1 Haanna hawaadan yaagaadde woossaaddu;✝

«Ta wozanay Med’inaa Godaan nashettee;

Med’inaa Godaan ta wolk’k’ay dareedda.

Ta morkkatuwaa bollan taani c’eek’k’ettaade haasayay;

Med’inaa Goday taana ashsheeda diraw, taani nashettay.

2 «Med’inaa Godaa mala geeshshi ittuunne baawa;

Aa mali ittuunne baawa.

Nu S’oossaappe attina,

hara attiyaa wogga Zaallay baawa.

3 «Otoro haasaya aggite;

otoro k’aalay hinttenttu doonaappe kessoppo.

Ayaw gooppe, Med’inaa Goday eriyaa S’oossaa;

asaa oosuwaa I yiggi s’eellee.

4 «Olanchchatuwaa wonddaafii me"eedda;

shin d’ubetteeddawanttu wolk’k’aa danc’c’eeddino.

5 Kalli utteeddawanttu koshatiidde,

K’umaw haraw ootsiino;

shin koshatti utteeddawanttu ha"i kalleeddino.

Mantsatta laappun naanaa yelaaddu;

shin c’ora naanaa yeleeddaanna daaburaaddu.

6 «Med’inaa Goday wod’eenne patsee;

k’ay I duge Si’ooliyaan yeggeenne pude kessee.

7 Med’inaa Goday mank’k’etseenne dureyee;

k’ay I zik’k’isseenne d’ok’k’issee.

8 I hiyyeesatuwaa baanaappe dentsee.

Metootanchchatuwaakka bidintsaa pituwaappe dentsee;

unttuntta kaappatuwaanna utissee;

unttuntta bonchcho araataa laatissee.

«Ayaw gooppe, biittaa baasatu Med’inaa Godaassa;

I unttunttu bollan sa’aa esseedda.

9 I S’oossaa asatuwaa gediyaa naagee;

shin iitatuwaa I d’uman c’o"u udana.

«Asay bare wolk’k’an s’oonenna;

10 Med’inaa Godaana ek’k’ettiyaawanttu liik’ana.

I saluwaappe unttunttu bolla guguntsaadan guummana;

Med’inaa Goday sa’aan de’iyaawantta ubbaa pirddana.

«I bare kaatiyaw wolk’k’aa immana;

I bare okkeeddawoo s’oonuwaa immana»

yaagaadde woossaaddu.

11 Hewaappe guyyiyaan, Elk’k’aani Raaman de’iyaa bare soy beedda; shin na’ay Sammeeli k’eesiyaa Eeliyaappe garssana Med’inaa Godaw ootsee.

12 Eeliya attuma naanay iita naanatuwaa; unttunttu Med’inaa Godaa erikkino, 13 woy yarshshuwaa immiyaa asaw k’eesatuu ootsiyaa wogaa naagikkino. Hewenne, Asay yarshshuwaa yarshshiyaa wode, k’eesiyaa k’oomay heezzu achchaa birataa koc’aan akkeedda; ashuu biro ka"i de’ishshin, 14 doyssiyaa wogga otuwaan woy keriyaan he koc’aa yeddiide, koc’ay oyk’k’i kessiyaa ay k’ommo ashuwaa giddooppene afiide, k’eesiyaw immee. Yarshshuwaa yarshshanaw Seelo yiyaa Israa’eeliyaa asaa ubbaa unttunttu hawaadan ootsiino. 15 K’ay mod’d’uwaa yarshshiyaa sa’aan s’iis’s’anaappe kasetiide, k’eesiyaa k’oomay yarshshuwaa yarshshiyaa bitaniyaakko biide, «K’eesii k’ayye ashuwaappe attina, doyssa ashuwaa neeppe akkena diraw, aw s’iis’s’anaw amareeda ashuwaa hamma» yaagee.

16 Hewaappe guyye bitanii zaariide, «Wogaadan k’eesatuu mod’d’uwaa koyro s’uuggino; hewaappe guyyiyaan, neeni koyiyaawaa akka» yaagiyaa wode k’eesiyaa k’oomay, «tuytti; taw ha"i imma; ubbaa neeni diggooppe, taani neeppe wolk’k’an akkana» yaagee.

17 Med’inaa Godaw immiyaa yarshshuwaa Eeliyaa naanay kad’eedda diraw, unttunttu nagaray Med’inaa Godaa sintsan loytsi dareedda.

