ዛካራሳ 1

ገሉዋ

1 ዳርዮሰ ካተቴዳ ላኤን ላይን፥ ሆስፑን አግናን መና ጎዳ ቃላይ እዶ ናኣ በረክያ ናኣ ትምቢትያ ኦድያ ዛካራሳኮ ዬዳ።✝1:1 እዝራ 4:24—5:1፤ 6:14

2 "መና ጎዳይ ህንተ ማይዛ አዎቱዋ ቦላን ሎይ ሀንቀቴዳ። 3 ሽን ሀእ አሳዉ ሀዋዳን ያጋደ ኦዳ፤ ‘ታኮ ስምተ፤ ቃይ ታንካ ህንተኮ ስማና።’ ታን ኡባፐ ዎልቃማ መና ጎዳይ ሀዋ ኦዳይ። 4 ካሰ ትምቢትያ ኦድያዋንቱ፥ ‘ኡባፐ ዎልቃማ መና ጎዳይ፥ ህንተ ኢታ ኦግያፐነ ኢታ ኦሱዋፐ ስምተ’ ያጌ" ያጊደ ኦድና ስሰናን እጼድኖነ ታናካ ስሰናን እጼዳ ህንተ ማይዛ አዎቱዋዳን ሀኖፕተ። ታን መና ጎዳይ ሀዋ ኦዳይ። 5 ህንተ ማይዛ አዎቱ ሀእ ሀቃን ደኢኖ? ሄ ትምቢትያ ኦዴዳዋንቱ መናዉ ፓጻ ደኢኖ? 6 ግዶ ሽን፥ ትምቢትያ ኦድያ ታ ቆማቱ ባጋና ታን ኦዴዳ ቃላቱነ ህገቱ ኡባይ ህንተ ማይዛ አዎቱዋ ቦላን ጋክበይክኖ? ያትና፥ ኡንቱንቱካ ካዮቲደ፥ ኡባፐ ዎልቃማ መና ጎዳይ ኑ ኦግያዳንነ ኑ ኦሱዋዳን ኑዉ እማና ጌዳዋዳን፥ ባረ ጌዳዋ ኦዳ ያጌድኖ ያጋ ያጌዳ።

ቃማ በኤቴዳ ሆስፑን ሳጻቱዋ

7 ዳርዮሰ ካተቴዳ ላኤን ላይን፥ ሻባጻ ግያ ታማነ እተን አግናን፥ ላታማነ ኦይደን ጋላስ መና ጎዳይ ቃላይ እዶ ናኣ በረክያ ናኣ ትምቢትያ ኦድያ ዛካራሳኮ ዬዳ። 8 ታን ቃማ ሳጻን ዞኦ ፓራ ቶጌዳ እት ብታንያ በኣድ፤ እካ ዛንጋራን ደእያ ባርሴነትያ ግያ ምቱዋ ጋርሳን ኤቄዳ፤ ቃይ አፐ ጉየ ባጋና ዳማ፥ ዞኦነ ቦ ፓራቱ ደኢኖ።✝1:8 ሳፃ 6:2-8 9 ያትና፥ ታን፥ ታ ጎዳዉ፥ ሀዋንቱ አዬ? ያጋድ።

ታናና ሃሳይያ ኪታንቻይ ዛሪደ ታና፥ "ሀዋንቱ አየንቶ ታን ኔና በሳና ያጌዳ።

10 "ያትና፥ ባርሴነትያ ጋርሳን ኤቄዳ ብታኒ፥ ሀዋንቱ ሳኣ ኡባ ዩይ ዩዪደ ጾሞሳና ማላ፥ መና ጎዳይ ኪቴዳዋንታ ያጌዳ።

11 "ኡንቱንቱ ባርሴነትያ ጋርሳን ኤቄዳ መና ጎዳ ኪታንቻዉ ሀዋዳን ያጌድኖ፤ ‘ኑን ሳኣ ኡባ ዩይ ዩዪደ ጾሞሲደ፤ ቢታይ ሳአይ ዎፑ ጊደ፥ ሳሮ ደኤ’ ያጌድኖ።

