ባሻ ሃይ ሾሬዳ
1 ሽን ጾሳይ ኖሀ፥ አናና ማርካብያ ግዶን ደእያ ዶኣ ኡባነ መህያ ኡባ ቆፔዳ፤ ሳኣ ቦላን ጫርኩዋ ጫርክሴዳ፤ ሄ ሃይ ዎ ዎ ቤዳ። 2 ቃይ ቢታ ግዱዋን ደእያ ጪሙዋ ፑልቱነ ሳሉዋን ደእያ ሃ ፐንገቱ ጎርደቴድኖ፤ እራይካ ሳሉዋን ኤቄዳ። 3 ያትና ሃይ ዎ ዎ ቤዳ። ሄ ጼታነ እሻታሙን ጋላሳፐ ጉየ፥ ሃይ ዎዳ። 4 ሃይ ዎና ማርካቢ ላፑን አግናን፥ ታማነ ላፑን ጋላሳን አራራተ ግያ ደረቱዋ ቦላ ኡቴዳ። 5 ሃይ ታማን አግናይ ጋካናዉ ዎ ዎ ቤዳ፤ ታማን አግናዉ ኮይሮ ጋላስ ደረቱ ጼራይ ቤቴዳ።
6 ኦይታሙ ጋላሳፐ ጉየ፥ ኖሄ ባረ ኬጼዳ ማርካብያ ማስኮትያ ዶዬዳ፤ 7 ያቲደ እት ቁሩዋ ካረ የድና፤ ቁሩ ሃይ ቢታ ቦላፐ መላና ጋካናዉ፥ ያነ ሃነ ፓሊደ ጋምኤዳ። 8 ቃይ ኖሄ ሃይ ቢታ ቦላፐ ዎ ዉሬደንቶነ በአናዉ እት ሀራጳቶ ካረ የዴዳ፤ 9 ሽን ሄ ሀራጳታ ሃይ ቢታ ኡባ ቦላን ሀእካ ደእያ ድራዉ፥ ሸምፕያ ሳኣ ደማበይኩ። ሄዋ ድራዉ ስማደ፥ ማርካብያ ግዶን ደእያ ኖሄኮ ያዱ፤ እ ባረ ኩሽያ የዲደ፥ ባረኮ ማርካብያ ግዶ አኬዳ።
10 ሄዋፐ ጉየ፥ ሀራ ላፑን ጋላሳ ጋምኢደ፥ ዶጎማቶ ዛሪደካ ማርካብያ ግዶፐ ከሲደ የዴዳ። 11 ሄ ሀራጳታ ሳአይ ኦማርስያ ዎደ አኮ ስማደ ያዱ፤ ዎጋራ ማላትያ ምፐ ዱዳ እርጻ ሀይ ባረ ዶናን ሳአ አካደ ያዱ። ሄዋ ድራዉ፥ ሃይ ቢታ ቦላፐ ዎዳዋ ኖሄ ኤሬዳ። 12 ቃይ ኖሄ ሀራ ላፑን ጋላሳ ጋምኢደ፥ ሄ ሀራጳቶ ዛረደ የዴዳ፤ ሽን ሄ ሀራጳታ አኮ ስማደ ያበይኩ።
13 ኖሄ ኡሱፑን ጼታነ እት ላይ ደእና፥ ኮይሮ አግናን ኮይሮ ጋላስ፥ ሃይ ቢታ ቦላፐ ጽኤዳ፤ ኖሄ ማርካብያ ቁምእያ ዶይ ጼሊደ፥ ቢታይ ጽኤዳዋ በኤዳ። 14 ላኤን አግናን ላታማነ ላፑን ጋላሳን፥ ቢታይ ሙለ መሌዳ።
15 ጾሳይ ሄ ዎደ ኖሀ ሀዋዳን ያጊደ አዛዜዳ፤ 16 "ኔን ነ ማቻቶ፥ ነ አቱማ ናናነ ነ ናና ማቻቱዋ አካደ ማርካብያ ግዶፐ ከሳ። 17 ኡንቱንቱ የለቲደ፥ ዳሪደ ጮራና ማላ፥ ሸምፑ ደእያ መታ ኡባፐ ኔናና ደእያዋንታ: ካፎቱዋ፥ መሄቱዋ፥ ዶአቱዋነ ቢታና ጎሸትያ ኡባ ኔናና ከሳ" ያጌዳ። 18 ኖሄ ባረ አቱማ ናናቱዋናኔ፥ ባረ ማቻትናነ ባረ ናና ማቼቱዋና ማርካብያ ግዶፐ ከሴዳ። 19 መህያነ ዶኣ ኡባይ፥ ቢታና ጎሸትያ መታ ኡባይ፥ ካፉዋ ኡባይነ ሳኣ ቦላን ዎጽ ቃጽያባ ኡባይ ባረ ቆሙዋን ቆሙዋን ማርካብያ ግዶፐ ከሴድኖ።
20 ኖሄ መና ጎዳዉ ያርሽያ ሳኣ ግምቤዳ፤ ጌሻ መህያነ ዶኣ ኡባፐነ ጌሻ ካፉዋ ኡባፐ አኪደ፥ ያርሽያ ሳኣን ጹጊደ ያርሼዳ። 21 ያትና መና ጎዳይ ያርሹዋ ፔኑዋ ሳዊያዋ ስንጊደ፥ ባረ ዎዛናን ሀዋዳን ያጌዳ፤ "ናአተፐ ዶምና፥ አሳይ ዎዛናን ቆፕያባይ ኡባይ ኢታ ግዶፐነ፥ ታን አሳ ድራዉ ጋደ ላኤን ኡባካ ሀ ሳኣ ሸቂከ። ቃይ ታን ሀእ ኦዳዋዳን ፓጻ ደእያ መታ ኡባ ላኤን ኡባካ ይስከ። 22 ሀ ሳአይ ደኤዳ ኬሻ ኡባን፥ ዘርያ ዎዲነ ጫክያ ዎዲ፥ ሜጉነ ሆምቢ፥ ቦኒነ ባልጉ፥ ጋላሳይነ ቃማይ ኡባደካ ደአና" ያጌዳ።