ዶመ 44

ዮሴፎ ብራ ዋንጫ

1 ዮሴፎ ባረ ጎለ ካፑዋ፥ "ኔን ሀ አሳቱዋ ኦጎሩ አክያዋ ኬሻ ካ ኡንቱንቶ ኩን፤ ኡንቱንቱ ኡባ ብራካ ኡንቱንቱ ኦጎሩዋ ኦጎሩዋ ዶናን ዎ፤ 2 ያታደ ዉርሰ ቴፋ ኦጎሩዋ ዶናን ታ ብራ ዋንጫነ አ ካ ብራ ዎ" ያጊደ አዛዜዳ፤ እ ዮሴፎ ጌዳዋዳን ኦዳ።

3 ሳአይ ዎንትና ሄ አሳቱ ባረንቱ ሀረቱዋ አኪደ ባናዉ ሞይዘቴድኖ። 4 ኡንቱንቱ ሄ ካታማፐ ከሲደ ሃክ ቤናን ደእሽን፥ ዮሴፎ ባረ ጎለ ካፑዋ፥ "ደንዳ! ሀ አሳቱዋ ጌዱዋ ካላ፤ ኔን ኡንቱንታ ጋኬዳ ዎደ ኡንቱንቱ፥ ‘ህንተ አያዉ ኬካ ኢታን ዛሬድቴ? 5 ሀዌ ታ ጎዳይ ኡሽያነ ቃይ ጹራባ ደምያ ዋንጫ ግደኔ? ሀዌ ህንተንቱ ኦዳባይ ባላባ’ ያጋ" ያጌዳ።

6 እ ኡንቱንቱ ጌዱዋ ጋኪደ፥ ሀ ጌዳዋዳንካ ኡንቱንቶ ኦዴዳ። 7 ሽን ኡንቱንቱ፥ "ታ ጎዳይ ሀዋ ማላ ቃላ አያዉ ሃሳዪ? ሄዋ ማላ ኦያዌ ኑፐ ነ ቆማቱዋፐ ሃኮ! 8 ኑን ሀራይ አቶ ኑ ኦጎሩዋ ዶናፐ ደሜዳ ብራ ካናነ ቢታፐ ጉየ ነዉ ዛር አሄዶ። 9 ነ ጎዳ ጎልያፐ ኑን ዎርቃ ዎይ ብራ ዎት ዉኤቶ? ነ ቆማቱዋ ግዶን ሄ ዋንጫይ ቤቴዳ ኡራይ ሀይቆ፤ ቃይ አቴዳ ኑን ኑ ጎዳዉ አይለ ግዳና" ያጌድኖ።

10 እ ኡንቱንታ፥ "ሄዋ ግዶፐ ሎአ፤ ህንተንቱ ጌዳዋዳን ዋንጫ አኬዳ ኦንነ ታ አይለ ግዳና፤ ህንኮ አቴዳ ህንተንቱ ቦርያፐ ሳሮ አታና" ያጌዳ።

11 ሄዋፐ ጉየ፥ ኡንቱንቱ ኤለካ ባረንቱ ኦጎሩዋ ኦጎሩዋ ሳኣን ዎደ ብሌድኖ። 12 ሄ ካፑ ኡባፐ ባይራትያዋ ኦጎሩዋፐ ዶሚደ ዉርሰ ቴፋ ጋካናዉ ኮዬዳ፤ ሄ ዋንጫ ቢንያማ ኦጎሩዋ ግዶፐ ደሜዳ። 13 ሄዋን ኡንቱንቱ ካዮቲደ፥ ባረንቱ ማዩዋ ፔድኖ፤ ባረንቱ ኦጎሩዋ ባረንቱ ሀረቱዋን ጫኒደ፥ ጉየ ካታማ ስሜድኖ።

14 ይሁዳይ ባረ እሻቱዋና ዮሴፎኮ ገልያ ዎደ፥ ዮሴፎ ሶን ደኤ፤ ኡንቱንቱ አ ስንን ሳኣን ጉፋኔድኖ። 15 ዮሴፎ ኡንቱንታ፥ "ህንተንቱ አያ ኢታባ ኦድተ? ታ ማላ አሳይ ጹራባ ደምያዋ ኤርክቴየ?" ያጌዳ።

16 ይሁዳይ፥ "ታ ጎዳዉ ኑን አያ ጋኔ? ኑን አያ ሃሳያኔ? ዎይ ኑን ጽሉዋ ግድያዋ ዎት በሳኔ? ጾሳይ ነ አይለቱዋ ባይዙዋ ቆንጭስ ድጌዳ። ስም ኑንካ ሄ ዋንጫይ አፐ ቤቴዳዌካ ታ ጎዳዉ አይለ ግዴዳ" ያጌዳ።

