1 ሄ አግናን ላታማነ ኦይደን ጋላሳን እስራኤልያ አሳይ ጾሚደ፥ ማቃ ማዪደነ ባረንቱ ሁጲያን ባና ቆሊደ፥ እት ሳኣ ሺቄድኖ። 2 ባረንታ አላጋ ጋደ አሳ ኡባፐ ሻኬድኖ። ሄዋፐ ጉይያን ደንድ ኤቂደ፥ ኡንቱንቱነ ካሰ ኡንቱንቱ አዎቱ ኦዳ ናጋራ ኡባ ፓጼድኖ። 3 ሄዋን ኡንቱንቱ ኤቂደእሽን፥ ሄዙ ሳትያ ግድያዋ መና ጎዳ ኡንቱንቱ ጾሳ ህግያ ማጻፋይ ኡንቱንቶ ናባበቴዳ። ቃይ ሀራ ሄዙ ሳትያ ግድያዋ ባረንቱ ናጋራ ፓጺድነ መና ጎዳዉ፥ ባረንቱ ጾሳዉ፥ ጎይኒደ ጋምኤድኖ።

4 ሌዋቱዋፐ አማሬዳዋንቱ ሽቁዋ ቦላን ከሲደ፥ ኮሻ ቁ ኦደ መና ጎዳኮ፥ ባረንቱ ጾሳኮ፥ ዋሴድኖ። ሄዋንቱካ ኢያሳ፥ ባና፥ ቃድምኤላ፥ ሻባንያ፥ ቡና፥ ሸረብያ፥ ባናነ ካናና።

5 ሌዋቱዋፐ ኢያሱ፥ ቃድምኤል፥ ባን፥ ሀሻባኔ፥ ሸረቤ ሆዴ፥ ሻባነነ ፓታሄ እስራኤልያ አሳ ሀዋዳን ያጌድኖ፤ "ደንድ ኤቂደ፥ መናፐ መናዉ ደእያ መና ጎዳ ህንተንቱ ጾሳ ጋላትተ! ኡባፐነ ሳባ ኡባ ቦላና ቁ ቁ ጌዳነ ቦንቼቴዳ ጾሳ ሱን ሳቢተ" ያጌድኖ።

6 ሄዋፐ ጉይያን፥ እስራኤልያ አሳይ ሀዋዳን ያጊደ ዎሴድኖ፤ "መና ጎዳዉ፥ ነ ጻላላይ ጾሳ! ኔን ሳሎቱዋነ ሳሎቱዋን ደእያ መታ ኡባ፥ ሳኣነ አ ቦላን ደእያ መታ ኡባነ አባቱዋነ ኡንቱንቱ ግዶን ደእያ መታ ኡባ መዳ፤ ኡባዉ ሸምፑዋ እማዳ። ሳሉዋ መታቱ ኡባይ ነዉ ጎይኒኖ።

7 "ኔን መታ ኡባ ጎዳ! ኔን አብራማ ኡራ ጌተትያ ካላዳዋቱ ካታማፐ ዶራደ ከሳዳ፤ አ ሱንካ ላማደ፥ አብራሃማ ያጋደ ሱንዳ።✝9:7 ዶመ 11:31፤ 12:1፤ 17:5 8 እ ነዉ አማነትያ አሳ ግድያዋ በኣደ፥✝9:8 ዶመ 15:18-21 ካናነቱ፥ ሂተቱዋ፥ አሞራዋናቱዋ፥ ፓርዛዋናቱዋ፥ ያቡሳቱዋነ ገርጌሳቱዋ ጋድያ አ ዛረቶ ላታ ጋድያ ኦደ እማናዉ አዉ ቃላ ጫቁዋ ገላዳ። ኔን ጽሎ ግድያ ድራዉ፥ ነ ጌዳ ቃላካ ፖላዳ።