18 Shin Sammeeli na’atetsaan de’iidde, suufiyaa geetettiyaa kiriyaappe dadetteedda eefuude geetettiyaa mayuwaa mayyiide, Med’inaa Godaw ootsee. 19 Sammeela daaya laytsan laytsan guutsa k’oliyaa giigissaade, laytsaa yarshshuwaa yarshshanaw bare asinaana baadde Sammeelaw akkaade baw. 20 Eeli Elk’k’aananne Aa machchato, «Ne machata Med’inaa Godaw immeedda na’aa diraw Med’inaa Goday new ha mishiratin hara naanaa immo» yaagiide anjjee; yaatina, unttunttu barenttu soy simmiino. 21 Med’inaa Goday Haanno anjjina, shahaaraade heezzu attuma naanaanne laa"u mac’c’a naanaa yelaaddu. Na’ay Sammeeli Med’inaa Godaa sintsan dic’c’eedda.

22 Eeli loytsi ec’eedda. Aa naanay Israa’eeliyaa asaa ubbaa bolla ootseedda ubbabaanne k’ay S’oossaa Dunkkaaniyaa penggiyaan S’oossaw ootsiyaa mac’c’a asatuwaana giseeddawaa siseedda. 23 Unttuntta, «Hinttenttu hawaa malaa ayaw ootsiitee? Hinttenttu iita kiitaa taani asaa ubbaappe sisay. 24 Ta naatoo, hawaa aggite; Med’inaa Godaa Asay hinttentta giyaawaa taani siseeddawe lo"obaa gidenna. 25 Itti Asay asaa naak’k’ooppe, S’oossay aw gaannatana; shin Asay Med’inaa Godaa naak’k’ooppe, oonee aw gaannatanawe?» yaageedda.

Med’inaa Goday, «Taani unttuntta wod’ana» geedda diraw, unttunttu barenttu aawuwaa seeraa sisennan is’s’eeddino.

26 Na’ay Sammeeli S’oossaa sintsaaninne asaa sintsan dic’c’eeddanne sabetteedda.✝

27 Itti gallassi S’oossaa Asay Eeliyakko yiide Aa, «Med’inaa Goday hawaadan yaagee; ‹Ne mayza aawuu Aaroonenne Aa soo Asay Gibs’e kaatiyaa ayiletetsan de’iyaa wode, taani unttunttoo k’onc’c’aad. 28 Aaroone ta yarshshiyaa sa’aa pude kessana mala, is’aanaa c’uwayana malanne ta sintsan eefuudiyaa mayyana mala, taw k’eesiyaa udaade Israa’eeliyaa zaratuwaa ubbaappe Aa dooraad. K’ay Israa’eeliyaa Asay taman yarshshiyaa yarshshuwaa ubbaa taani ne aawuwaa zariyaw immaad.✝ 29 Taani ta de’iyaa sa’aa shiishshana mala azazeedda ta yarshshuwaanne immiyaawaa hinttenttu ayaw yed’d’i kaa’iitee? Ta Asay Israa’eelii, taw shiishsheedda yarshshuwaa ubbaappe murutiyaawaa hinttenttoo miide orddiyaawaan, neeni ne naanaa taappe aatsaade ayaw bonchchaad?› yaagee.

30 «Hewaa diraw, Med’inaa Goday Israa’eeliyaa S’oossay hawaadan yaagee; ‹Ne zariinne ne aawuwaa zarii med’inaw taw ootsana› gaad; shin ha"i, hewe taappe haakko! Taana bonchchiyaawantta taani bonchchana; taana kad’iyaawantta taani kawushshana. 31 Ne zariyaan Asay c’imenna mala, taani ne wolk’k’aanne ne aawuwaa zariyaa wolk’k’aa d’ayssiyaa gallassatuu yaanawaa. 32 Neeni metootana; taani Israa’eeliyaa asaw immiyaa anjjuwaa be’aade neeni k’anaatana; shin ne zariyaan c’imana Asay ooninne baawa. 33 Taani ta yarshshiyaa saappe d’ayssenna Asay de’ooppe, Aa gaasuwaan ne ayfii afos’s’iidde k’ook’ananne ne wozanaykka mishuwaa s’uugettana; ne daro zeretsaa ubbay yalagatetsan de’iidde hayk’k’ana.

34 «Ne naanay laa"u Hofiniininne Piinihaasi itti gallassi hayk’k’ana; hewe new malaataa gidanawaa.✝ 35 Taani taw ammanettiyaa k’eesiyaa, ta wozanaadaaninne ta k’ofaadan ootsiyaawaa dentsana; taani Aa zaratuu de’i be’anaadan ootsana; taani dooreeddawe kaatiyaa sintsan unttunttu ubbaa wode ootsana. 36 Ne zariyaan atteeda ubbay guutsa miishshaa woy baso ukitsaa woossanaw yiide, Aa sintsan guufanniide, ‹Taani ukitsaa maana mala, k’eesetuwaappe ittuwaa sa’aa malan taana wotsaarikkii› yaagana yaagee» yaageedda.