ዶመ 23

ሳር ሀይቁዋ

1 ሳራ ጼታነ ላታማነ ላፑን ላይ ደኣዱ። 2 ሄዋፐ ጉየ እዛ ካናነ ጋድያን ደእያ (ከብሮነ ግያ) ቅርያት-አርባአ ካታማን ሀይቃዱ። አብራሃመ ሳርዉ ዬካናዉነ ካዮታናዉ ቤዳ።

3 ዬክ ስሚደ፥ አብራሃመ ባረ ማቻት አሃ ማታፐ ደንድ ቢደ፥ ሂተቱዋ ሀዋዳን ያጌዳ፤ 4 "ታን ህንተንቱ ግዶን በተነ እማ፤ ታ ማቻት አሃ ሞጋናዉ ታዉ ህንተንቱ ጋድያፐ ዱፉዋ ዛልኤርክቴ!" ያጌዳ።✝23:4 እብራ. 11:9፣ 13፤ ኪታ 7:16

5,6 ሂተቱ አዉ፥ "ጎዳዉ፥ ኑን ኦድያዋ ስሳ፤ ኔን ኑ ግዶን ዎልቃማ ካፑዋ፤ ኔን ነ ማቻት አሃ ኑ ዱፉዋፐ ነዉ ሎኤዳዋን ሞጋ፤ ኔን ነ ማቻት አሃ ሞጋናዉ ባረ ዱፉዋ ኦንነ ኔና ድገና" ያግ ዛሬድኖ።

7 ያግና አብራሃመ ደንድ ኤቂደ፥ ሂተቱዋ ስንን ጎይኔዳ። 8,9 እ ኡንቱንቶ፥ "ህንተንቱ ታና፥ ‘ነ ማቻት አሃ ሞጋ’ ጎፐ ስስተ፤ ጾሃራ ናኣ ኤፍሮናዉ አ ጋድያ ጋጻን ደእያ ማክጴላ ግያ ጎንጎሉዋ ታዉ ዱፉዋ ከሳናዉ ዛልአና ማላ ኩመን ጋትያን ኑና ዛልእሴርክተ" ያጌዳ።

10 ሂትያ ኤፍሮነ ሄ ዎደ ካታማ ፐንግያን ሺቄዳ ባረ አሳ ግዶን ኡቴዳ፤ ሂተቱ ኡባይ ስስሽን፥ አብራሃመዉ ያጌዳ፤ 11 "ሄዋዳን ግደና፤ ታ ጎዳዉ፥ ታ ኦድያዋ ስሳ፤ ታን ጋድያካ አ ግዶን ደእያ ጎንጎሉዋካ ነዉ እማይ፤ ታን ነዉ አ ታ አሳ ስንን እማይ፤ ኔን ነ ማቻት አሃ ሞጋ" ያጌዳ።

12 አብራሃመ ሄ ጋደ አሳ ስንን ዛረ ጎይኔዳ፥ 13 አሳይ ስስሽን ኤፍሮና፥ "ታ ኦድያዋ ስሳርኪ! ታን ሄ ጋድያ ጋትያ ጭጋና፤ ኔን ታፐ አካርኪ! ሄዋን ታን ታ ማቻት አሃ ሞጋና" ያጌዳ።

14,15 ኤፍሮነ አብራሃመዉ ዛሪደ፥ "ታ ጎዳዉ፥ ታን ኦድያዋ ስሳ፤ ጋዲ ኦይዱ ጼቱ ጻጋራ ብራ*23:14-15 ኦይዱ ጼቱ ጻጋራ ብራ፦ ሀዌ ኦይዱ ኪሎ ግራመነ ባካ ዴጼ። ከስያዋ፤ ሽን ሄዌ ነ ግዶንነ ታ ግዶን አይነ ግደና፤ ነ ማቻት አሃ ሞጋ" ያጌዳ። 16 አብራሃመ ሂተቱ ስስሽን፥ ኤፍሮነ ጌዳ ጋትያ ማዬዳ፤ ሄ ዎደ ሻሉዋን ኦይዱ ጼቱ ጻጋራ ብራ ኤፍሮናዉ እሜዳ።

17 ማምረ ካታማ ማታን ማክጴላን ደእያ ኤፍሮና ጋዲ፥ ሄዋን ደእያ ጎንጎሉነ ሄ ጋድያን ደእያ ም ኡባይ፥ 18 ካታማ ፐንግያን ሺቄዳ ሂተቱዋ ኡባ ስንን ህግያን አብራሃመ ጋደ ግዴዳ።

19 ሄዋፐ ጉየ፥ አብራሃመ ባረ ማቻቶ ሳሮ ካናነ ጋድያን (ከብሮነ ግያ) ማምረ ካታማ ማታን ደእያ ማክጴላ ግያ ጋደ ጎንጎሉዋን ሞጌዳ። 20 ሄዋ ድራዉ ሄ ጋዲነ ሄዋን ደእያ ጎንጎሉ ሂተቱዋ ስንን ህግያን አብራሃመዉ ዱፉዋ ግዴዳ።