ባረና ካልያዋንቶ እሜዳ። የሱሳ ካልያዋንቱ ሄ ጮራ አሳዉ ግሼድኖ። 7 ኡንቱንቶ ቃይካ አማሬዳ ሱፓ ሞለቱ ደኢኖ፤ የሱስ ሄዋንቶካ ጾሳ ጋላቲደ፥ አሳዉ ግሻና ማላ፥ ባረና ካልያዋንታ አዛዜዳ። 8 አሳይ ኡባይ ሚደ ካልና አቴዳ ዶካይ ላፑ ዛምቤልያ ኩሜዳዋ አ ካልያዋንቱ ደንድኖ። 9 ቁማ ሜዳ አሳይ ኦይዱ ሻአ ግዳና፤ ሄዋፐ ጉይያን፥ የሱስ አሳ የዴዳ።