ዶመ 33

ያቆብ ኤሳና ጋከቴዳ

1 ያቆብ ቁ ግ ጼሊደ፥ ኤሳይ ባረ ኦይዱ ጼቱ አሳና ይያዋ በኤዳ። ሄዋ ድራዉ ናና ልይዉ፥ ራሄልዉነ ላኡ ቆማቱዋኮ ሻኬዳ። 2 ቆማቱዋነ ኡንቱንቱ ናና ስንን፥ ልዮነ እ ናና ኡንቱንቱ ጌዱዋን፥ ራሄሎነ ዮሴፋ ዉርሰን ዎዳ። 3 ሽን እ ባረ ሁጲያዉ ስንዉ አደ፥ ባረ እሻኮ ማቲደ፥ ሳኣ ጋክ ጋኪደ ላፑን ካላ ጎይኔዳ።

4 ሽን ኤሳይ አናና ጋከታናዉ ዎጺደ፥ አ ቆያ ቆም የሬዳ። ኡንቱንቱ ዬኬድኖ። 5 ያትና ኤሳይ ቁ ግ ጼሊደ፥ ማቻቱዋነ ናና በኤዳ፤ እ፥ "ሀ ኔናና ደእያዋንቱ ኦኔ?" ያጊደ ኦቼዳ።

ያቆብ፥ "ኡንቱንቱ ጾሳይ ነ ቆማዉ ኬካተን እሜዳ ናና" ያጌዳ። 6 ቆማቱ ባረንቱ ናናቱዋና ሺቂደ ጎይኔድኖ። 7 ሄዋፐ ጉየ፥ ልያነ እዝ ናናይ ዪደ ጎይኔድኖ፤ ዉርሰን ዮሴፎነ ራሄላ ዪደ ጎይኔድኖ።

8 ኤሳይ፥ "ሀ ስንን ታናና ጋከቴዳ ዉዲ ኡባይ ቃይ አዬ?" ያጊደ ኦቼዳ።

እ፥ "ታ ጎዳዉ፥ ሄዌ ታን ነ ስንን ናሸታናሳ" ያጌዳ።

9 ሽን ኤሳይ፥ "ታ እሻዉ፥ ታዉ ዳሮባይ ደኤ፤ ነዌ ኔሳ ግዶ" ያጌዳ።

10 ያቆብ፥ "ቱይት፥ ሀእ ታን ነ ስንን ናሸቴዳዋ ግዶፐ፥ ሀ ታን እምያዋ ታፐ አካ። ኔን ታና ሞካ አኬዳ ድራዉ፥ ታን ነ ዴሙዋ በእያዌ ጾሳ ዴሙዋ በእያዋ ማላ። 11 ታን ነዉ አሄዳ ሀ እሙዋ አካ፤ አያዉ ጎፐ፥ ጾሳይ ኬኪደ እምና፥ ታዉ በሴዳ" ያጌዳ። ያቆብ ሾብያ ቶሌዳ ድራዉ፥ ኤሳይ ሄዋ አኬዳ።

12 ሄዋፐ ጉየ ኤሳይ፥ "አነ ደንዳ፤ ኑ ኦግያ ቦይተ፤ ታን ኔናና እትፐ ባና" ያጌዳ።

13 ሽን ያቆብ አ፥ "ታ ጎዳዉ፥ ናናይ ሹጋ ግድያዋ ኤራሳ፤ ቃይ ታን ባረንቱ ጋሎ ማራቱዋ ንያ ዶርሳቱዋነ ሚዛ ናጋና ኮሼ፤ አሳይ ኡንቱንቱ እት ጋላሳ ድርቢስ ላጎፐ፥ መህያ ኡባይ ሀይቃና። 14 ሄዋ ድራዉ፥ ታ ጎዳዉ፥ ነ ቆማፐ ስንታደ ባ፤ ታን ሰኢራን ታ ጎዳ ጋካናዉ፥ ታ ስንን ደእያ መህያ ሄመታ ኬናነ ናና ሄመታ ኬና ሎዳን ካላና" ያጌዳ።

15 ኤሳይ አ፥ "ያቶፐ ታን ታ አሳፐ አማሬዳዋ ነዉ አሻይ" ያጌዳ።

ሽን ያቆብ አ፥ "ሄዌ አይሴ? ታን ታ ጎዳ ስንን ናሸትያዌ ታዉ ግዳና" ያጌዳ።

16 ሄዋ ድራዉ ኤሳይ ሄ ጋላስ ኦግያን ገሊደ፥ ሰኢራ ስሜዳ። 17 ሽን ያቆብ ሱኮታ ቤዳ፤ ያን ባረዉ ጎልያ ኬጼዳ፤ ባረ መሄቶካ ዳስያ ዳሴዳ። ሄዋ ድራዉ ሄ ሳኣ ሱኮታ*33:17 ሱኮታ፦ ሀ ሱን ብለይ እብራዌዋን፥ "ዳስያ" ግያዋ። ጊደ ሱንዳ።

18 ያቆብ ማስጰጾምያፐ ስሜዳ ዎደ፥ ካናነ ቢታን ደእያ ሰኬመ ግያ ካታማ ሳሮተን ጋኬዳ፤ እ ሄ ካታማዉ ባዙዋን ኡቴዳ። 19 ባረ ዱንካንያ ጌዳ ጋድያ ሸኬማ አዉዋ ሀሞራ ናናቱዋፐ ጼቱ ጻጋራ ብራን ሻሜዳ።✝33:19ኢያሳ 24:32፤ ዮሃ. 4:5 20 ያን ያርሽያ ሳኣ ኬጺደ አ፥ "ጾሳ፥ እስራኤልያ ጾሳ" ጊደ ሱንዳ።