ዶመ 32

ያቆብ ኤሳና ጋከታናዉ ጊጌዳ

1 ያቆብ ደንዲደ ባረ ኦግያ ቢሽን፥ ጾሳ ኪታንቻቱ አናና ጋከቴድኖ። 2 ያቆብ ኡንቱንታ በኤዳ ዎደ፥ "ሀዌ ጾሳይ አቅያ ሳኣ" ያጊደ፥ ሄ ሳኣ ማህናይማ*32:2 ማህናይማ፦ ሀ ሱን ብለይ እብራዌዋን፥ "ላኡ ጩጉ አቅያ ሳኣ" ግያዋ። ጊደ ሱንዳ።

3 ያቆብ ሰኢራ ግያ ሳኣን፥ ኤዶማ ቢታን ደእያ ባረ እሻ ኤሳኮ ኪታ ባረፐ ስንዉ ኪቴዳ። 4 እ ኡንቱንታ ሀዋዳን ያጊደ አዛዜዳ፤ "ህንተንቱ ታ ጎዳ ኤሳዉ ጋናዌ ሀዋ፤ ‘ነ ቆማይ ያቆብ፥ "ታን ላባና ማታን ደኣደ ሀኖ ጋካናዉ ጋምኣድ። 5 ታዉ ሚዛይነ ሀሪ፥ ዶርሳይነ ዴሻይ፥ አቱማ ቆማቱነ ማጫ ቆማቱ ደኢኖ፤ ሀእ ታን ሀ ኪታ ታ ጎዳ ስንን ናሸታና ማላ ኪታድ" ያጌዳ’ ያግተ" ያጌዳ።

6 ኪተቴዳዋንቱ ያቆባኮ ስሚደ አ፥ "ኑን ነ እሻ ኤሳኮ ቤዶ፤ ሀእ እ ቃይ ኔናና ጋከታናዉ ዬ፤ አናና ኦይዱ ጼቱ አሳይ ደኤ" ያጌድኖ።

7 ያቆብ ያዪደ ባትባቴዳ፤ ባረናና ደእያ አሳ ላኡ ጭታን ሻኬዳ፤ ቃይ ባረ ዶርሳ፥ ዴሻ፥ ሚዛነ ጋሉዋ ላኡ ጭታን ሻኬዳ። 8 እ፥ "ኤሳይ ዪደ እት ጭታ ኦልያዋ ግዶፐ፥ አቴዳ ጩጉ ከስ አኮፐነ" ያጊደ ቆፔዳ።

9 ሄ ዎደ ያቆብ ሀዋዳን ያጊደ ዎሴዳ፤ "አቤት መና ጎዳዉ፥ ታ አዉዋ አብራሃመ ጾሳዉ፥ ታ አዉዋ ይሳቃ ጾሳዉ፥ ታና፥ ‘ነ ጋድያ፥ ነ ዳቦቱዋኮ ስማ፤ ታን ነዉ ሎኦባ ኦና’ ጌዳዎ፥ 10 ኔን ነ ቆማዉ ኦዳ ኬካተዉነ ቱማተዉ ኡባዉ ታን በሰናዋ። ታን ሀ ዮርዳኖሳ ሻፋ ፕኔዳ ዎደ፥ ታዉ እት ጻምኣ ጻላላይ ደኤ፤ ሽን ሀእ ታን ላኡ ጩጎ ግዳድ። 11 ታን ኔና ዎሳይ፤ ታ እሻ ኤሳ ኩሽያፐ ታና አሻ፤ አያዉ ጎፐ፥ እ ዪደ፥ ታናነ ማጫዋንታ ኡንቱንቱ ናናቱዋካ ይሳናዌንቶነ ጋደ ያያድ። 12 ሽን ኔን ታና፥ ‘ታን ነዉ ቱሙ ሎኦባ ኦና፤ ታን ነ ዘረነ ፓይዳናዉ ዳንዳየተና አባ ሻፍያ ኬሻ ኦና’ ጌዳዋ ቆፓ" ያጌዳ።✝32:12 ዶመ 22:17

13 ሄ ጋላሳ ቃማ እ ያን አቄዳ፤ ባረዉ ደእያዋ ኡባፐ ባረ እሻ ኤሳዉ እምያዋ ቆሪደ ከሴዳ፤ 14,15 እ ከሴዳዋንቱ ላኡ ጼቱ ማጫ ዴሻቱዋነ ላታሙ ዴሻ ኮለቱዋ፥ ላኡ ጼቱ ማጫ ዶርሳቱዋነ ላታሙ ዶርሳ ኮለቱዋ፥ ሀታሙ ንያ ጋሎቱዋ ኡንቱንቱ ማራቱዋና፥ ኦይታሙ ማጫ ሚዛቱዋ፥ ታሙ ኮሩማ ቦራቱዋ፥ ላታሙ ማጫ ሀረቱዋነ ታሙ አቱማ ሀረቱዋ። 16 ሀዋንታ ዉድያን ዉድያን ሻክ፥ ባረ ቆማቱዋ ኩሽያን ዎደ፥ ባረ ቆማቱዋ፥ "ታፐ ስንዉ ቢደ፥ ዉድያ ዉድያፐ ሃኩዋን ሃኩዋን ላግተ" ያጌዳ።