17 ሽን ዮሴፎ፥ "ሀዋ ማላ ኦያዌ ታፐ ሃኮ፤ ታ ዋንጫይ አፐ ቤቴዳ ብታንያ ጻላላይ ታ አይለ ግዳና። ህንኮ ህንተንቱ ህንተንቱ አዉዋኮ ጉየ ሳሮ ስምተ" ያጌዳ።

18 ይሁዳይ አኮ ሺቂደ አ፥ "ታ ጎዳዉ፥ ታን እት ቃላ ሃሳያና ማላ ኔና ዎሳይ፤ ታና ነ አይልያ ሀንቀቶፓ፤ አያዉ ጎፐ፥ ኔን ካትያ ማላ። 19 ኔን ታ ጎዳይ ኑና ነ አይለቱዋ፥ ‘ህንተንቶ አዉ ደኢየ ዎይ እሻይ ደኢ?’ ያጋደ ኦቻዳ። 20 ኑንካ፥ ‘ኑዉ ጭሜዳ አዉ ደኤ፤ እ ጭም ክቺደ የሌዳ ቴፋ ናአይካ ደኤ፤ ሄ ናኣ እሻይ ሀይቄዳ፤ ባረ አትዉ እት አ ጻላላይ አቴዳ፤ አ አዉ አ ሲቄ’ ያጌዳ።

21 "ኔን ነ አይለቱዋ፥ ‘ታን አ በአና ማላ ታዉ አህተ’ ያጋዳ። 22 ኑን ታ ጎዳ፥ ‘ሄ ናአይ ባረ አዉዋፐ ሻከታናዉ ዳንዳየና፤ ሻከቶፐ አ አዉ ሀይቃንታ’ ያጌዳ። 23 ሽን ኔን ነ አይለቱዋ፥ ‘ህንተ ቴፋ እሻይ ህንተናና ዱገ ያና ዮፐ፥ ላኤንዋ ታ ዴሙዋ በእክታ’ ያጋዳ። 24 ኑን ነ አይላቱ ኑ አዉዋኮ ስሚደ ቤዳ ዎደ፥ ታ ጎዳይ ጌዳዋ አዉ ኦዴዶ።

25 "ኑ አዉ፥ ‘ጉየ ቢደ አማሬዳ ካ ዎምተ’ ያግና፥ 26 ኑን አ፥ ‘ኑ ቴፋ እሻይ ኑናና ቦፐ አትን፥ ዱገ ባናዉ ዳንዳዮኮ፤ አያዉ ጎፐ፥ ኑ እሻይ ቴፋይ ኑናና ቤናዋ ግዶፐ፥ ኑን ሄ ብታንያ ዴሙዋ በአናዉ ዳንዳዮኮ’ ያጌዶ።

27 "ኑ አዉ ነ አይል ኑና፥ ‘ታ ማቻታ ራሄላ ታዉ ላኡ አቱማ ናና የሌዳዋ ህንተንቱ ኤሪታ፤ 28 ኡንቱንቱፐ እቱ ታፐ ሻከቲደ ቢና፥ "ቱሙ አ ዶአይ ፑዘሬ ሜዳ" ያጋድ፤ ሀቼ ጋካናዉ ታን አ በአበይከ። 29 ሀዋ ቃይ ህንተንቱ ታፐ ሻክ አፍና፥ ኢታባይ አ ጋኮፐ፥ ህንተንቱ ታ ፑሉን ሁጲያ ካዩዋን ዱፉዋን የጋና’ ያጌዳ።

30,31 "ሄዋ ድራዉ፥ ሀእ ታን ጉየ ነ አይልያ ታ አዉዋኮ ብያ ዎደ፥ ታ አዉ፥ ናኣ ባረ ሸምፑዋዳን ሲቅያዌ፥ ናአይ ኑናና ባይናዋ በኦፐ ሀይቂ አጋና። ኑን ነ አይለቱ ኑ አዉዋ ፑሉን ሁጲያ ካዩዋን ዱፉዋን የጌቶ። 32 ታን ነ አይል ናኣ ታ ዋሰተን አካድ፤ ታን አ፥ ‘ታ አዎ፥ ታን አ ነዉ ሳሮ ዛራደ አሀና ዮፐ፥ ታ ደኡዋ ኡባን ነ ሸቃይ ታና ጋኮ!’ ያጋ ዎድ።

33 "ያቴዳ ድራዉ፥ ታን ነ አይል ታ ጎዳዉ ናኣ ድራዉ አይለታደ፥ ሀዋን አትና፥ ናአይ ባረ እሻቱዋና ጉየ ስሞ። 34 ናአይ ባይናን ታን ዋናደ ጉየ ታ አዉዋኮ ስማኔ? ቱይት፥ ታና ታ አዉ ሴለታና ሴላ በሶፓ" ያጌዳ።