ዶመ 25

አብራሃመ ሀራ ናና የሌዳ

1 ቃይ አብራሃመ ቃጹሮ ጌተትያ ሀራ ማቻቶ አኬዳ። 2 እዛ ዚምራና፥ ዮቅሻና፥ ማዳና፥ ምድያማ፥ ይሽባቃነ ሹሀ አዉ የላዱ።

3 ዮቅሻን ሳባነ ዳዳና የሌዳ። ዳዳን አሾረታ፥ ለጹሸታነ ለኣማታ የሌዳ።

4 ምድያማ ናናይ አፋ፥ አፋደ፥ ሀኖካ፥ አቢዳአነ ኤልዳአ። ሀዋንቱ ኡባይካ ቃጹር ናና።

5 አብራሃመ ባረዋ ኡባ ይሳቃ ላትሴዳ። 6 ሽን እ ብሮ ፓጻ ደኢደ፥ ባረ ሀራ ማቻቱዋፐ የሌዳ ናናቶ ባረዉ ደእያዋፐ ዎይቴዳ። ባረ ናኣ ይሳቃፐ ኡንቱንታ ሻክ፥ አዋይ ዶልያ ባጋ ቢታዉ የዴዳ።

አብራሃመ ሀይቁዋ

7 አብራሃመ ሙለ እት ጼታነ ላፑን ታማነ እቼሹ ላይ ደኤዳ። 8 አብራሃመ ዳሮ ዎድያ ደኢደ፥ ሎኦ ጭሚደ ሀይቄዳ፤ ባረ ማይዛቱዋና ጋከቴዳ። 9 አ ናናይ ይሳቅነ እስማኤል አ ማክጴላ ግያ ጎንጎሎ ዱፉዋን ሞጌድኖ፤ ሄ ጎንጎሉ ማምረ ማታን፥ ሂትያ ጾሃራ ናኣ ኤፍሮና ጋድያን ደኤ። 10 ሄዌነ አብራሃመ ሂተቱዋፐ ሻሜዳ ጋድያ። አብራሃመ ባረ ማቻታ ሳራ ሞገቴዳ ሳኣን ሞገቴዳ።✝25:10 ዶመ 23:3-16 11 አብራሃመ ሀይቄዳዋፐ ጉየ፥ ጾሳይ አ ናኣ ይሳቃ አንጄዳ። ሄ ዎደ ይሳቅ፥ "ታና በእያ ደኡዋ ጾሳ ፑልቱዋ" ግያ ፑልቱዋ ማታን ደኤ።

እስማኤላ የለታ

12 ሳር አይላታ፥ ግብጼፐ ዬዳ አጋራ፥ አብራሃመዉ የሌዳ ናኣ እስማኤላ የለታይ ሀዋፐ ካሊደ ጻፈቴዳዋ። 13 እስማኤላ ናናይ ባረንቱ ሱንንነ ባረንቱ የለታ ማራን ሀዋንታ፤ ሄዋንቱነ: ናባዮታ፥ ቄዳራ፥ አድብኤላ፥ ምብሳማ፥ 14 ምሽማአ፥ ዱማ፥ ማሳ፥ 15 ሀዳዳ፥ ቴማ፥ ይጹራ፥ ናፊሻነ ቄድማ። 16 እስማኤላ ናናይ ሀዋንታ፤ ኡንቱንቱ ሱንይ ኡንቱንቱ ሞንነ ደእያ ሳኣን ሀዋ። ኡንቱንቱ ባረንቱ ያራን ታማነ ላኡ ካፓቱዋ። 17 እስማኤል ሙለ ጼታነ ሀታማነ ላፑን ላይ ደኢደ፥ ሀይቄዳ፤ ባረ ማይዛቱዋና ጋከቴዳ። 18 እስማኤላ ዛራቱ ግብጼፐ አዋይ ዶልያ ባጋን ደእያ ሀዊላፐነ ሹራፐ ግዱዋን፥ አሶራ አፍያ ኦግያ ማታን ደኤድኖ። ኡንቱንቱ ባረንቱ እሻቱዋ ኡባና ሞርክያን ደኤድኖ።

