Neemias 4

ግምቢ ሽረት ግምበተናዳን ድጋናዉ ደንዴዳ ቆፋ

1 ኑን ግምቢያ ድርሳ ኪታ ዶሜዳዋ ሳንባላጽ ስሴዳ ዎደ ሀንቁዋ ኤጽ ከሴዳ፤ ቃይ ሎይ ይሎቲደ፥ ኑና ቅሊጬዳ። 2 ባረ ላገቱዋነ ሳማርያ ኦላንቻቱ ስንን እ ሀዋዳን ያጌዳ፤ "ሀዋንቱ፥ ሀ ፓና አይሁዳቱ አያ ኦኖ? ካታማ ዛረደ ግምባናዉ ኮዪኖየ? ያርሹዋካ ያርሻናዉ ኮዪኖ? ኦሱዋ እት ጋላስ ዉርሳናዋ ኡንቱንቶ ማላቲየ? ግምቢያዉ ሹቻ ዛር ደኡዋን ዎናዉ ዳንዳየት?"

3 አ ምይያን ኤቄዳ አሞና ጋድያ አሳ ግዴዳ ጾቢካ ቃይ ሀዋዳን ያጌዳ፤ "ኡንቱንቱ ቃይ አያነ ግምቢያ ግምባናዉ ዳንዳዪዬ? ኡንቱንቱ ግምቢያ ድርሳ ግምቢያ ቦላን ዎራካናይ ከስንቶነ ኩንድ አጋና"።

4 ሄዋፐ ጉይያን፥ ታን ሀዋዳን ያጋደ ዎሳድ፤ "ኑ ጾሳዉ፥ ኡንቱንቱ ኑና ዎት ዎት ቅሊጭንቶ ሀዋ ስሳ! ኡንቱንቱ ኑና ሸቂያ ሸቃይ ኡንቱንቱ ሁጲያን ስሞ። ባረንቶ ደእያ አቁዋ ቦንቀት ክቺደ፥ አላጋ ጋድያን ኦሞደቴዳ አሳ ግድኖ። 5 ኡንቱንቱ ናቁዋ ገንፓ፤ ኡንቱንቱ ናጋራካ ነ ስንፐ ሙለ ቁጮፓ። አያዉ ጎፐ፥ ግምቢያ ግምቢያዋንታ ኑና ሸቃን ካዉሼድኖ"።

6 ኑን ግምቢያ ድርሳ ኦሱዋ አገናን ኦዳ። ቃይ አሳይካ ኦሱዋ ምኖተን ኦያ ድራዉ፥ ግምቢያ ድርሳ ቃተይ ኤለካ ባካ ኬሻ ግድ አጌዳ።