9 "ኔን ካሰ ኑ ማይዛ አዎቱዋ ግብጼ ጋድያን ጋኬዳ ቱጋ በኣዳ፤✝9:9 ከሳ 3:7፤ 14:10-12 ቃይ ዞኦ አባ ጌተትያ አባ ማታን ደኢደ ኡንቱንቱ፥ ‘ኑና ማዳርኪ!’ ያጊደ ዋሴዳ ዋሱዋካ ስሳዳ። 10 ግብጼ ካቲ፥ አ ጋድያ ካፓቱነ ሄ ጋድያ አሳይ ኡባይ እስራኤልያ አሳ ቦላን ኦቶረቴዳ ድራዉ፥ ኡንቱንቱ ቦላን ማላታነ ማላልስያባ ኦዳ።✝9:10 ከሳ 7:8—12:32 ሄዋፐ ደንዴዳዋን፥ ሀቼ ጋካናዉ፥ ነ ሱንይ ቦንቹዋን ጼገታናዳን ኦዳ። 11 አባ ያነ ሃነ ሻካደ፥ ግዱዋና ነ አሳ መላ ቢታና ፕንዳ። ሽን ሹቻይ ጪሞ ሃን ኦልና፥ ጪሙዋ ዱገ ዎያዋዳን፥ ኡንቱንቱ የደርስያ ሞርከቱዋ አባን ምትሳደ ይሳዳ።✝9:11 ከሳ 14:21-29፤ 15:4-5 12 እስራኤልያ አሳ ጋላስ ሻርያ ቱሳን ካለደ፥ ቃማ ቃይ ኡንቱንቱ ሀመትያ ኦግያን ፖአና ማላ፥ ታማ ቱሳ ኡንቱንቱ ስንን ኤሳደ ካለዳ።✝9:12 ከሳ 13:21-22

13 "ኔን ሳሉዋፐ ዎደ፥ ነ አሳ ሲና ደርያ ቦላን ሃሳይሳዳ። ሱረ ፕርዳነ ቱማ ግዴዳ ህግያ ቃይ ሎኦ ዎጋነ አዛዙዋ ኡንቱንቶ እማዳ።✝9:13-14 ከሳ 19:18—23:33 14 ጌሻ ነ ሳምባታ ኡንቱንቱ ቦንቻና ማላ፥ ኡንቱንታ ታማርሳዳ። ነ ቆማ ሙሴ ባጋና ኡንቱንቶ አዛዙዋ፥ ዎጋነ ህግያ እማዳ። 15 ኡንቱንቱ ኮሻቴዳ ዎደ ሳሉዋፐ ቁማ እማዳ፤ ቃይ ኡንቱንቱ ሳመቴዳ ዎደ ዛላፐ ሃ ፑልትሳዳ። ኔን ኡንቱንቶ እማናዉ ጫቄዳ ጋድያ ገሊደ ላታና ማላ አዛዛዳ።✝9:15 ከሳ 16:4-15፤ 17:1-7፤ ዛረ. 1:21

16 "ሽን ኑ ማይዛ አዎቱ ኦቶረቴድኖ። ኦድና ስሰና ሞርግያ ኦርዶ ግዲደ፥ ነዉ አዛዘትበይክኖ።✝9:16-17 ፓይ. 14:1-4፤ ዛረ. 1:26-33 17 አዛዘተናን እጼድኖ፤ ቃይ ኔን ኡንቱንቶ ኦዳ ማላልስያባ ኡባ ሀሳይበይክኖ።✝9:17 ከሳ 34:6፤ ፓይ. 14:18 ኡንቱንቱ ሞርግያ ኦርዶ ግዴድኖ፤ ቃይ ባረንቱ ማካላፐ ደንዴዳዋን፥ ግብጼ ጋድያ ጉየ አይለተዉ ዛሪደ ካለና ማላ፥ ካፑዋ ባረንቶ ዶሬድኖ። ግዶ ሽን፥ ኔን አቶ ግያ ጾሳ፤ ኬካነ ማርያዋ። ሲቁዋን ኩሜዳዋነ ሀንቆ ኤሌለናዋ። ሄዋ ድራዉ፥ ነ ሲቁ መናሳ፤ ኔን ኡንቱንታ አጋ በይካ።

18 "ኡንቱንቱ ማራ ማላትያ ኤቃ መደ፥ ‘ህንተና ግብጼ ጋድያፐ ከሴዳ ህንተንቱ ጾሳይ ሀዋ’ ያጊደ ኔና ዎልቃማ ሸቃ ሸቆፐካ፥✝9:18 ከሳ 32:1-4 19 ነ ዳሮ ማሮተ ድራዉ፥ ኔን ኡንቱንታ ሄ ጋድያ ዎራን አጋ በይካ። ኡንቱንቱ ብያ ኦግያ ካለና ማላ፥ ጋላስ ሻርያ ቱሳይ፥ ቃይ ኡንቱንቱ ኦግያ ፖእሳና ማላ፥ ቃማ ታማ ቱሳይ ኡንቱንቱፐ ሃክቤና።✝9:19-21 ዛረ. 8:2-4 20 ኡንቱንታ ታማርሳና ማላ፥ ነ ሎኦ አያና ኡንቱንቶ እማዳ። ማናዉ ማና ኡንቱንቱ ዶናፐ ፓጭሳበይካ፤ ቃይ ኡንቱንቱ ሳሞካ ሃ እማዳ። 21 ኦይታሙ ላይ ኡባ ኡንቱንቱ ዎራን ሀመትያ ዎደ፥ ኡንቱንቶ ኮሽያባፐ እትባነ ይሳባካ። ኡንቱንቱ ማዩ ዉርቤና፤ ኡንቱንቱ ገዲካ ጋፍቤና።

