ሌምሱዋ 18

1 ሻከታናዉ ኮይያ አሳይ ባረ አሙዋ ካሌ፤ ሎኦ ኤራ ኡባካ ጳልቄ።

2 ቦዛይ ባረ ቆፋ ቆንጭሳናዋ ጻላላ ዶስያዋፐ አትና፥ ሀራ አሳፐ ኤራ አካናዉ ዶሰና።

3 ኢታተይ ይያ ዎደ፥ ካ፥ ካዉሻይነ ዬላይ አ ካሊደ ይ አጊኖ።

4 አሳ ዶናፐ ከስያ ሃሳያይ ጪሞ ሃ ማላ፤ አዳ ኤራተ ፑልቱካ ጎግያ ሃ ማላ።

5 ባይዛንቻ ማዲደ፥ ጽሉዋ ፕርዳ ጌላይያዌ ሎአ ግደና።

6 ቦዛ አሳይ ባረ ሃሳያን ዋላሳ ደን፤ አ ዶናፐ ከስያ ቃላይ አ ቦላ ጻምኣ ጼሴ።

7 ቦዛ አሳይ፥ ሃሳዪደ ባረና ቆሄ፤ አ ሃሳያይ ግትያ ግዲደ፥ አ ኦይቄ።

8 ዝግርሳ ቃላይ ማልኦ ቁማ ማላ፤ ናሸቺደ ዱገ ጋንጅያ ጋኬ።

9 ባረ ኦያ ኦሱዋን አዛልያ አሳይ ባይዝያ ኡራፐ አይነ ዱማተና።

10 መና ጎዳ ሱንይ ምኖ ግምቢያ ማላ፤ ጽሎ አሳይ ያ ዎጺደ ሳሮ አታና።

11 ሽን ዱረ አሳቶ ኡንቱንቱ ዱረተይ ዩሹ ግምበቴዳ ካታማ ማላ፤ ኡንቱንቱ ቆፋን ኡንቱንቱ ዱረተይ ምኖ ድርሳዳን ኡንቱንታ ናግያዋ ማላቴ።

12 አሳይ ኩንዳናፐ ካሰ አ ዎዛናይ ኦቶረቴ፤ ቦንቼትያዋፐካ ባረ ሁጲያ ዝቂ ኦያዌ ስንቴ።

13 ስሰናን ደኢድ ዛርያዌ፥ ሄዌ ሄ ኡራዉ ቦዛተነ ዬላ።

14 አሳ አያናይ ሀርግያ ዳንዳያናዳን ማዴ፤ ሽን አያናይ መኤረት ክቾፐ፥ አ ኦን ዳንዳያኔ?