ያቆብነ ኤሳይ የለቴዳ

19 አብራሃማ ናኣ ይሳቃ የለታይ ሀዋፐ ካሊደ ጻፈቴዳዋ። አብራሃመ ይሳቃ የሌዳ። 20 ይሳቃዉ ላይይ ኦይታሙዋ ግዴዳ ዎደ፥ ርብቆ አኬዳ፤ እዛ ማስጰጾምያን ደእያ ሶርያ ባቱኤላ ናትዉነ ሶርያ ላባና ምቻቶ። 21 ይሳቅ ባረ ማቻታ ማንቶ ግዴዳ ድራዉ፥ እዝዉ መና ጎዳ ዎሴዳ፤ መና ጎዳይ አ ዎሳ ስሴዳ። ያትና አ ማቻታ ርብቃ ሻሃራዱ። 22 ሽን እዝ ኡሎ ግዶን ደእያ ናናይ ማንተ ግድ ኡቲደ፥ እቱ እቱዋና ሱገቴድኖ፤ ያትና እዛ፥ "ሀዌ ታዉ አያዉ ሀኒ?" ያጋዱ። ሄዋ ድራዉ መና ጎዳ ኦቻናዉ ባዱ።

23 መና ጎዳይ እዝዉ፥✝25:23 ሮመ 9:12

"ነ ኡሉዋን ላኡ ካዉተይ ደኤ፤

ቃይ ነ ግዱዋን ደእያ ላኡ ጋደ አሳቱ እቱ እቱዋፐ ሻከታና፤

እት ጋደ አሳቱ ህንኮቱዋፐ ምናና፤

ቃይ ባይራይ ቴፋዉ አዛዘታና" ያጌዳ።

24 እዛ የልያ ዎዲ ጋክና፥ እዝ ኡሉዋን ማንተ አቱማ ናናይ ደኢኖ። 25 ኮይሮ የለቴዳዌ አርሳ፤ አ ቦላ ኡባ እስኪ ማዬዳ፤ ሄዋ ድራዉ ኡንቱንቱ አ ኤሳዉ*25:25 ኤሳዉ፦ ሀ ሱን ብለይ፥ "እስካማ" ግያዋ። ጊደ ሱንድኖ። 26 ሄዋፐ ጉየ፥ አ እሻይ የለቴዳ፤ እ ባረ ኩሽያን ኤሳዉ ግንድያ ኦይቂ ኡቴዳ፤ ሄዋ ድራዉ አ ያቆባ*25:26 ያቆብ፦ ሀ ሱን ብለይ፥ ግንድያ ኦይቂያዋ ግያዋ። ጊደ ሱንድኖ። ርብቃ ኡንቱንታ የሌዳ ዎደ፥ ይሳቃዉ ኡሱፑን ታሙ ላይ ግዴዳ።

27 ናናይ ድጬድኖ፤ ኤሳይ ሻንካ ሂላ ኤርያ ባዙዋ አሳ ግዴዳ፤ ሽን ያቆብ ዱንካንያን ደእያ ዎፓ አሳ ግዴዳ። 28 ይሳቅ ኤሳ ሲቄዳ፤ አያዉ ጎፐ፥ እ ሻንካቴዳባፐ ማናዉ ዶሴዳ፤ ሽን ርብቃ ያቆባ ሲቃዱ።

29 እት ገደ ያቆብ ዎጽያ ካሽን፥ ኤሳይ ኮሻይ ዎዳዌ፥ ዎራፐ ዬዳ። 30 ኤሳይ ያቆባ፥ "ታና ሀ ዞኦ ዎጽያፐ ምዛ፤ ታና ኮሻይ ዎዳ" ያጌዳ። (ሄዋ ድራዉ ቃይ አ ሱንይ ኤዶማ*25:30 ኤዶማ፦ ሀ ሱንይ እብራዌዋን፥ "ዞኡዋ" ግያዋ። ጌተቴዳ)።

31 ያቆብ አ፥ "ኮይሮ ታዉ ነ ባይራተ ዛልአ" ያጌዳ።

32 ኤሳይ፥ "በአ! ታን ሀይቃና ሀናይ፤ ሀ ባይራተይ ታዉ አያ ጎእ ደኢ?" ያጌዳ።

33 ያቆብ ዛሪደ፥ "አነ ታዉ ኮይሮ ኔን ጫቃ"✝25:33 እብራ. 12:16 ያጌዳ።

እ ጫቄዳ፤ ባረ ባይራተ ያቆባዉ ዛልኤዳ። 34 ያቆብ ኤሳዉ ሶሉዋነ ምስርያ ዎጽያ እሜዳ፤ እ ሜዳነ ኡሼዳ፤ ሄዋፐ ጉየ ደንዲደ ቤዳ። ኤሳይ ባረ ባይራተ ሀዋዳን ካዳ።