ዛካራሳ 3

ዛካራስ ሳጻን ቄስያ ኡባቱዋ ካፑዋ በኤዳ

1 ሄዋፐ ጉይያን፥ ቄስያ ኡባቱ ካፑ ኢያሱ መና ጎዳ ኪታንቻ ስንን ኤቄዳዋነ ሴጻናይካ ኢያሳ ሞታናዉ አፐ ኡሸቻ ባጋና ኤቄዳዋ መና ጎዳይ ሳጻን ታና በሴዳ።✝3:1 እዝራ 5:2፤ ሳፃ 12:10 2 መና ጎዳይ ሴጻና፥ "ሴጻናዉ፥ መና ጎዳይ ኔና ሴሮ፤ የሩሳላመ ዶሬዳ መና ጎዳይ ኔና ሴሮ! ሀ ብታኒ ታማፐ ከሲደ አቴዳ ጺፋ ማላ ግደኔ?" ያጌዳ።✝3:2 ዳና. 9

3 ኢያሱ ኪታንቻ ስንን ኤቄዳ ዎደ፥ ቅታ ማዩዋ ማይ ኡቴዳ። 4 ኪታንቻይ ባረ ስንን ኤቄዳዋንታ፥ "አፐ ሀ ቅታ ማዩዋ ቃርተ" ያጌዳ። ቃይ እ ኢያሳ፥ "በአ፥ ታን ነ ባይዙዋ ኔፐ ድጋድ፤ ቦንቹዋ ማዩዋካ ኔና ማይዛና" ያጌዳ። 5 ቃይካ ታን፥ "ጌሻ ሻሽያ አ ሁጲያን ጻጽተ" ያጋድ። ኡንቱንቱካ እ አዛዜዳዋዳን ኦድኖ፤ ማዩዋካ አ ማይዜድኖ። መና ጎዳ ኪታንቻይ ሄ ዎደ አ ምይያን ኤቄዳ።

6 ሄዋፐ ጉይያን፥ መና ጎዳ ኪታንቻይ ኢያሱዉ ሀዋዳን ያጊደ ሽሴዳ፤ 7 "ኡባፐ ዎልቃማ መና ጎዳይ ሀዋዳን ያጌ፤ ‘ኔን ታ ኦግያን ሀመቶፐነ ታ አዛዙዋ ናጎፐ፥ ኔን ታ ጌሻ ጎልያ አይሳና፤ ታ ዳባባንካ አዎታና። ቃይ ሀዋን ኤቄዳዋንቱና እትፐ ኔን ገልያ ማታ ታን ነዉ እማና።

8 " ‘ነኖ ቄስያ ኡባቱዋ ካፑዋ ኢያሱ፥ ሀዋ ስሳ! ስንና ያና ኬካባዉ ማላታ ግድያ ኔናና ኦያዋንቱካ ሀዋ ስስኖ! ታን ታሽያ ጌተትያ ታ ቆማ አሀና።✝3:8 ኤር. 23:5፤ 33:15፤ ዛካ. 6:12 9 በአ፥ ታን ኢያሱ ስንን ሹቻ ዎና፤ ሄ ሹቻ ቦላ ላፑን አይፈቱ ደኢኖ፤ ታን አ ቦላን ዎጫደ ጹፍያ ጻፋና። ታን ኡባፐ ዎልቃማ መና ጎዳይ ሀዋ ኦዳይ። ሄ ጋድያ ናጋራካ ታን እት ጋላስ ድጋና’ ያጌ።

10 "ኡባፐ ዎልቃማ መና ጎዳይ ሀዋዳን ያጌ፤ ‘ሄ ጋላስ ህንተ ኡባይካ ህንተ ዎይንያ ቱራነ ህንተ ባላስያ ም ጋርሳን ኡቲደ፥ ህንተ ሾሮቱዋ ሾባና’ ያጌ" ያጌዳ።✝3:10 ሚክ. 4:4