2 Oduwaa 9

Saaba Kaatatto

1 Saaba kaatata Solomone waariyaa sisaade, dees’o ooshatuwaa akkaade, Aa paac’c’anaw denddaddu. Denddade sawuwaa, loytsi daro work’k’aanne al"o shuchchaa c’aaneteedda daro gaalotuwaa c’uguwaana loytsi daro ajabaana Yerusaalame gakkaade, Solomone sintsa aad’d’aadu. Bare wozanaan de’iyaawaa ubbaa Solomonaw odaaddu.✝9:1-9 Mat. 12:42; Luk'. 11:31 2 Solomone iza oochcheeddawaa ubbaa odeedda; I iziw birshshennan aappe geemmi atteedabay ayaynne baawa. 3 Saaba kaatata Solomone aad’d’eeda era, I kees’s’eedda kaatiyaa golliyaa, 4 Aa maaddan shiik’iyaa k’umaa, Aa oosanchchatuu uttiyaa utetsaa, Aa kaaliyaawanttu ootsiyaa oosuwaanne mayiyaa mayuwaa, Aa eessaa tigiyaawanttu mayiyaa mayuwaanne Med’inaa Godaa Geeshsha Golliyaan I s’uuggiyaa yarshshuwaa be’eedda wode, I wozanay gagetteedda.

5 Hewaappe guyyiyaan, Aa kaatiyaa, «Newaanne ne aad’d’eeda eratetsaabaa taani ta gaden de’aadde siseeddawe tuma. 6 Shin taani yaade ta ayfiyaa biraanan be’ana gakkanaw, unttunttu taw odeeddawaa ammanabeykke. Ne aad’d’eeda era gitatetsaw bakkaanne taw odibeykkino; taani siseeddawaappe neeni loytsa d’ok’k’aasa. 7 Ubbaa wode ne sintsan eek’k’iide, ne aad’d’eedda era sisiyaa ne asatuunne ne oosanchchatuu ayaa k’aadetteeddinooshshaa! 8 Neenan nashettiidde, neena bare kawutetsaa araatan utisseedda Med’inaa Goday ne S’oossay galatetto! Ne Med’inaa Goday Israa’eeliyaa asaa siik’eedda dirawunne med’inaw loytsi essanaw koyowaa diraw, neeni suure pirddaanne s’illotetsaa ootsana mala, I neena unttunttu bolla kaateyeedda» yaagaaddu.

9 Yaagaade kaatata 4,000 kiilo giraame dees’iyaa work’k’aa, loytsi daro sawuwaanne al"o shuchchaa kaatiyaw immaaddu; Saaba kaatata Kaatiyaa Solomonaw immeedda sawuwaa malatiyaa sawuu ubbakka baawa.

10 (Ofiirappe work’k’aa aheedda, Kiiraama asatuunne Solomone asatuu yaappekka sanddale giyaa mitsaanne al"o shuchchaa aheeddino. 11 Kaatii Solomone he sanddaliyaappe Med’inaa Godaa Geeshsha Golliyaa, kaatiyaa golliyaa geliyaa sa’aw diitsatuwaanne mazimuriyaa yes’s’iyaawanttoo maasink’k’uwaanne diitsaa med’isseedda. Hewaa malatiyaabay Yihudaa biittan kase beetti erenna.)

12 Kaatii Solomone Saaba kaatata amottaade Aa oochcheeddawaa ubbaa iziw immeedda. Aa aw aheedawaappe daruwaa I iziw immeedda. Hewaappe guyyiyaan, Saaba kaatata bare ajabaana denddaade, bare gadiyaa simmaaddu.

Solomone Duretaa

13 Solomone laytsan laytsan akkiyaa work’k’ay laatamanne heezzu sha"a kiilo giraame dees’iyaawaa. 14 Hewe zal"anchchatuwaappe akkeedda k’aras’aanne Araba gadiyaa kaatetuwaa ubbaappenne Israa’eeliyaa gadiyaa mooddiyaawanttuppe akkeedda work’k’aanne biraa gujjennaana. 15 Kaatii Solomone laa"u s’eetu wogga gonddalletuwaa k’os’s’eedda work’k’aappe med’isseedda; itti itti gonddalliyan laappun kiilo giraame gidiyaa work’k’ay geleedda. 16 K’aykka I heezzu s’eetu k’eeri gonddalletuwaa k’os’s’eedda work’k’aappe med’isseedda; itti itti k’eeri gonddalliyan laa"u kiilo giraame gidiyaa work’k’ay geleedda. Kaatii he gonddalletuwaa Liibaanoosa Wora Golliyaa geetettiyaa gollen wotseedda.

