1 ኡንቱንቱ የሩሳላመ ማቲደ፥ ደብረ ዛይተ ጌተትያ ደርያ ላንቂያን ደእያ ቤተፋገ ጌተትያ ቄር ካታማ ጋኬድኖ፤ የሱስ ባረና ካልያዋንቱፐ ላኡዋ ስንዉ ኪቲደ፥ 2 ኡንቱንታ ሀዋዳን ያጌዳ፤ "ህንተንቱፐ ስንን ደእያ ቄር ካታማ ቢተ፤ ሄዋን እት ሀራታ ቃሹዋን ደኤዉኖ እዝ ማራና ህንተንቱ ብ ስሞ ሳንካ ደማንታ፤ ኡንቱንታ ብሊደ፥ ታዉ አክ ዪተ። 3 ኦንነ ህንተንታ ኦቾፐ፥ ‘ጎዳይ ሀዋንታ ኮዬ’ ያግተ፤ ኤለካ እ ኡንቱንታ የድ አጋናዋ።"* 4,5 ትምቢትያ ኦድያ ናቢ፥

"ጽዮነ ካታማ አሳዉ፥

‘በአ፥ ነ ካቲ አሽከ ግዲደ፥

ሀርያ ቦላ፥ ሀረ ማራ ቦላ ኡቲደ፥

ኔኮ ዬ’ ያግተ"

ያጊደ ሃሳዬዳዌ ፖለታና ማላ፥ ሀዌ ሃኔዳ።✝

6 አ ካልያዋንቱ ቢደ፥ የሱስ ባረንታ አዛዞዋዳን ኦድኖ። 7 ሀራቶነ ሀረ ማራ አሂደ፥ ባረንቱ ማዩዋ ኡንቱንቱ ዞክያን ዎድኖ፤ ሄዋፐ ስምና የሱስ ቶጌዳ። 8 ሄ ጮራ አሳፐ ዳርያ ባጋይ ባረ ማዩዋ ኦግያን ሂጼዳ፤ ቃይ ሀራንቱ ም ሀይ ካር ካሪደ፥ ኦግያን የጌድኖ። 9 የሱሳፐ ስንና ሀመትያ ጮራ አሳይነ ቃይ አ ጌዱዋ ካልያ ጮራ አሳይ፥ ባረንቱ ኮሻ ቁ ኦደ፥

"ዳዊታ ናአይ ጋላተቶ!

ጎዳ ሱንን ይያዌ አንጀቴዳዋ!

ጾሳይ ጋላተቶ!"

ያጌዳ።✝

10 የሱስ የሩሳላመ ካታማ ገሌዳ ዎደ፥ ካታማን ደእያ አሳይ ኡባይ፥ "ሀዌ ኦኔ?" ያጊደ ሻቢረቴድኖ።

11 አሳይ፥ "ሀዌ ጋሊላን ደእያ ናዝሬተ ጌተትያ ካታማፐ ዬዳ ናብያ የሱሳ" ያጌዳ።

12 የሱስ ጌሻ ጎልያ ገሊደ፥ ሄዋን ዛልእያዋንታነ ሻምያዋንታ ኡባ ካረ የደርሴዳ፤ ቃይ ሚሻ ላምያዋንቱ ጻራጴዛነ ዶጎሙዋ ዛልእያዋንቱ ኦይድያ ጉጵ የጊደ፥ 13 ኡንቱንታ፥ "ጾሳ ማጻፋን፥ ‘ታ ጎሊ ጾሳ ዎስያ ጎልያ ጌተታና’ ያገቲደ ጻፈት ኡቴዳ፤ ሽን ህንተንቱ አ ቦንቂያዋንቱ ቆሰትያ ጎንጎሉዋ ከሴድታ" ያጌዳ።✝

14 ቆቃቱነ ገዲ ስሌዳዋንቱ የሱሳኮ ጌሻ ጎልያ ዪና፥ እ ኡንቱንታ ፓዳ። 15 ሽን ቄሳቱዋ ካፓቱነ ህግያ ታማርስያዋንቱ የሱስ ኦያ ኦራባ በኤዳ ዎደነ፥ ጉ ናናይ ጌሻ ጎልያን ባረንቱ ኮሻ ቁ ኦደ፥ "ዳዊታ ናአይ ጋላተቶ" ያግያዋ በኤዳ ዎደ ሀንቀቴድኖ።

16 ያቲደ የሱሳ፥ "ሀዋንቱ ግያዋ ስሳይ?" ያጌድኖ።✝

የሱስ፥ "ኤ ስሳይ፤ ጾሳ ማጻፋይ፥ ‘ጉ ናናይነ ምያ ናናይ ኔና ጋላታና ማላ፥ ኡንቱንታ ኤርሳዳ’ ያግያዋ ኡባካ ናባብ በይክቴ?" ያጌዳ። 17 የሱስ ኡንቱንታ አጊደ፥ ሄ ካታማፐ ቢታንያ ጌተትያ ካታማ ቢደ፥ ያን አቄዳ።

