2 Oduwaa 32

Asooretuu Yerusaalame Olanaw Naasseeddino

1 Kaatii Hizk’k’iyaase S’oossaw ammanettiide ootseedda ha oosuwaappe guyyiyaan, Asoore Kaatii Sanaakireebe Yihudaa gadiyaa bolla dooddeedda; barew oyk’k’anaw k’oppiide, gimbbettu utteedda katamatuwaa dooddeedda.

2 Sanaakireebe Yerusaalamen olanaw yeeddawaa Hizk’k’iyaase be’eedda wode, 3 katamaappe karenna goggiyaa pulttuwaa haatsaa zeeranaw bare oosanchchatuwaanne bare mino asatuwaa zoretaa besseedda; Unttunttu Aa maaddeeddino. 4 Hewaa diraw, unttunttu daro asaa shiishshiide, hewaa heeraan de’iyaa pulttotuwaa ubbaanne goggiyaa shaafaa bareedino. «Asoore kaatetuu yiide, ayaa haatsaanne demmoppino» yaageeddino.

5 Hewaappe guyyiyaan, Hizk’k’iyaase min ootsiide, laaletteedda dirssaa gimbbiyaa ubbaa zaaretsiide gimbbeedda; yaatiide Aa bolla adussa gimbbiyaa gimbbeedda. He dirssaa gimbbiyaappe kare baggana hara dirssaa gimbbiyaa gimbbeedda; k’ay Daawita Kataman de’iyaa Miillo giyaa sa’aa miniseedda. Daro ola miishshaakka gonddalliyaakka med’d’eedda.

6 Yaatiide olanchchatuu kaappatuwaa asaa bolla suntseedda; unttunttu ubbaa katamaa penggiyaa ellekka de’iyaa gutaran shiishshiide, 7 «Hayyanaa minnite! Asoore kaatiyaanna de’iyaawaappe nuunanna de’iyaawe aad’d’ee. Hewaa diraw, Asoore kaatiyawunne aanana de’iyaa daro olanchchatoo yayyoppite! Dagammoppite! 8 Aanana asaa wolk’k’ay de’ee; shin nuunanna Med’inaa Goday nu S’oossay nuuna maaddanawunne nuw olettanaw de’ee» yaagiide unttuntta mintsetseedda. Yihudaa Kaatii Hizk’k’iyaase haasayeeddaban Asay minetteedda.

9 Hewaappe guyyiyaan, Asoore Kaatii Sanaakireebe bare olanchchatuu ubbaanna ittippe Laakisha katamaa dooddishin, Yihudaa Kaatiyaa Hizk’k’iyaasakkonne Yerusaalamen de’iyaa Yihudaa asaa ubbaakko, oosanchchatuwaa kiitteedda. 10 Hewenne, «Asoore Kaatii Sanaakireebe, ‹Hinttenoo, ha dooddetti utteedda Yerusaalame kataman de’iyaa asatoo, oonan ammanetteeditee? 11 Hizk’k’iyaase hinttentta, «Asoore kaatiyaa kushiyaappe Med’inaa Goday nu S’oossay nuuna ashshanawaa» yaagee; shin I hinttentta hewaadan baletsiidde, koshshaaninne saamuwaan wod’anaw hanee. 12 Ha s’oossatoo goynniyaa d’ok’k’a sa’atuwaanne yarshshiyaa sa’aa diggiide, Yihudaanne Yerusaalame asaa, «Hinttenttu itti yarshshiyaa sa’aa sintsan goynnite; k’ay hinttenttu yarshshuwaakka Aa bolla s’uuggite» yaagiyaawe ha Hizk’k’iyaasa gidennee?

13 « ‹Taaninne ta aawotuu hara kawutetsatuu asaa ubbaa bolla ootseeddawaa hinttenttu eribeykkite? He kawutetsatuu s’oossatuu barenttu gadiyaa ta kushiyaappe ashshanaw danddayeeddino? 14 Ta aawotuu d’aysseedda ha kawutetsatuu s’oossatuwaa ubbaa giddon bare asaa ta kushiyaappe ashshanaw danddayeeddawe oonee? Yaatina, hinttenttu S’oossay hinttentta ta kushiyaappe woot ashshanaw danddayii? 15 Hewaa diraw, ha"ikka, Hizk’k’iyaase hinttentta baletsoppo woy hawaadan c’immoppo. Hinttenttu Hizk’k’iyaasa ammanoppite. Ayaw gooppe, Aa asaa ta kushiyaappe woy ta aawotuwaa kushiyaappe, gade asaa s’oossatuu woy kawutetsaa s’oossatuu ashshanaw danddayibeykkino. Yaatina, hewe hinttenttu S’oossay hinttentta ta kushiyaappe ashshanaw waan danddayii?› yaagee» yaageeddino.

