ዶመ 48

ምናሳነ ኤፍሬማ

1 ሄዋፐ ጉየ አሳይ ዮሴፎዉ፥ "ነ አዉ ሳከቴዳ" ያጊደ ኦዴዳ። እ ባረ ላኡ አቱማ ናና ምናሳነ ኤፍሬማ አኪደ ቤዳ። 2 አሳይ ያቆባ፥ "በአ፤ ነ ናአይ ዮሴፎ ኔኮ ዬዳ" ያጌዳ፤ እስራኤሊ ምነቲደ ባረ ሂጻን ኡቴዳ።

3 ያቆብ ዮሴፎ፥ "ኡባ ዳንዳይያ ጾሳይ ካናነ ቢታን ሎዛ ግያ ሳኣን ታዉ ቆንጪደ፥ ያን ታና አንጄዳ።✝48:3-4 ዶመ 28:13-14 4 እ ታና፥ ‘ታን ኔና የለትሳናነ ጮርሳና፤ ታን ኔና ዳሮ ደረ ኦና። ሀ ቢታ ታን ኔፐ ጉየ፥ ነ ዘረዉ መና ላታ ኦደ እማና’ ያጌዳ።

5 "ስም ሀእ፥ ነ ላኡ አቱማ ናናይ፥ ታን ኔኮ ሀዋ ያናፐ ካሰ ግብጼን ነዉ የለቴዳዋንቱ ታዋንታ፤ ኤፍሬምነ ምናሰ ታዉ ሮቤላነ ስሞና ማላ። 6 ኡንቱንቱፐ ጉየ ነዉ የለቴዳዋንቱ ነዋንታ፤ ኡንቱንቱ ላታና ቢታይ ኤፍሬማነ ምናሳ ሱንን ግዶ። 7 ታን ማስጰጾምያፐ ስምሽን፥ ኤፍራታ ጋካናዉ ላፋ አሽያ ዎደ፥ ራሄላ ካናነ ቢታን ሀይቃዱ። ታን እዞ ቤተሌመ ግያ ኤፍራታ አፍያ ኦግያ ዶናን ሞጋድ" ያጌዳ።✝48:7 ዶመ 35:16-19

8 እስራኤሊ ዮሴፎ አቱማ ናና ላአቱዋ በኤዳ ዎደ፥ "ሀዋንቱ ኦኔ?" ያጊደ ኦቼዳ።

9 ዮሴፎ ባረ አዉዋ፥ "ሀዋንቱ ጾሳይ ታዉ ሀዋን እሜዳ ታ ናና" ያጌዳ።

እስራኤሊ፥ "ታን ኡንቱንታ አንጃና ማላ፥ ኡንቱንታ ታኮ ሃ ሺሻ" ያጌዳ።

10 እስራኤሊ ጭምና አ አይፊ ላባኔዳ ድራዉ፥ ጼላናዉ ዳንዳየና። ሄዋ ድራዉ ዮሴፎ ባረ አቱማ ናና አኮ ሺሽና፥ አ አዉ ኡንቱንታ እድሚደ የሬዳ። 11 እስራኤለ ዮሴፋ፥ "ታን ነ ዴሙዋ በአና ጋደ ቆፓበይከ፤ ሽን ጾሳይ ሄኮ ነ ናናካ ታና በሴዳ" ያጌዳ። 12 ዮሴፎ ኡንቱንታ አ ጉልባታፐ ደንደ፥ ባረ ዴሙዋ ሳኣ ጋደ ጎይኔዳ።

13 ዮሴፎ ባረ ላኡ አቱማ ናና፥ ኤፍሬማ ባረ ኡሸቻ ባጋን እስራኤልያዉ ሀድርሳ ባጋና፥ ምናሳ ባረ ሀድርሳ ባጋን እስራኤልያዉ ኡሸቻ ባጋና አኪደ፥ አኮ ሺሼዳ። 14 ኤፍሬመ ቴፋ ግዶፐነ፥ እስራኤሊ ባረ ኡሸቻ ኩሽያ የዲደ አ ሁጲያን ዎዳ፤ ቃይ ምናሰ ባይራ ግዶፐነ፥ እስራኤሊ ባረ ኩሽያ የዲደ፥ ባረ ሀድርሳ ኩሽያ ምናሰ ሁጲያን ዎዳ።

15 ሄዋፐ ጉየ፥ ያቆብ ዮሴፋ ሀዋዳን ያጊደ አንጄዳ፤

"ታ አዎቱ አብራሃመነ ይሳቅ

አ ስንን ሄመቴዳ ጾሳይ፥

ታ ደኡዋ ኡባን ሀቼ ጋካናዉ

ታና ሄሜዳ ጾሳይ፥

16 ኢታባ ኡባፐ ታና አሼዳ ኪታንቻይ፥

ሀ ናና አንጆ።

ታ ሱንይነ

ታ አዎቱዋ አብራሃማነ ይሳቃ ሱንይ ኡንቱንቱን ጼሰቶ።

ኡንቱንቱ ሳኣ ቦላን ጮራትኖ" ያጊደ አንጄዳ።

17 ዮሴፎ ባረ አዉ ባረ ኡሸቻ ኩሽያ ኤፍሬማ ሁጲያን ዎዳዋ በኤዳ ዎደ ዶስቤና። ሄዋ ድራዉ፥ ኤፍሬማ ሁጲያፐ ደንደ፥ ምናሰ ሁጲያን ዎናዉ ባረ አዉዋ ኩሽያ ኦይቄዳ። 18 ዮሴፎ ባረ አዉዋ፥ "ታ አዎ፥ ሄዋ ግደና፤ ባይራይ ሀዋተ፤ ነ ኡሸቻ ኩሽያ ሀዋ ቦላ ዎ" ያጌዳ።

19 ሽን አ አዉ እጺደ አ፥ "ታን ኤራይ፤ ታ ናአዉ፥ ታን ኤራይ፤ እካ ዎልቃማ ደረ ግዳና። ግዶፐነ አ ቴፋ እሻይ አፐ አ ግታታና፤ አ ዘረይካ ዳሪ ዎልቃማ ካዉተ ግዳና" ያጌዳ።

20 እ ሄ ጋላስ ኡንቱንታ አንጂደ፥

"እስራኤላቱ አንጅያ ዎደ፥

‘ጾሳይ ህንተንታ ኤፍሬመዳንነ ምናሰዳን ኦ’

ያጊደ ህንተንቱ ሱንን አንጃና" ያጌዳ።

ኤፍሬማ ምናሰፐ ስንዬዳ።✝48:20 እብራ. 11:21

21 ሄዋፐ ጉየ እስራኤሊ ዮሴፎ፥ "ታን ሀያና ሀናይ፤ ሽን ጾሳይ ህንተናና ግዳና፤ ቃይ እ ህንተንቱ አዎቱዋ ጋድያ ህንተንታ ጉየ ዛራና። 22 ቃይ ኔና ነ እሻቱዋና ጋክያ ቢታፐ እት ሳማ ዳርሳደ ነዉ እማይ፤ ሄዌነ ታን አሞራቱዋፐ ታ ማሻንነ ታ ዎንዳፍያን አኬዳ ቢታ" ያጌዳ።