18 የሱስ ዎንታ ጉራና ካታማ ቤዳ ድራዉ ኮሻቴዳ። 19 ኦግያ ዶናን እት ባላስያ ጌተትያ ምቶ በኢደ፥ ኢኮ ቤዳ፤ ብ ጋክያ ዎደ ሄ ምትን ሀይ ጻላላፐ አትን፥ አይፍያ አይነ ደምቤና፤ እዞ፥ "ላኤንዋ መናዉካ አይፎፓ" ያግና፥ ሄ ባላሳታ ኤለካ መላ አጋዱ።

20 አ ካልያዋንቱ ሄዋ በኢደ ማላለቲደ፥ "ሀ ባላሳታ ዋናደ እት ኩን መላ አጋዴ?" ያጌድኖ።

21 የሱስ ዛሪደ፥ "ታን ህንተንቶ ቱሙዋ ጋይ፤ ህንተንቱ አማኑ ደእያዋንታነ ስናዋንታ ግዶፐ፥ ሀ ባላሳቶ ታን ኦዳዋ ማላ ጻላላ ኦክታ፤ ሽን ሀራይ አቶ ህንተንቱ ሀ ደርያ፥ ‘ደንዳደ አባን ኩንዳ’ ግንቶካ ሀናና፤ 22 ህንተንቱ አማኒደ ጾሳ ዎስያዋ አያ ግድንቶካ አካና" ያጌዳ። ባላሲያ ም

23 የሱስ ጌሻ ጎልያ ዪደ ታማርስሽን፥ ቄሳቱዋ ካፓቱነ አይሁዳ ጭማቱ አኮ ዪደ፥ "ኔን ሀዋ ኦናዉ ነዉ አይ ማታይ ደኢ? ነዉ ሀ ማታ ኦኔ እሜዳዌ?" ያጌድኖ።

24 የሱስ ዛሪደ ኡንቱንታ፥ "ታንካ ህንተንታ እትባ ኦቻና፤ ህንተንቱ ታዉ ሄዋ ኦዶፐ፥ ታን ሀዋ አይ ማታን ኦይታንቶ፥ ህንተንቶ ኦዳና፤ 25 ዮሃንስ ጻማቅያ ማታይ ሀቃፐ ዬዴ? ጾሳፐ ዬደየ አሳፐ ዬዴ?" ያጌዳ።

ኡንቱንቱ ባረንቱ ግዱዋን ፓሉማ ዶሚደ፥ "ኑን፥ ‘ጾሳፐ ዬዳ’ ያጎፐ እ ኑና፥ ‘ያቶፐ፥ ዮሃንስ ኦዴዳዋ አያዉ አማንበይክቴ?’ ያጋናዋ። 26 ሽን ኑን፥ ‘አሳፐ ዬዳ’ ያጎፐ፥ አሳይ ኡባይ ዮሃንስ ናብያ ግዴዳዋ ኤርያ ድራዉ፥ አሳዉ ያዬቶ" ያጌድኖ። 27 ኡንቱንቱ የሱሳዉ፥ "ኑን ኤሮኮ" ያጊደ ዛሬድኖ።

የሱስ፥ "ታንካ ሀዋ አይ ማታን ኦይታንቶ፥ ህንተንቶ ኦድከ" ያጌዳ።

28 "ሽን ህንተንቱ አያ ቆፒቴ? ላኡ ናናይ ደእያ እት ብታኒ ደኤ፤ ሄ ብታኒ ባይራ ናኣኮ ቢደ፥ ‘ታ ናአዉ፥ ሀቼ ባደ ታ ዎይንያ ቱራ ኦ’ ያጌዳ። 29 ናአይ ዛሪደ፥ ‘ቢከ’ ጌዳ፤ ሽን ጉየፐ ባረ ዎዛናን ቆፕ አኪደ፥ ዎይንያ ቱራ ኦናዉ ቤዳ። 30 አዉ የኮ ናኣኮ ቢደ፥ ባይራዉ ጌዳዋዳንካ አዉ ጌዳ፤ ቴፋ ናአይ ዛሪደ፥ ‘ሎአ ታ ጎዳዉ’ ያጌዳ፤ ሽን ብቤና። 31 ሀ ላኡ ናናፐ ባረ አዉ ኮዬዳዋ ኦዳዌ ሀቃዌ?" ያጌዳ።