12 "ሄዋፐ ጉይያን፥ መና ጎዳ ኪታንቻይ ሀዋዳን ያጌዳ፤ ‘አቤት ኡባፐ ዎልቃማ መና ጎዳዉ፥ ኔን ሀንቀቶደፐ ላፑን ታሙ ላይ ግዴዳ ሀ የሩሳላመነ ይሁዳ ካታማቱዋ ማረናን አዉደ ጋካናዉ ጋምአይ?’ ያጌዳ።" 13 መና ጎዳይ ታናና ሃሳይያ ኪታንቻዉ ሎኦነ ምንያ ቃላን ዛሩዋ እሜዳ።

14 ሄዋ ድራዉ፥ ታናና ሃሳይያ ኪታንቻይ ታና፥ "ሀ ቃላ አዋያ፤ ኡባፐ ዎልቃማ መና ጎዳይ ሀዋዳን ያጌ፤ ‘ታን የሩሳላመዉነ ጽዮንዉ ዳሮ ምሸታይ። 15 ኑን ሳሮ ደኤቶ ግያ ካዉተቱዋ ቦላ ታን ዳሮ ሀንቀታድ፥ ታን ታ አሳ ቦላ ጉ ሀንቀታድ ሽን ኡንቱንቱ ታ አሳ ቦላ ዳሮ ቱጋ ጋድኖ። 16 ሄዋ ድራዉ፥ ታን መና ጎዳይ ሀዋ ኦዳይ፤ ታን የሩሳላመ ማሮታን ስማድ። ታ ጌሻ ጎሊ ያን ኬጸታና፤ የሩሳላመ ካታማይካ ዎዶሩዋን ልከታና። ታን ኡባፐ ዎልቃማ መና ጎዳይ ሀዋ ኦዳይ’ ያጌ" ያጋደ አዋያ።

17 "ዛረደካ ሀዋዳን ያጋደ አዋያ፤ ‘ኡባፐ ዎልቃማ መና ጎዳይ ታ ካታማቱዋ ዱረተይ ኩም ጎጋና ቃይ ታን መና ጎዳይ ጽዮነ ዛረደ ምንና፤ የሩሳላመካ ዛረደ ዶራና ያጌ’ ያጋደ አዋያ" ያጌዳ።

ዛካራስ ሳጻን ኦይዱ ካጨቱዋ በኤዳ

18 ቃይካ ታን ሳጻን ኦይዱ ካጨቱዋ በኣድ። 19 ታናና ሃሳይያ ኪታንቻ፥ "ሀዋንቱ አዬ?" ያጋደ ኦቻድ።

እካ ታዉ ዛሪደ፥ "ሀ ካጨቱ ይሁዳ፥ እስራኤላነ የሩሳላመ ላሌዳ ካዉተቱዋ" ካዉተቱዋ ሌምሳቱዋ ያጌዳ።

20 ሄዋፐ ጉይያን፥ መና ጎዳይ ታና ብራታ ቆጽያ ኦይዱ ሂላቱዋ በሴዳ። 21 ታን፥ "ሀዋንቱ አያ ኦናዉ ዬድኖ?" ያጋደ ኦቻድ።

እ ዛሪደ፥ "ሀዋንቱ ኦንነ ቁ ጊደ ጼለናዳን፥ ይሁዳ ቢታ ላሌዳ ካጨቱዋ ያሽሳናዉ ዬድኖ፤ ቃይ ይሁዳ ቢታ ላላናዉ ባረንቱ ካጭያ ደንዳ አይሁዳ ግደና ካዉተቱዋ ካጭያ ቆጺደ፥ ሳኣን የጋናዉ ዬድኖ" ያጌዳ።