1 Abiiyi hayk’k’iidde, bare mayzzan gaketeedda; Daawita Kataman Aa moogeeddino. Aa kotan Aa na’ay Asay kaateteedda. I kaateteedda wode gadii tammu laytsaa woppaa demmeedda.

2 Aasi Med’inaa Godaa bare S’oossaa sintsan lo"obaanne suurebaa ootseedda. 3 Aasi allaga s’oossatoo yarshshiyaa sa’atuwaanne goynniyaa d’ok’k’a sa’aa koleedda. Goynnanaw shuchchaappe ootseedda tuussatuwaakka mentsereetseedda; Asheero geetettiyaa s’oossatti misiletuwaakka k’ans’s’ereetsi oleedda. 4 Yihudaa asay Med’inaa Godaa barenttu aawotuwaa S’oossaa koyanaadaaninne Aa higgiyaanne Aa azazuwaa naaganaadan Asay azazeedda. 5 K’ay goynniyaa d’ok’k’a sa’atuwaanne is’aanaa c’uwayiyaa sa’aa Yihudaa katamaa ubbaappe d’aysseedda. Aa kawutetsaa laytsan biittay woppaa demmeedda. 6 Kaatii Asay Yihudaan de’iyaa katamatoo geessotuwaa med’d’eedda. Med’inaa Goday Aa shemppisseedda diraw, biittaykka shemppeedda; he laytsatuwaan aanana ooninne olettibeenna.

7 Asay Yihudaa asaa hawaadan yaageedda; «Ane nuuni ha katamatuwaa kees’s’oytte; unttunttu yuushshuwaan miis’atuwaa med’d’oytte. Unttunttu bolla adussa gimbbetuwaa, penggetuwaanne penggetuwaa gorddiyaa shikaalatuwaa kesseetto. Nuuni Med’inaa Godaa nu S’oossaa koyowaa diraw, biittay ha"ikka nuussa. Nuuni Aa koyeeddo; I nuw ubbaa baggana woppaa immeedda» yaageedda. Hewaa diraw, unttunttu katamatuwaa kees’s’iide poleeddino.

8 Asaw wogga gonddalletuwaanne tooratuwaa oyk’k’iyaa 300,000 olanchchatuu Yihudaa zariyaappe de’iino; k’ay k’eeri gonddalletuwaa oyk’k’iyaawanttunne wonddaafiyaan dukkiyaawanttu laa"u s’eetanne hosppun tammu sha"a olanchchatuu Biiniyaama zariyaappe de’iino. Hawanttu ubbaykka mino asatuwaa.

9 Zeraaha geetettiyaa itti Top’p’iyaa Asay itti miiloone olanchchatuwaanne heezzu s’eetu paraa gaaretuwaa akkiide, Yihudaa olanaw yiide, Mareesha gakkeedda. 10 Asikka aanana olettanaw kesseedda; kesiide bare olanchchatuwaa Mareesha matan de’iyaa S’afaata Wombban salppisseedda. 11 Hewaappe guyyiyaan, Aasi Med’inaa Godaa bare S’oossaa woossiide, «Abeet Med’inaa Godaw, wolk’k’ay baynna olanchchatuu wolk’k’aama olanchchatuwaa s’oonanaadan maaddiyaawe neeppe attina, haray baawa! Abeet Med’inaa Godaw, nu S’oossaw, nuuni neenan ammanettiide, ha c’ora olanchchatuwaanna ne suntsan olettanaw yeedda diraw, neeni nuuna maadda. Abeet Med’inaa Godaw, neeni nu S’oossaa; neena Asay s’oonenna» yaageedda.

12 Hewaa diraw, Med’inaa Goday Asa sintsaaninne Yihudaa olanchchatuu sintsan Top’p’iyaa olanchchatuwaa shoc’eedda; Top’p’iyaa olanchchatuu bak’atteedino. 13 Asinne aanana de’iyaa Asay unttuntta Garaara gakkanaw yedersseeddino. Top’p’iyaa olanchchatuwaappe daruu hayk’k’eedda diraw, unttunttu simmiide minnanawunne olettanaw danddayibeykkino. Hewaadan haniide, Top’p’iyaa olanchchatuu Med’inaa Godaaninne Aa olanchchatuwaan s’oonetteeddino. Kaatiyaa Asaa olanchchatuukka darobaa omoodeeddino. 14 Hewaa heeraan de’iyaa Asay Med’inaa Goday ootseeddawaa yaatiide, daro dagammeedda. Asaa olanchchatuukka Garaara yuushshuwaan de’iyaa katamatuwaa ubbaa bonk’k’iide d’aysseeddino. 15 K’ay mehiyaa heemmiyaawanttu mootsatuwaa olettiide, daro dorssaa, deeshshaanne gaaluwaa di’iide, Yerusaalame simmeeddino.