22 "ባረንቱ ዛዋን ደእያ ጋጻ ቢታቱዋነ ካዉተቱዋ ኡንቱንቱ ጾኒደ ኦይቃናዳን ኦዳ።✝9:22 ፓይ. 21:21-35 ስሆና ጌተትያ ካቲ ሞድያ ሀሰቦና ጋድያነ ኦጋ ጌተትያ ካቲ ሞድያ ባሳነ ጋድያ ኡንቱንቱ ላቴድኖ። 23 ኡንቱንቱ ዘረቱዋ ፓይዱዋ ሳሉዋ ጾልንትያዳን ዳርሳዳ።✝9:23 ዶመ 15:5፤ 22:17፤ ኢያሳ 3:14-17 ካሰ ኡንቱንቱ አዋቶ ገልሳናነ ላትሳና ጋደ ኔን ኦዴዳ ጋድያ ኡንቱንታ ገልሳዳ። 24 ኡንቱንቱ ካናነ ጋድያ ላቴድኖ፤✝9:24 ኢያሳ 11:23 ሄ ጋድያን ደእያ ካናነ አሳ ኡባ ኡንቱንቱ ስንን ኔን ካዉሻዳ። ኡንቱንቱ ካናነ አሳ ቦላን፥ ኡንቱንቱ ካተቱዋ ቦላንነ ሄ ጋድያን ደእያ አሳ ኡባ ቦላን ባረንቱ ዶሴዳዋ ኦና ማላ፥ ኡንቱንቱ ኩሽያን አ እማዳ። 25 ቃይ ኡንቱንቱ ዩሹ ግምበቴዳ ካታማቱዋነ አራዳ ቢታ ጾኒደ አኬድኖ፤✝9:25 ዛረ. 6:10-11 ቃይካ ሎኦባይ ኡባይ ኩሜዳ ጎልያ፥ ቦከቴዳ ሃ ኦላቱዋ፥ ዎይንያ ቱራ ሳኣ፥ ዎጋራቱዋነ ሀራ አይፍያ እምያ ዳሮ ምቱዋ ላቴድኖ። ሄዋፐ ም ካሊደ ኦርዴድኖ፤ ነ ዎልቃማ ኬካተን ኡንቱንቱ ናሸቴድኖ።

26 "ግዶፐካ፥ ነ አሳቱ አዛዘተናን እጺደ፥ ነ ቦላን ማካሌድኖ፤✝9:26-28 ዳና. 2:11-16 ነ ህግያዉካ ዞኪያ ዛሬድኖ። ኔኮ ኡንቱንቱ ስማናዳን ኡንቱንቶ ምንሲደ ኦዴዳ ትምቢትያ ኦድያዋንታ ዎድኖ። ሎይ ዎልቃማ ሸቃ ኔና ሸቄድኖ። 27 ሄዋፐ ደንዴዳዋን ኡንቱንታ ኡንኤያ ሞርከቱዋ ኩሽያን አ እማዳ፤ ሞርከቱ ኡንቱንታ ኡንኤዳ ዎደ ኔኮ ዋሴድኖ። ኡንቱንቱ ዋሱዋ ሳሉዋን ግዳ ስሳደ ነ ማሮተ ዳሩዋዳን፥ ኡንቱንታ ኡንቱንቱ ሞርከቱዋ ኩሽያፐ አሽያዋንታ ኪታዳ።

28 "ሽን ኡንቱንቱ ሸምፑዋ ደሚደ ዛረደ፥ ነ ስንን ናጋራ ኦድኖ። ኔንካ ዛራደ ኡንቱንቱ ሞርከቱዋ ኩሽያን አደ እምና፥ ኡንቱንቱ ሞርከቱ ኡንቱንታ ሞደድኖ። ሽን ሀእካ ኡንቱንቱ ኔኮ ዋስና፥ ኡንቱንቱ ዋሱዋ ሳሉዋን ግዳደ ስሳዳ። ነ ማሮተን ኡንቱንታ ዛራ ዛራደካ አሻ አካዳ።

