1 አማኑዋን አዛልያ ኡራ ሺሽ አክተ። ሽን እ ባረ ሁጰዉ ቆፕያባን አናና ፓሉመቶፕተ። 2 እት ኡራ አማኑ እ አያ ሚናነ ድገና። ሽን አማኑዋን አዛልያ ኡራይ ጋደን ሞኬዳባ ጻላላ ሜ። 3 ኡባባ ምያ ኡራይ ኡባባ ሜና ኡራ ካፖ፤ ኡባባ ሜና ኡራይካ ኡባባ ምያ ኡራ ቦላ ፕርዶፖ። አያዉ ጎፐ፥ ጾሳይ አ ሺሽ አኬዳ። 4 ሀራ አሳ ቆማ ቦላ ፕርድያዌ ኔን ኦኔ? እ ኩንድና ዎይ ደንድና ባረ ጎዳሳ፤ ሽን ጎዳይ አ ደንናዉ ዳንዳይያ ድራዉ፥ እ ኤቃና።

5 እት ኡራይ፥ "ህቃ ጋላሳይ ሀራ ጋላሳቱዋፐ አ" ያጊደ ቆፕያ ዎደ፥ ሀራይ፥ "ኡባ ጋላሳቱካ እት ማላ" ጊደ ቆፔ። አሳይ ኡባይ ሁጲያን ሁጲያን ሄዋዳን አያዉ ቆፕንቶ አኬኮ። 6 እት ጋላሳ ሀራ ጋላሳቱዋፐ አደ ቦንችያ ኡራይ ጎዳ ቦንቾ ቦንቼ፤ ቁማ ምያ ኡራይካ ጎዳ ቦንቾ ሜ። አያዉ ጎፐ፥ እ ሄ ቁማ ድራዉ፥ ጾሳ ጋላቴ። ቁማ ሜናዌካ ጎዳ ቦንቾ ሜናን አጌዳ፤ ቃይ ጾሳ ጋላቴ። 7 አያዉ ጎፐ፥ ኑፐ ኦንነ ባረ ሁጰ ጻላላዉ ደኤና፤ ቃይ ኦንነ ባረ ሁጰ ጻላላዉ ሀይቀና። 8 ኑን ፓጻ ደኦፐ፥ ጎዳዉ ደኤቶ፤ ቃይ ሀይቆፐካ፥ ጎዳዉ ሀይቄቶ። ስም ኑን ፓጻ ደኦፐ ዎይ ሀይቆፐካ ጎዳሳ።

9 ሄዋ ድራዉ፥ ክርስቶስ ፓጻ ደእያዋንቶነ ሀይቄዳዋንቶ ጎዳ ግዳናዉ ሀይቂደ፥ ሀይቁዋፐ ደንዴዳ። 10 ያትና፥ ኔን ነ እሻ ቦላ አያዉ ፕርዳይ? ዎይ ኔን ነ እሻ አያዉ ካይ? ኑን ኡባይካ ጾሳ ፕርዳ ኦይድያ ስንን ኤቃና። 11 አያዉ ጎፐ፥ ጾሳ ማጻፋይ፥

" ‘ታን ጎዳይ ታ ደኡዋን ጫቃይ፤

አሳይ ኡባይ ታ ስንን ጉልባታና።

ቃይ ታን ጾሳ ግድያዋ፥

አሳይ ኡባይ ማርካታና’ ያጋይ"

ያጌ።✝ 12 ስም ኑን ሁጲያን ሁጲያን ኑባ ጾሳዉ ኦዳና።

13 ሄዋ ድራዉ፥ ኑን እቱ እቱዋ ቦላ ፕርድያዋ ሀዋፐ ስንዉ አነ አጎይተ። ሽን ኡባፐ አደ፥ ህንተ እሻ ቢያባ ዎይ ናጋራን ኦልያባ ኦናዳን ቆፋ ቃችተ። 14 ታን ጎዳ የሱስ ክርስቶሳና ደእያዋን፥ ባረ ሁጰዉ ቱና ግድያባይ ባይናዋ ኤራይነ አኬካይ። ሽን እት ኡራይ እትባ ቱና ጊደ ቆፖፐ፥ ሄዌ አዉ ቱና ግዴ። 15 ኔን ምያባ ድራዉ፥ ነ እሻ ቆሆፐ፥ ስም ኔን ሲቁዋን ደአካ። ክርስቶስ አ ድራዉ ሀይቄዳ አሳ ነ ምያ ቁማን ባይዞፓ። 16 ስም ኔን ሎኦባ ግያዋ አሳይ ካፖ። 17 አያዉ ጎፐ፥ ጾሳ ካዉተይ ጌሻ አያናይ እምያ ጽሎተ፥ ሳሮተነ ናሸቻ ግድያዋፐ አትን፥ ሙሳነ ኡሻ ግደና። 18 አያዉ ጎፐ፥ ክርስቶሳዉ ሀዋዳን ኦያ ኡራይ ኦንነ ጾሳ ናሸቼ፤ አሳይካ አ ጋላቴ።

19 ያቶፐ፥ አነ ኑን ሳሮተ አህያባነ ኑና እቱዋ እቱዋና ምንስያባ ኡባ ኮዬቶ። 20 ጾሳ ኦሱዋ ቁማ ድራዉ ባይዞፓ። ቁማይ ኡባይ ጌሻ፤ ሽን ሀራ ኡራ ናጋራን የግያዋ ሙሳይ ኢታ። 21 ሄዎ አሹዋ ሜናን ዎይ ኡሻ ኡሸናን አግያዌ ዎይ ነ እሻ ቢያባ አያነ ኦናን አግያዌ ሎአ።

22 ሀ የዉዋን ነ አማኑዋ ኔፐነ ጾሳፐ ግዱዋን ናጋ። እት ኡራይ ሎአ ጊደ እ አማነቴዳዋ ኦያ ዎደ፥ "ታን ሎኡዋ ኦድ" ጊደ ባረ ዎዛናን አማነቶፐ፥ ሄ ኡራይ ቱሙ አንጀቴዳዋ። 23 ሽን እ ሄ ምያባን ስኦፐ፥ አ ሙሳይ አማኑዋና ግደና ድራዉ፥ ጾሳይ አ ቦላ ፕርዴ፤ ቃይ አማኑ ባይናን ኦዳዌ አያይኔካ ናጋራ።