17 K’aykka kaatii danggarssaa zaaliyaappe itti wolk’k’aama kawutetsaa araataa med’isseedda, geeshsha work’k’aan sheeshsheedda. 18 Kawutaa araatay de’iyaa sa’aa pude kesanaw yed’d’iyaa usuppun ditsatuu de’iino. Gediyaan yed’d’anaw kawutetsaa araatanna gatsiide, work’k’aappe ootseedda oydii de’ee. Araataw laa"u baggaanakka k’esiyaa zemppissiyaa sa’atuu de’iino; he laa"u sa’atuu lank’k’iyankka ya baggananne ha baggana ek’k’eedda itti itti gaammuwaa misilii de’ee. 19 He araataa pude kesiyaa usuppun detsatuwaan ya baggananne ha baggana itti itti gaammuwaa misilii, ubbaanna tammanne laa"u misiletuu de’iino. Hawaa mala kawutetsaa araatay hara kawutetsan hak’aninne oosettibeenna.

20 Kaatii Solomone ushshaa ushiyaa miishshaa ubbay work’k’aappe oosetteedda; Liibaanoosa Wora Gollen de’iyaa shaluwaa ubbaykka muruta work’k’aappe oosetteedda. Solomone wode biray ubbakka go"iyaabaadan paydetti erenna. 21 Kaatiyaw Kiiraama markkabatuwaanna zal"iyaa wolk’k’aama markkabatuu abbaan de’iino. He markkabatuu work’k’aanne biraa, danggarssaa achchaa, k’aaretuwaanne geleshshotuwaa c’aani akkiide, heezzu laytsaappe itti gede simmiino.

22 Kaatii Solomone duretetsaaninne aad’d’eeda eratetsan sa’aan de’iyaa kaatetuwaa ubbaappe daree. 23 Sa’aan de’iyaa kaatetuu ubbay Aa sintsa aad’d’anawunne S’oossay Aa wozanaan wotseedda aad’d’eeda era sisanaw koyino. 24 Laytsaappe laytsan yiyaa ubbay aw Immanaw work’k’aanne biraa miishshatuwaa, mayotuwaa, ola miishshatuwaanne sawuwaa, paratuwaanne bak’ulotuwaa akkiide yee.

25 Solomonaw paratoonne gaaretoo 4,000 gaas’aatay de’ee; k’ay 12,000 paratuu aw de’iino. Solomone hewantta paraa gaaretuwaa katamatuwaaninne barenana Yerusaalamen wotseedda.✝9:25 1 Kat. 4:26 26 Solomone Efiraas’iisa Shaafaappe doommiide, Piliss’s’eema gadiyanne Gibs’e zawaa gakkanaw de’iyaa kaatetuwaa ubbaa mooddeedda.✝9:26 Dom. 15:18; 1 Kat. 4:21 27 Kaatii Yerusaalamen biray shuchchaadan keeletanaadan, zigaykka gad’an dic’c’iyaa etsaadan c’orattanaadan ootseedda. 28 Solomonaw paratuwaa Gibs’eppenne hara biittaa ubbaappe ahiino.✝9:28 Zar. 17:16

Solomone Hayk’uwaa

29 Koyroppe wurssetsaa gakkanaw Solomone haneedda harabay Timbbitiyaa Odiyaa Naataana Taarikiyaa mas’aafan, Seeloppe Yeedda Akiiyi Timbbitiyaa odeedda Mas’aafaaninne Nabaas’a Na’aa Iyorbbaamawaa Timbbitiyaa odeedda Idduu Be’eedda sas’aa mas’aafan s’aafetti utteedda. 30 Solomone Israa’eeliyaa ubbaa bolla Yerusaalamen oytamu laytsaa kaateteedda. 31 Hewaappe guyyiyaan, Solomone hayk’k’iidde, bare mayzzan gaketeedda; bare aawuwaa Daawita Kataman moogetteedda. Aa na’ay Robi’aame Aa kotan kaateteedda.