29 "ነ ህግያኮ ኡንቱንቱ ስማና ማላ፥ ኔን ኡንቱንቶ ምንሳደ ኦዳዳ፤✝9:29 ዎጋ 18:5 ሽን ኡንቱንቱ ኦቶረቴድኖ፤ ነ አዛዙዋካ እጼዶ ያጌድኖ። አሳይ አዛዘቶፐ ደኡዋ ደምያ ነ ህግያ አድኖ፤ ቃይ ሞርግያ ኦርዶ ግድ፥ ነዉ ዞኪያ ዛሪደ፥ አዛዘተናን እጼድኖ። 30 ግዶፐነ፥ ዳሮ ላይ ኡንቱንታ ዳንዳያዳ፤✝9:30 2 ካታ. 17:13-18፤ 2 ኦዱዋ 36:15-16 ትምቢትያ ኦድያዋንቱ ባጋና ነ አያናን ኡንቱንቶ ምንሳደ ኦዳዳ፤ ሽን ኡንቱንቱ ስስበይክኖ። ሄዋፐ ደንዴዳዋን አይሁዳ ግደና ካዉተቱ ኡንቱንታ ሞዳና ማላ፥ ኡንቱንቱ ኩሽያን አ እማዳ። 31 ሽን ኔን ኬካነ ማርያ ጾሳ ግድያ ድራዉ፥ ነ ዎልቃማ ማሮተን ኡንቱንታ ኡባና አጋበይካነ ይሳባካ።

32 "ኑ ጾሳዉ፥ ዎልቃማዉ፥ ዎልቃማነ ያየቴዳ ጾሳዉ፥✝9:32 2 ካታ. 15:19፣ 29፤ 17:3-6፤ እዝራ 4:2፣ 10 ነ አገና ሲቁዋ ቃላ ጫቁዋ ናግያዋ፥ ኑ ቦላን ጋኬዳ መቱ ነ ስንን ላፋባ ማላቶፖ። በን አሶረ ካተቱዋ ዎድያፐ ዶሚደ፥ ሀቼ ጋካናዉ፥ ኑ ቦላን፥ ኑ ካተቱዋ ቦላን፥ ኑ ካፓቱ ቦላን፥ ኑ ቄሳቱዋ ቦላን፥ ኑ ትምቢትያ ኦድያዋንቱ ቦላን፥ ኑ ማይዛ አዎቱዋ ቦላንነ ነ አሳ ኡባ ቦላን ዎልቃማ መቱ ጋኬዳ። 33 ኑና ጋኬዳዋን ኡባን ኔን ጽሉዋ። አያዉ ጎፐ፥ ኑን ኔና ናቆፐካ ኔን አማነትያዋ አጋ በይካ። 34 ኑ ካተቱ፥ ኑ ካፓቱ፥ ኑ ቄሳቱ ነ ኑ ማይዛ አዎቱ ነ ህግያ ናግበይክኖ፤ ቃይ ኔን ኡንቱንቶ እሜዳ አዛዙዋነ ነ ምንሳ ኦዴዳዋካ ስስበይክኖ። 35 ኔን ኡንቱንቱ ካዉተን ኡንቱንቶ ዎልቃማ አንጁዋ እማዳ፤ ቃይ አኮነ ሞክያ ቢታካ ኡንቱንቶ እማዳ፤ ሽን ኡንቱንቱ ነዉ ጎይንበይክኖነ ባረንቱ ኢታ ኦሱዋፐ ስምበይክኖ።

36 "ሄዋፐ ደንዴዳዋን፥ ኑን ሀቼ አይልያ ግድያዋ በአ። ቃይ ሄዌካ ኡንቱንቱ አ አይፍያነ እ እምያ አንጁዋ ኡባ ማና ማላ፥ ኑ ማይዛ አዋቶ ኔን እሜዳ ሄ ጋድያን፥ ኑን አይልያ ግዴዶ። 37 ኑ ናጋራ ድራዉ፥ ኔን ኑ ቦላን ደንዳ ካተቱ ጋድያ አንጁዋ ኡባ ኡንቱንቱ ጎኤቲኖ። ቃይ ኑ ቦላንነ ኑ መህያ ቦላን ባረንቱ ኮዬዳዋ ኦኖ፤ ኑንካ ዎልቃማ መቱዋ ግዶን ደኤቶ" ያጌድኖ።

38 ሀኔዳ የዉዋ ኡባ ድራዉ፥ ኑን ሃሳዪደ ጫቄዳ ጫቁዋ ጻፌዶ፤ ሄ ኑን ጻፌዳ ጫቁዋ ዋራቃታ ቦላን ኑ ካፓቱ፥ ኑ ሌዋቱነ ኑ ቄሳቱ ባረንቱ ማታፋ ዎድኖ።