1 ባልጉ ጋክያ ዎደ፥ መና ጎዳይ እራ እማናዳን ዎስተ። መና ጎዳይ እራ ቶኬዳ ሻርያ ኪቴ፤ ቃይ እ አሳዉ እራ እሜ፤ አታክልትያካ ሾይቃን ሞክሴ። 2 ሶ ኤቃ ምስለቱ ኦድያዌ ሀዳ፤ ካይያዋንቱ ዎርዶ ሳፃ በኢኖ፤ አኩመትያዋንቱካ ዎርዶ አኩሙዋ ኦዲኖ፤ ሀዳ ምንዋካ ምንኖ። ሄዋ ድራዉ፥ አሳይ ዱጼዳ ዶርሳዳን ቶይላካቴ፤ ኡንቱንታ ሄምያዌ ባይና ድራዉ፥ ኡንቱንቱ ቆሄቲኖ።

3 ታ ሀንቁ ሄንንቻቱዋ ቦላ ኤጽ ከሴዳ፤ ሄ ካለያዋንታ ታን ሙራና። አያዉ ጎፐ፥ ኡባፐ ዎልቃማ መና ጎዳይ ባረ ዶርሳ ዉደ ግድያ ይሁዳ አሳ እ ሄሜ፤ እ ኡንቱንታ ኦላዉ ሳልፔዳ ባረ ዎልቃማ ፓራ ማላ ኦና። 4 ይሁዳ አሳ ግዶፐ ካለያዋንቱ ከሳና፤ ኡንቱንቱ ጎልያዉ ጎዳ ጻጱዋ ምንስያ ሹቻዳን፥ ዱንካንያ ጌዳዋዳንነ ኦላ ሚሻዳን ምኖ ግዳናዋ። 5 ኡንቱንቱ ኦግያ ኡርቃ የያ ምኖ ኦላንቻቱዋ ማላ ግዳናዋንታ፤ መና ጎዳይ ኡንቱንቱና ደእያ ድራዉ፥ ኡንቱንቱ ኦለታና፤ ፓራ አሳቱዋካ ጾናና።

6 "ታን ይሁዳ አሳ ምንና፤ ዮሴፎ አሳካ አሻና፤ ታን ኡንቱንቶ ቃረትያ ድራዉ፥ ኡንቱንቱ ዛራደ አሀና፤ ቃይ ኡንቱንቱካ ታን ኡንቱንታ ካሰካ አጋቤናባ ማላ ግዳናዋ። ታን መና ጎዳ ኡንቱንቱ ጾሳ ግድያ ድራዉ፥ ኡንቱንቱ ዎሳ ስሳና። 7 ኤፍሬማ አሳይ ምኖ ኦላንቻ ማላ ግዳናዋ፤ ዎይንያ ኤሳ ኡሼዳ አሳዳን፥ ኡንቱንቱ ዎዛናይ ናሸታና። ኡንቱንቱ ናናይካ ሄዋ በኢደ፥ ሀሹ ጋና፤ ኡንቱንቱ ዎዛናይ መና ጎዳን ናሸታና።

8 "ታን ታ አሳ ሱይቃደ ጼሳና፤ ያታደ፥ ኡንቱንታ እትፐ ሺሻና። አያዉ ጎፐ፥ ታን ኡንቱንታ ዎዛድ፤ ኡንቱንቱ ካሰዋዳንካ ጮራ ግዳናዋንታ። 9 ታን ኡንቱንታ አይሁዳ ግደና ካዉተቱዋ ግዶን ላልንቶካ፥ ኡንቱንቱ ባረንቱ ደእያ ሃኮ ጋድያን ታና ሀሳያና፤ ቃይ ኡንቱንቱካ ኡንቱንቱ ናናይካ ፓጻ አታናነ ባረንቱ ቢታ ስማና። 10 ታን ኡንቱንታ ግብጼ ጋድያፐ ዛራና፤ አሶረ ቢታፐካ ታን ኡንቱንታ ሺሻና። ኡንቱንቶ ኡትያ ሳአይ ያና ጋካናዉ፥ ታን ኡንቱንታ ጋላኣደ ቢታንነ ሊባኖሳ ጋድያን ኩንና። 11 ኡንቱንቱ መቶ አባ ግዶና አሽን፥ ታን ጾሳይ አባ ቤታ ሾጫና፤ ጪማ ግዴዳ ናይለ ሻፋይካ መላና። አሶረ ቢታ ኦቶሩ ጊያና፤ ግብጼ ካተቱዋ ጻምአይካ መአና። 12 ታን ኡንቱንታ መና ጎዳን ምንሳና፤ ኡንቱንቱካ አ ሱንን ሀመታና። ታን መና ጎዳይ ሀዋ ኦዳይ" ያጌ።