17 ስንን ካለያዋ፥ "ታ እሻይ ኤሳይ ኔናና ጋከቲደ ኔና፥ ‘ኔን ኦሴ? ኔን ሀቃ ባይ? ነ ስንን ደእያ መህያ ኡባይ ኦሴ?’ ያጊደ ኦችያዋ ግዶፐ፥ 18 ኔን አዉ፥ ‘ሀዋንቱ ነ ቆማ ያቆባዋ፤ ኡንቱንቱ ታ ጎዳ ኤሳዉ እማናዉ የዴዳዋንታ፤ ቃይ እካ ኑፐ ጉየና ይደኤ’ ያጋ" ያጊደ አዛዜዳ።

19 ቃይ እ ላኤን ሄዛንዋነ ዉድያ ካልያ ሀራቱዋ ኡባቱዋ ሀዋዳን አዛዜዳ፤ "ህንተንቱ ኤሳና ጋከትያ ዎደ፥ ሀንዳንካ ጊታ፤ 20 ‘ነ ቆማ ያቆብ ኑፐ ጉየና ይደኤ’ ጌናን አጎፕተ" ያጌዳ። አያዉ ጎፐ እ፥ "ታን ታፐ ስንዉ እማናዉ ኪቴዳዋን አ ዶሽሳና፤ ኦን ኤሪ፥ ሄዋፐ ጉየ ታን አናና ጋከትያ ዎደ፥ እ ታና ሞክ አካነንቶነ" ያጊደ ቆፔዳ። 21 ሄዋ ድራዉ ባረ እምያዋ ባረፐ ስንዉ የዴዳ። ሽን እ ባረ ሁጲያዉ ሄ ጋላስ ቃማ ያን አቄዳ።

ያቆብ ጾሳና ባጸቴዳ

22,23 ሄ ጋላስ ቃማ ያቆብ ደንዲደ፥ ባረ ላኡ ማቻቱዋ፥ ባረ ላኡ ቆማቱዋነ ባረ ናና ታማነ እታቱዋ አኪደ፥ ያቦቃ ግያ ፕኑዋ ጋኬዳ፤ እ ኡንቱንታ ሻፋ ፕንዳ፤ ባረዉ ደእያዋ ኡባካ ፕንደ የዴዳ፤ 24 ሽን ያቆብ ባረካ አቴዳ።✝32:24-26 ሆሰ 12:3-4

ሄ ዎደ እት አሳይ ሳአይ ዎንታና ጋካናዉ አናና ባጸቴዳ። 25 ሄ አሳይ አ ጾናናዉ ዳንዳይቤናዋ በኤዳ ዎደ፥ ያቆባዉ ሙቄቻ መቀ ቦቼዳ፤ አ ሙቄቻ መቀይ ከስ ዎዳ። 26 ያትና ብታኒ አ፥ "ሳአይ ዎንቴዳ ድራዉ፥ ታና የዳ" ያጌዳ።

ሽን ያቆብ አ፥ "ኔን ታና አንጀናን ታን ኔና የድከ" ያጌዳ።

27 ብታኒ አ፥ "ነ ሱንይ ኦኔ?" ያጊደ ኦቼዳ።

እ፥ "ያቆባ" ያጊደ ዛሬዳ።

28 ብታኒ አ፥ "ሀዋፐ ስንዉ ነ ሱንይ እስራኤልያ*32:28 እስራኤልያ፦ ሀ ሱን ብለይ እብራዌዋን፥ "ጾሳና ባጸቴዳ" ግያዋ። ጌተቶፐ አትና፥ ያቆባ ጌተቶፖ፤ አያዉ ጎፐ፥ ኔን ጾሳናነ አሳና ባጸታደ ጾናዳ"✝32:28 ዶመ 35:10 ያጌዳ።

29 ያቆብ አ፥ "ነ ሱንይ ኦኔ?"✝32:29 ዳና. 13:17-18 ያጊደ ኦቼዳ።

ሽን ብታኒ፥ "ኔን ታ ሱን አያዉ ኦቻይ?" ያጌዳ ጊደ አ አንጄዳ።

30 ሄዋ ድራዉ ያቆብ ሄ ሳኣ ጲንኤላ*32:30 ጲንኤላ፦ ሀ ሱን ብለይ እብራዌዋን፥ "ጾሳ ዴሙዋ" ግያዋ። ጊደ ሱንዳ፤ አያዉ ጎፐ እ፥ "ታን ጾሳ ባዙዋን ጼላድ፤ ግዶፐነ ታን ፓጻ አታድ" ያጌዳ። 31 እ ጲንኤላፐ ደንድያ ዎደ፥ አ ቦላ ጻልቂ ዶሌዳ። እ ባረ ሙቄቻ መቀ ድራዉ ዶጌ። 32 ያቆባ ሙቄቻ አሹዋ ማታን ቦሸቴዳ ድራዉ፥ እስራኤልያ አሳይ መህያ ሙቄቻ አሹዋ ሀቼ ጋካናዉ ሜና።