ዛካራሳ 12

የሩሳላመ ጾኑዋ

1 ሀዌ እስራኤልያባ ኦድያ መና ጎዳ ቃላ። ሳሎቱዋ ምጬዳዌ፥ ሳኣካ መዳዌ፥ አሳ ግዶንካ አያና መዳ መና ጎዳይ ሀዋዳን ያጌ፤ 2 "በአ፥ ታን የሩሳላመ ካታማ አ ዩሹዋን ደእያ አሳ ኡባ ኡሽና ጋንድጋርስያ ዎይንያ ኤሳ ትግያ ዋንጫ ማላ ኦና፤ የሩሳላመ ዶደትያ ዎደ፥ ይሁዳ ካታማቱካ ዶደታና። 3 ሄ ጋላስ ታን የሩሳላመ ካታማ አሳ ኡባዉ ዴጾ ሹቻ ማላ ኦና፤ አ ደንያ ኡባይ ባረዉ ደሸታና። ቃይ ሳኣ ካዉተቱ ኡባይ አ ኦለታናዉ እትፐ ሺቃና። 4 ሄ ጋላስ ታን ፓራ ኡባ ዳጋንና፤ ፓራ ቶግያዋንታካ ጎሻና። ሄዋ ታን መና ጎዳይ ኦዳይ። ይሁዳ አሳ ታን ታ ኬካ አይፍያን ጼላና፤ ሽን ሞርከቱዋ ፓራቱዋ ኡባካ ቆቅሳና። 5 ሄ ዎደ ይሁዳን ካለያዋንቱ ባረንቱ ዎዛናን፥ ‘የሩሳላመ አሳይ ኡባፐ ዎልቃማ መና ጎዳን፥ ባረንቱ ጾሳን፥ ምኖተ ደሜድኖ’ ያጋና።

6 "ሄ ጋላስ ታን ይሁዳን ካለያዋንታ ም ዶርያ ግዶን ደእያ ጺፋነ ምርቀቱዋ ግዶን ላጮትያ ጾምፕያ ኦና። ኡንቱንቱ ባረንቱ ኡሸቻን ሀድርሳንነ ባረንቱ ዩሹዋን ደእያ አሳ ኡባ ማና፤ ሽን የሩሳላመ ካታማይ አሳይ ሳሮ ደኢያሳ ግዳናዋ።

7 "ዳዊታ ጎልያ ቦንቹነ የሩሳላመን ደእያዋንቱ ቦንቹ ይሁዳ አሳ ቦንቹዋፐ አና ማላ፥ ታን መና ጎዳይ ካሰታደ ይሁዳ አሳዉ ጾኑዋ እማና። 8 ሄ ጋላስ ኡንቱንቱ ግዶን ዳሮ ላፋ ግያ አስካ ዳዊታ ማላ ምኖ ግዳናዳን፥ ታን መና ጎዳይ የሩሳላመን ደእያዋንቶ ጎንዳለ ግዳና። ዳዊታ ጎለቱካ ጾሳ ማላ፥ ኡንቱንታ ካለያ መና ጎዳ ኪታንቻ ማላ ግዳና። 9 ሄ ጋላስ ታን የሩሳላመ ኦላናዉ ደንድያ ካዉተቱዋ ኡባ ይሳናዉ ደንዳና።

ባረንቱ ጫዴዳዎ ዬኬዳ ዬኩዋ

10 "ታን ዳዊታ ጎለቱዋ ቦላነ የሩሳላመን ደእያ አሳ ቦላ አ ኬካተነ ዎሳ አያና ጉሳና፤ ሄዋ ድራዉ፥ ኡንቱንቱ ባረንቱ ጫዴዳዋ በእያ ዎደ፥ አሳይ ባረ መጽ እት ናአዉ ዬክያዋዳን ዬካና፤ ቃይ ባረ ባይራ ናአዉካ ካዮትያ አሳዳን ካዮታና።✝12:10 ዮሃ. 19:37፤ ሳፃ 1:7✝12:10-14 ማቶሳ 24:30፤ ሳፃ 1:7 11 ሄ ጋላስ የሩሳላመን ዬከትያ ዬኩ ማግዶ ደምባን ሀዳድ-ርሞናስ ዬከቴዳ ዬኩዋ ኬሻ ዎልቃማ ግዳናዋ። 12 ቢታን ደእያ እት እት ዛሪ ባረዉ ባረዉ ዬካና፤ ዳዊታ ዛራቱ ባረዉ፥ ኡንቱንቱ ማቼቱካ ባረዉ፥ ናታና ዛራቱ ባረዉ፥ ኡንቱንቱ ማቼቱካ ቃይ ባረዉ ዬካና። 13 ቃይካ ሌዊያ ዛራቱ ባረዉ፥ ኡንቱንቱ ማቼቱካ ባረዉ፥ ሽምአ ዛራቱ ባረዉ፥ ኡንቱንቱ ማቼቱካ ባረዉ ዬካና። 14 ቃይ አቴዳ ዛሪ ኡባይካ ባረዉ ባረዉ ዬካና፤ ኡንቱንቱ ማቼቱካ ባረዉ ባረዉ ዬካና" ያጌ።