ኡንቱንቱ፥ "ባይራ" ያጌድኖ።

የሱስ ኡንቱንታ ሀዋዳን ያጌዳ፤ "ታን ህንተንቶ ቱሙዋ ጋይ፤ ቃራጻ አክያዋንቱነ ዎሹምያዋንቱ ህንተፐ ስንቲደ፥ ጾሳ ካዉተ ገላና። 32 አያዉ ጎፐ፥ ጻማቅያ ዮሃንስ ጽሎተ ኦግያ ታማርሲደ፥ ህንተኮ ዪና፥ እ ግያዋ አማንበይክታ። ሽን ቃራጻ አክያዋንቱነ ዎሹምያዋንቱ እ ግያዋ አማኔድኖ፤ ህንተንቱ ሀራይ አቶ ሄዋ በኢደካ፥ ህንተንቱ ናጋራፐ ስሚደ፥ እ ግይያዋ አማንበይክታ" ያጌዳ።

33 ቃይካ የሱስ ሀዋዳን ያጌዳ፤ "ሀራ ሌምሱዋካ ስስተ፤ ዎይንያ ጌተትያ ቱራ ቶኬዳ እት ብታኒ ደኤ፤ ዎይንያ ቱራ ዩሽ አደ ድሬዳ፤ ቃይ ሄ ዎይንያ ጉምእያ ኦላካ ቦኬዳ፤ ሄዋ ናግያ አሳዉ አዱሳ ሹቻ ግምቤዳ። ሄዋፐ ጉይያን፥ ኮ ኦያ አሳዉ እሚደ፥ ሀራ ጋደ ቤዳ።✝ 34 ዎይንያ አይፍያ ማጽያ ዎዲ ጋክና፥ ባረና ጋክያዋ አኪደ ያና ማላ፥ ባረ ቆማቱዋ ባረ ኮዋቱዋኮ ኪቴዳ። 35 ኮዋቱ አ ቆማቱዋ ኦይቂደ፥ እቱዋ ዎድኖ፤ ቃይ የኩዋ ሹቻን ጳልቄድኖ። 36 ቃይካ ሄ ብታኒ ካሰዋንቱፐ ዳርያ ሀራ ቆማቱዋ ኪቴዳ፤ ኮዋቱ ሄ ቆማቱዋካ ካሰዋንቱዋዳን ኦድኖ።

37 "ሽን ዉርሰን እ፥ ‘ታ ናኣ ኡንቱንቱ ቦንቻናዋንታ’ ያጊደ ባረ ናኣ ኡንቱንቱኮ ኪቴዳ።

38 "ሽን ኮዋቱ ናኣ በኢደ፥ ባረንቱ ግዱዋን፥ ‘ጋድያ ላታናዌ ሀዋ፤ ቢደ አ ዎደ፥ ጋድያ ኑን ላታና’ ያጌድኖ። 39 ናኣ ኦይቂደ፥ ዎይንያ ቱራ ግዶፐ ጋጻ ከሲደ ዎድኖ።

40 "ስም ዎይንያ ቱራ ጎዳይ ይያ ዎደ፥ ሄ ኮዋቱዋ ዎታኔ?" ያጊደ ኦቼዳ።

41 ኡንቱንቱ፥ "እ ሄ ኢታ አሳቱዋ ዎ ዉርሲደ፥ ዎይንያ ቱራይ አይፍያ ዎደ ባረና ጋክያዋ ዎድያን ሼያ ሀራ ኮዋቶ እማና" ያጌድኖ።

42 የሱስ ኡንቱንታ ሀዋዳን ያጌዳ፤

" ‘ግምቢያዋንቱ ካደ እጼዳ ሹቻይ፥

ጎዳ ጻጱዋ ምንስያ፥ ኡባፐ አያ ሹቻ ግዴዳ።

ሀዌ ጎዳይ ኦዳዋ፤

ቃይ ኑ ጼላዉካ ማላልስያዋ’

ያግያዋ ጾሳ ማጻፋፐ ኡባካ ናባብ በይክቴ?✝

43 "ሄዋ ድራዉ፥ ታን ህንተንቶ ኦዳይ፤ ጾሳ ካዉተይ ህንተፐ አከቲደ፥ ሎኦ አይፍያ እምያ አሳዉ እመታናዋ። 44 ሄ ሹቻ ቦላ ኩንድያ ኡባይ መኤረታና፤ ቃይ ሄ ሹቻይ አሳ ቦላ ኩንዶፐ፥ ሄ ኩንዴዳ ኡራ ሊቅሳና" ያጌዳ።

45 ቄሳቱዋ ካፓቱነ ፓርሳዋቱ የሱስ ኦዴዳ ሌምሱዋ ስሴዳ ዎደ፥ ባረንቱዋ ሃሳይያዋ ኤሬድኖ። 46 ኡንቱንቱ የሱሳ ኦይቃናዉ ኮዬድኖ፤ ሽን የሱሳ ዳሮ አሳይ ናብያ ጊደ ቆፕ ኡቴዳ ድራዉ፥ ሄ አሳዉ ያዬድኖ።