16 Sanaakireeba oosanchchatuu Med’etaa Ubbaa Godaa bollanne Aa k’oomaa Hizk’k’iyaasa bolla hara c’orabaakka haasayeeddino. 17 Sanaakireebe k’aykka Med’inaa Godaa Israa’eeliyaa S’oossaa k’iliic’anawunne Aa bolla haasayanaw dabddaabbiyaa s’aafiidde, «Sa’aa bollan de’iyaa kawutetsatuu s’oossatuu barenttu asaa ta kushiyaappe ashshibeennawaadan, Hizk’k’iyaasa S’oossaykka bare asaa ta kushiyaappe ashshenna» yaagiide s’aafeedda. 18 Sanaakireeba oosanchchatuu katamaa omooddanaw koyiide, dirssaa gimbbiyaa bolla utteedda Yerusaalame asaa yashissanawunne dagantsanaw barenttu k’aalaa d’ok’k’u ootsiide, Ibraawetsuwaan unttunttu bolla waasseeddino. 19 Asaa kushiyan oosetteedda, ha sa’aan de’iyaa hara asatuwaappe s’oossatuwaa bolla haasayiyaawaadan, Yerusaalame S’oossaa bollakka haasayeeddino.

20 Hewaappe guyyiyaan, Kaatii Hizk’k’iyaasinne Amoos’a na’ay, timbbitiyaa odiyaa Isiyaasi hawaa diraw, S’oossaa woosseeddino; unttunttu saluwaa pude waasseeddino. 21 Asoore kaatii dunkkaaneedda sa’aan de’iyaa olanchchatuwaa ubbatuwaa, gadaawatuwaanne kaappatuwaa d’ayssiyaa kiitanchchaa Med’inaa Goday kiitteedda. Hewaa diraw, Asoore kaatii kawushiide, bare gadiyaa simmeedda. Simmiide, bare s’oossaa golliyaa geleedda wode, Aa naanay Aa he sa’aan mashshaan wod’eeddino.

22 Hewaadan ootsiidde, Med’inaa Goday Hizk’k’iyyaasanne Yerusaalamen de’iyaa asaa Asoore Kaatiyaa Sanaakireeba kushiyaappenne hara morkkatuwaa ubbatuwaa kushiyaappe ashsheeda; unttunttu shooro biittatuwaa ubbabaappe unttunttu shemppisseedda. 23 Daro asatuu Med’inaa Godaw imotaa immeeddino; Yihudaa Kaatiyaa Hizk’k’iyaasawukka al"o miishshaa aheeddino. He wodiyaappe doommiide, kawutetsaa ubbay Hizk’k’iyaasa loytsi bonchcheedda.

Hizk’k’iyaasa Harggiyaanne Aa Otoruwaa

24 He wode Hizk’k’iyaase harggiide, hayk’k’ana mateedda; yaatiide Med’inaa Godaa woosseedda. S’oossay aw woosetteedda; Aa patsanaw malaataa immeedda. 25 Shin Hizk’k’iyaase otoretteedda diraw, S’oossay aw keekeedda keekkatetsaw Aa galatibeenna. Hewaa diraw, Aa bolla, Yihudaa bollanne Yerusaalame bolla Med’inaa Godaa hank’k’uu wod’d’eedda. 26 Gidooppenne, wurssetsan Hizk’k’iyaase bare otoruwaa aggiide, Yerusaalame asatuwaana ittippe barenatetsaa kawushsheedda. Hewaa diraw, Hizk’k’iyaasa wodiyaan Med’inaa Godaa hank’k’uu unttunttu bolla wod’d’ibeenna.

Hizk’k’iyaasa Duretetsaanne Bonchchuwaa

27 Hizk’k’iyaasaw loytsi daro duretetsaynne bonchchu de’eedda; Hizk’k’iyaase bare biraw, work’k’aw, al"o shuchchaw, sawoo, gonddalliyawunne hara al"o miishshaa ubbaw miishshaa minjjiyaa sa’aa kees’s’eedda. 28 Katsaa, woyniyaa eessaanne zayitiyaa wotsiyaa sa’atuwaakka kees’s’eedda. Dumma dumma mehii ek’k’iyaa ak’otuwaanne dorssaa wudii ek’k’iyaa ak’uwaa ootseedda. 29 S’oossay aw loytsi daro duretaa immeedda diraw, barew katamatuwaa kees’s’eedda; dorssaa wudiyaanne mehiyaa wudiyaa daruwaa shiishsheedda. 30 Ha Hizk’k’iyaasikka k’ommo baggana de’iyaa Giyoone haatsaa pulttiyaa zeeriide, Daawita Katamaw away wulliyaa bagga zaariide, haatsaa yeddeedda. Hizk’k’iyaase ootseeddabay ubbay lo"o poletteedda. 31 Shin Yihudaa biittan haneedda malalissiyaa malaataabaa oochchanaw Baabloone mooddiyaawanttu kiitteedda asatuu Hizk’k’iyaasakko yeedda wode, S’oossay Aa paac’c’anawunne Aa wozanaan de’iyaawaa ubbaa eranaw Aa yeddi besseedda.

Hizk’k’iyaasa Hayk’uwaa

32 Hizk’k’iyaase haneedda harabaynne S’oossaw I ootseedda lo"o oosuwaabay Amoos’a Na’aa, Timbbitiyaa Odiyaa Isiyaasa sas’aa Mas’aafaaninne Yihudaa Kaatetuunne Israa’eeliyaa Kaatetuu Taarikiyaa mas’aafan s’aafetti utteedda. 33 Hizk’k’iyaase hayk’k’iidde, bare mayzzan gaketeedda; k’ommo baggana de’iyaa Daawita zeretsatuwaa makkaanan Aa moogeeddino. I hayk’k’ina, Yihudaa Asay ubbaynne Yerusaalamen de’iyaa Asay Aa bonchcheeddino. Aa kotan Aa na’ay Minaase kaateteedda.