ዮሴፎ ቃሹዋ አሳቱዋ አኩሙዋ ብሌዳ
1 አማሬዳ ዎድያፐ ጉየ፥ ግብጼ ካትያው ኤሳ ትግያዌነ ኡክ ኡክያዌ ባረንቱ ጎዳ ግብጼ ካትያ ናቄድኖ። 2 ካቲ ኤሳ ትግያዋንቱ ካፑዋነ ኡክ ኡክያዋንቱ ካፑዋ ላኡዋካ ሎይ ሀንቀቴዳ። 3 ዮሴፎ ቃሸቴዳ ቃሾ ጎለን፥ ናግያዋንቱ ካፑዋ ሶን ኡንቱንታ ዎዳ። 4 ናግያዋንቱ ካፑ ኡንቱንታ ዮሴፎዉ ሼዳ፤ እ ኡንቱንቶ ኦ። ኡንቱንቱ ቃሾ ጎለን አማሬዳ ዎድያ ኡቴድኖ።
5 ግብጼ ካትያዉ ኤሳ ትግያዌነ ኡክ ኡክያዌ፥ ቃሾ ጎለን ደእያ ላአቱካ፥ እት ቃማ ዱማ ዱማ አኩሙዋ አኩመቴድኖ። ቃይ አኩሞቶ ሁጲያን ሁጲያን ኡንቱንቱ ብለይ ደኤ። 6 ዮሴፎ ዎንታ ኡንቱንቱኮ ገሌዳ ዎደ፥ ካዮት ኡቴዳዋንታ በኤዳ። 7 ሄዋ ድራዉ ባረ ጎዳ ሶን ባረናና ቃሾ ጎለን ደእያ ካትያ ኦሳንቻቱዋ፥ "ሀቼ ህንተንቱ ደሙ አያዉ ሜዴ?" ያጊደ ኦቼዳ።
8 ኡንቱንቱ አ፥ "ኑን ላኡ አኩሙዋ አኩመቴዶ፤ ሽን ኑዉ ብልያዌ ዬዳ" ያጌድኖ።
ዮሴፎ ኡንቱንታ፥ "አኩሙዋ ብለይ ጾሳዋ ግደኔየ? ህንተንቱ አኩሙዋ ታዉ ኦድተ" ያጌዳ።
9 ኤሳ ትግያዋንቱ ካፑ ባረ አኩሙዋ ዮሴፎዉ ሀዋዳን ያጊደ ኦዴዳ፤ "ታን ታ አኩሙዋን እት ዎይንያ ቱራ ታ ስንን በኣድ። 10 ቃይ ሄ ዎይንያ ቱራዉ ሄዙ ታሺ ደኤ። እ ማራ የሊደ፥ ጪሻ ጪሺደ፥ ዉርጩዋ ዉርጬዳ፤ ዉርጩነ ቴሬዳ። 11 ካትያ ዋንጫይ ታ ኩሽያን ደኤ፤ ታን ዎይንያ ቴራ አካደ፥ ካትያ ዋንጫን ጉምኣደ፥ ሄ ዋንጫ አ ኩሽያን ዎድ" ያጌዳ።
12 ዮሴፎ፥ "ሄዋ ብርሸይ ሀዋ፤ ሄዙ ታሸቱ ሄዙ ጋላሳቱዋ። 13 ሄዙ ጋላሳ ግዱዋን ካቲ ኔና ደንና፤ እ ኔና ካሰ ነ ሱንተዉ ዛራና፤ ካሰ ኔን ኤሳ ትግያ ዎደ ኦዳዋዳን፥ ኔን ካትያ ዋንጫ አ ኩሽያን ዎና። 14 ሽን ነዉ ሳአይ ሎኤዳ ዎደ ታና ዶጎፓ፤ ታዉ ሎአ፤ ታባ ካትያዉ ኦዳደ፥ ሀ ቃሾ ጎልያፐ ታና ከስሳ፤ 15 አያዉ ጎፐ፥ ታና እብራዌቱዋ ቢታፐ ግዲደ አሄድኖ፤ ሀራይ አቶ ሀዋንካ ታና ቃሽስያዋ አይነ ኦበይከ" ያጌዳ።
16 ኡክ ኡክያዋንቱ ካፑ ዮሴፎ አኩሙዋ ሎይ ብሌዳዋ በኤዳ ዎደ ዮሴፎ፥ "ታንካ አኩሙዋ አኩመታድ፤ ታ ሁጲያን ሄዙ ሳምፓ ኡክይ ደኤ፤ 17 ቦላ ባጋ ሳምፓን ግብጼ ካትያዉ ኡከቴዳ ኡባ ቆሞ ኡክይ ደኤ። ሽን ካፉ ሄዋ ታ ሁጲያን ደእያ ሳምፓፐ ሜ" ያጌዳ።
18 ዮሴፎ፥ "ሄዋ ብርሸይ ሀዋ፤ ሄዙ ሳምፓቱ ሄዙ ጋላሳቱዋ። 19 ሄዙ ጋላሳ ግዶን ካቲ ኔና ደንና፤ ነ ቆያ ሙጭሲደ ምን ካቅሳና፤ ነ አሹዋካ ካፉ ማና" ያጌዳ።
20 ሄዘን ጋላሳን ግብጼ ካቲ ባረ የለቴዳ ጋላስ ባረ ኦሳንቻቱዋ ኡባዉ ባላ ጊግሴዳ። ኤሳ ትግያዋንቱ ካፑዋነ ኡክ ኡክያዋንቱ ካፑዋ ደንደ፥ ባረ ኦሳንቻቱዋ ግዶን ኤሴዳ። 21 ኤሳ ትግያዋንቱ ካፑዋ አ ሱንተዉ ዛርና፥ እ ካትያ ኩሽያን ዋንጫ ዎዳ። 22 ሽን ካቲ ኡክ ኡክያዋንቱ ካፑዋ ኡንቱንቱ አኩሙዋ ብለ ዮሴፎ ኦዴዳዋዳንካ ካቅሴዳ። 23 ሽን ኤሳ ትግያዋንቱ ካፑ ዮሴፎ ሀሳይቤና፤ ዶጊሼዳ።