Jó 28

Aad’d’eeda Eratetsaa Timirttiyaa

1 «Biraa bookki kessiyaasaynne work’k’aa geeshshanaw muushisiyaa sa’ay de’ee. 2 Biratay Asay biittaappe bookkina kesee; nahaasiikka Aa shuchchaa muushisina kesee. 3 Asay s’omppiyaa ahiide, d’umaa s’oonee; biittaa c’iimmuwaa gakkiide, d’ip’p’i go d’umaa giddon he shuchchaa koyee. 4 Asay de’iyaasaappe haakkiide, asaa gedii yed’d’i erennasaa biide, hewan c’iimma ollaa bookkee; hewan wodoruwaan yaanne haanne kuulumushiidde, asaappe shaakkettiide de’ee. 5 Katsay biittaappe mokkee; shin he biittaa gidduu taman muushiide, aad’d’i aad’d’i wod’d’ee. 6 He biittaa giddon de’iyaa shuchchaappe samppeeriyaa giyaa al"o shuchchay kesee; Aa baanaa giddoppekka work’k’ay beettee.

7 «He shuchchaa bookkiyaasaa afiyaa ogiyaa s’inggillii erenna; gac’iikka be’ibeenna. 8 Iita do’atuu barenttu gediyaan he sa’aa yed’d’i erikkino; gaammuukka hewaana aad’d’ena.

9 «Asay mino zaallaa mentsereetsee; deriyaakka bookkiide, s’ap’uwaappe aatsi yeggee. 10 Zaallaa lukkiide, aad’d’iyaa ogiyaa kessiide, he al"o shuchchaakka demmee. 11 Haatsaa pulttuwaa bookino; geemmeeddabatuwaakka poo’uwaa kessee.

12 «Shin aad’d’eeda eratetsay hak’appe beettanaw danddayii? Akeekay beettiyaa sa’ay hak’ee? 13 Asay Aa tumu gatiyaa erenna; ayaw gooppe, aad’d’eedda eratetsay pas’a de’iyaawanttu biittaan beettanaw danddayenna. 14 C’iimmuu, ‹Aad’d’eeda eratetsay ta giddon baawa› yaagee; Abbaykka taananna gidena gee.

15 «Aad’d’eeda eratetsay work’k’aan shamettenna; Aa gatiikka biran geedaretena. 16 Aad’d’eeda eratetsay bertte work’k’aan, margidiyaanne samppeeriyaa geetettiyaa al"o shuchchaan shamettenna. 17 Work’k’aynne masttootiyaa oosetteedda miishshatuwaa gatii aanana likkettenna; work’k’aappe oosetteedda al"obankka laamettenna. 18 Aad’d’eeda eratetsaa gatii yeleeluwaappe, almmaaziyaappenne ink’k’uwaa ubbaappe aad’d’ee. 19 Toop’aaziyooniyaa giyaa Toop’p’iyaa ink’k’uukka aanana likkettenna; bertte work’k’aankka shamettenna.

20 «Yaatina, aad’d’eeda eratetsay hak’appe yii? Akeekay beettiyaa sa’ay hak’ee? 21 Pas’a de’iyaa med’etaa ubbaappe geemmi utteedda; saluwaa kafotuukka Aa demmikkino. 22 Bashshayinne hayk’k’uu, ‹Nuuni aad’d’eeda eratetsaw odo s’alala nu haytsaan siseeddo› yaagiino.

23 «Aad’d’eeda eratetsaakko afiyaa ogiyaanne I de’iyaa sa’aa eriyaawe S’oossaa s’alala. 24 Ayaw gooppe, S’oossay sa’aa gas’aa ubbaa s’eellee; salotuwaappe garssaana de’iyaawaa ubbaa be’ee. 25 S’oossay c’arkkoo wolk’k’aa immeedda wodenne shaariyaa haatsaa likkeedda wode, 26 iraykka hak’an bukkanentto, walk’k’antsaykka hak’an wod’d’anentto wogaa wotseedda wode, 27 I he wode, aad’d’eeda eratetsaa be’iide paac’c’eedda; lo"a geedda. 28 Hewaappe guyyiyaan, S’oossay asaw odiidde, ‹S’oossaw yayyiyaawe aad’d’eeda eratetsaa; iitaappe haakkiyaawekka akeeka› yaagee» yaageedda.✝28:28 Maz. 111:10; Lem. 1:7; 9:10