2 Oduwaa 2

Solomone Geeshsha Golliyaa Kees’s’anaw Giigisseedda

1 Solomone Med’inaa Godaa suntsaw Geeshsha Golliyaanne barew kaatiyaa golliyaa kees’s’anaw halchcheedda. 2 Hewaa diraw, Solomone tookkiyaawaa toossanaw laappun tammu sha"a asatuwaanne gezziyaan shuchchaa k’oo’anaw hosppun tammu sha"a asatuwaa dooreedda; k’ay unttuntta wochchiyaa heezzu sha"anne usuppun s’eetu asatuwaa unttunttu bolla suntseedda.

3 Hewaappe guyyiyaan, Solomone S’iiroosa Kaatiyaa Kiiraamaw kiitaa kiittiide, «Ta aawuu Daawite barew kaatiyaa golliyaa kees’s’anaw neeni zigaa yeddeeddawaadan, tawukka yedda. 4 Ha"i taani Med’inaa Godaa ta S’oossaa suntsaw Geeshsha Golliyaa kees’s’anaw hanay. Taani sawuwaa toshikku giyaa is’aanaa c’uwayanaw, ubbaa wode S’oossaa sintsan ukitsaa wotsanawunne ubbaa gede guuranne omarssa, Sambbata gallassatuwaan, aginay s’eeriya wodetuwaaninne S’oossaa nu S’oossaa baalaa gallassatuwaan s’uuggiyaa yarshshuwaa yarshshanaw, he Geeshsha Golliyaa dummayana. Israa’eeliyaa Asay med’inaw ootsanaadan azazetteedda oosotuu hawantta.

5 «Nu S’oossay hara s’oossatuwaa ubbaappe wolk’k’aama gidiyaa diraw, taani kees’s’anaw haniyaa Geeshsha Gollii wolk’k’aama. 6 Shin aw Geeshsha Golliyaa kees’s’anaw danddayiyaawe oonee? Ayaw gooppe, saluwaappe d’ok’k’a saluukka aw gidanaw danddayenna! Yaatina, taani Aa sintsan yarshshuwaa yarshshanaappe attina, taani aw Geeshsha Golliyaa kees’s’anaw oonee?✝2:6 1 Kat. 8:27; 2 Od. 6:18

7 «Ha"ikka alleek’k’iyaawantta kessiyaa kiitaa, work’k’aa, biraa, nahaasiyaanne birataa siilisiide tigiyaa oosuwaanne zo’o mayuwaa, ochchaa teeraa malatiyaa mayuwaanne saluwaa malatiyaa mayuwaa giigissiyaa kiitaa eratetsay de’iyaa asaa taw yedda. Ta aawuu Daawite Yihudaaninne Yerusaalamen de’iyaa kushiyaa hiillaa eriyaawantta doori wotseedda; I unttunttunna ittippe ootsana. 8 Liibaanoosan de’iyaa ne asatuu mitsaa woot k’ans’s’intto eriyaawaa taani eray. Hewaa diraw, neeni taw Liibaanoosappe zigaa, s’idiyaanne sanddaliyaa yedda. Ta asatuu ne asatuwaana gidiide, 9 taw daro mitsaa giigissana. Ayaw gooppe, taani kees’s’iyaa Geeshsha Gollii gitanne malaalissiyaawaa. 10 Mitsaa k’ans’s’iyaa ne k’oomatoo taani laatamu sha"a konttaale zarggaanne laatamu sha"a konttaale banggaa, k’ay oyddu s’eetu sha"a liitiro woyniyaa eessaanne oyddu s’eetu sha"a liitiro wogaraa zayitiyaa immana» yaageedda.

11 S’iiroosa Kaatiyaa Kiiraami Solomonaw dabddaabbiyaa kiittiide, «Med’inaa Goday bare asaa siik’iyaa diraw, I neena unttunttu bolla kaateyeedda» yaageedda. 12 Kiiraami k’aykka, «Med’inaa Godaw Geeshsha Golliyaanne barew kaatiyaa golliyaa kees’s’anaadan aad’d’eeda eranchcha, akeekanchchanne c’inc’c’a na’aa Kaatiyaa Daawitaw immeedda, saluwaa sa’aa med’d’eedda Med’inaa Goday, Israa’eeliyaa S’oossay galatetto.

13 «Ha"ikka taani new Huraama geetettiyaa hiillanchchanne akeekanchcha bitaniyaa yeddaad. 14 Aa aata Daana zariyaa; k’ay Aa aawuu S’iiroosa gadiyaa asaa. I work’k’aa, biraa, nahaasiyaa, birataa, shuchchaanne mitsaa ootsiyaa asaa; k’ay ochchaa teeraa malatiyaa mayuwaa, saluwaa malatiyaa mayuwaa, zo’o mayuwaanne suufiyaa geetettiyaa mayuwaa giigissiyaa kiitaa ereedda. K’aykka I dumma dumma alleek’k’iyaawantta kessiide, odeeddawaadan ubbabaa ootsanaw danddayee. Hewaa diraw, kushiyaa hiillan looheedda ne asatuwaananne kase ne aawoo, Daawitaw ootseedda asatuwaana Aa oosissa.

15 «Ha"ikka neeni ta goday immana geedda zarggaanne banggaa, zayitiyaanne woyniyaa eessaa ta k’oomatoo yedda. 16 Neeni Liibaanoosappe koyyo mitsaa keeshshaa nuuni k’ans’s’iide k’ashissiide, abbaa bollanna tookettiide, neekko Yoop’p’e baanaadan ootsana. Yaatooppe neeni yaappe Yerusaalame gakkanaw afissana» yaageedda.

Solomone Geeshsha Golliyaa Kees’s’eedda

17 Aa aawuu Daawite kase paydeeddawaadan, Solomone Israa’eeliyaa biittan de’iyaa kare biittaa asaa ubbaa paydeedda; unttunttu 153,600 gideeddino. 18 Solomone he asaappe 70,000 tookkiyaawaa toossanaw, 80,000 gezziyaan shuchchaa k’oo’anaw dooreedda; k’ay unttuntta wochchanaw 3,600 asatuwaa suntseedda.