ናህምያ ጋራተ
14 አርጸክስስ ካተቴዳ ላታማን ላይፐ ቢደ፥ ሀታማነ ላኤን ላይ ጋካናዉ፥ ታን ይሁዳ ሞድያዋ ግዳደ ሱንታድ። ሄ ታማነ ላኡ ላይን፥ ታና ግድና ዎይ ታ እሻቱ ሞድያዎ በስያ ቁማ ድርጉዋ አክበይኮ። 15 ሽን ታፐ ካሰና ሞድያዋንቱ አሳዉ ዴጾ ቶኮ ግዲደ፥ ሀቼ ሀቼ ካውነ ዎይንያ ኡሻው ኦይታሙ ጻጋራ ብራ ጭግሴድኖ። ሀራይ አቶ አይስያዋንቶ ቆማቱካ ባረንቱ አሳ ቦላን ጎዳ ማላትሲደ ጋምኤድኖ። ግዶፐነ፥ ታን ጾሳዉ ያዬዳ ድራዉ፥ ሄዋዳን ኦበይከ። 16 ታናተ ኡባ የሩሳላመ ግምቢያ ድርሳ ኦሶ እማድፐ አትን፥ ታ ሁጰው አይ ጋድያነ ሻማበይከ። ታ ቆማቱካ ኡባይ ታናና ሄ ኪታን እትፐ ጋምኤድኖ። 17 ኑ ሄራን ደእያ አይሁዳ ግደናዋንቱፐ ኑኮ ዬዳ አሳይ ባይናን ደእሽን፥ ሀቼ ሀቼ ታናና ታ ማሶፍያን ምያ አይሁዳቱነ ኡንቱንታ ካለያዋንቱ ፓይዱ ጼታነ እሻታማ። 18 ሀቼ ሀቼ እት ቦራ፥ ኡሱፑን ዶረቴዳ ዶርሳቱዋነ ዳሮ ኩቶቱዋ ሹክ ሹኪደ፥ አሳዉ ሺሽኖ፤ ቃይ ታሙ ጋላሳን እት ገደ ዳሮ ባ ዎይንያ ኤሳ ኡንቱንቶ አጊኖ። ሽን አሳ ቦላን ደእያ ቶኩ ዴጹዋ ግድያዋ ታን ኤርያ ድራዉ፥ ጋድያ ሞድያዎ በስያ ቁማ ድርጉዋ ኦቻበይከ።
19 "ታ ጾሳዉ፥ ታን ሀ አሳዉ ኦዳ ሎኦተ ኡባ ቆፓደ፥ ታዉካ ሎኦተ ኦ" ያጋድ።