लैव्यव्यवस्था 15

शरीर क अशुद्ध स्राव

1 ओळतेन योहोवा मूसु आरू हारून सी कोयु, 2 "इस्राएलिया सी कयु कि जेका जेका ओदमीन सफेद पानी जातो होसे, ते चो प्रमेह कारण अशुद्ध ठरसे। 3 चो चाहे वोहयतो रये, चाहे वोहयनु बन्द भी होसे, तेभी उकान अशुद्धता बनी रवसे। 4 जेकान प्रमेह होसे चो जेका जेका खाटला पर लुटे चु अशुद्ध ठरसे, आरू जेका जेका चीज पर चु बठे भीत्यो अशुद्ध ठरसे। 5 आरू जु कुई हेका खाटला क हाथ लागाड़े त्यो आपसा छिंदरा धुवीन पाणी सी उंगव्या करे, आरू सांतो तक विटळ रये। 6 आरू जेको प्रमेह होय आरू चा जीन चीज पर बठला छे, उका पर जा कुई बठला चा आपना छिंदरा क धुवीन पाणी सी उंगव्या करे, आरू सांजु तक अशुद्ध ठरला रये। 7 आरू जेकान प्रमेह होय उका सी जु कुई हाथ लागाड़े जासे चा आपना छिंदरा क धुवीन पाणी सी उंगव्या करे आरू सांतो लग विटळ रये। 8 आरू जेका प्रमेह होय कदाम चा काहना शुद्ध छिंदरा क धुवीन पाणी सी उंगव्या करे, आरू सांतो तक विटळ रये। 9 आरू जेका न प्रमेह होय ची सवारी क जेका चीज पर बोठ्या चो विटळ ठरे। 10 आरू जु कुई काहनी चीज क जो उकान नेड़ा रया होसे हाथ लागाड़े, चो सांते तक अशुद्ध रये; आरू जो कुई ओसी काहनी चीज क उठावे चु आपना छिंदरा क धुवीन पाणी सी उंगव्या करे, आरू सांतो लग विटळ रये। 11 आरू जेका क प्रमेह होय चु जा काहना क बिना धुवीन हाथ लागाड़े चु आपना छिंदरा क धुवीन पाणी सी उंगव्या करे, आरू सांतो लग विटळ रये। 12 आरू जेका क प्रमेह होय चो धुवान जेका काहना पात्रा क हाथ लागाड़े तेनाक तुड़ न्हाख्या जासे, आरू काठ क सब प्रकार क पात्रा पाणी सी धुव्या जासे।

13 "ओळता जेका क प्रमेह होय तेनाक जव आपना रोग सी आरगाय होय जाय, तव सी शुद्ध ठरने क सात दाहड़ा गिन लेवु, आरू उनाक वीतने पर आपना छिंदरा क धुवीन वोहयता पाणी सी उंगव्या करे; तव चो शुद्ध ठरसे। 14 आरू आठवे दाहड़े ची दुय हुली या पेरवान दुय पीला लीन मिलापवाळा तम्बू क झोपला पर योहोवा क सामने जाईन हेका पुजारा क आपे। 15 तव याजक उना मा सी एक क पापबलि, आरू दीसरा क होमबलि क करता भेंट चढ़ाया; आरू याजक उकान करता उकान प्रमेह क कारण योहोवा क सामने पश्चाताप करे।

16 "ओळता कदाम काहना मानस क वीर्य स्खलित होय जासे, ते चा आपना सब शरीर क पाणी सी धुवे, आरू सांतो लग विटळ रये। 17 आरू जेका काहना छिंदरा या चामड़ा पर चा वीर्य पड़े तेनाक पाणी सी धुव्या जासे, आरू सांजु तक विटळ रये। 18 जव कुई मानुस बायर सी सहवास करे, ते चा दुयु पाणी सी उंगव्या करे, आरू सांतो लग विटळ रये।

19 "ओळता जव कुई बायर‌ मासिकधरम रये, ते चो सात दाहड़े तक अशुद्ध ठरलो रये, आरू जु कुई ओका हाथ लागाड़े त्यो सांतो तक विटळ रये। 20 आरू जव तक चो अशुद्ध रये तव तक जेका जेका चीज पर चा लुटे, आरू जेका जेका चीज पर बोठे चा सब विटळ ठरसे। 21 आरू जु कुई ओकान खाटला क हाथ लागाड़े चु आपना छिंदरा धुवीन पाणी सी उंगव्या करे, आरू सांतो तक विटळ रये। 22 आरू जु कुई काहनी चीज क हाथ लागाड़े जेका पर ची बोठी होसे चा आपना छिंदरा धुवीन पाणी सी उंगव्या करे, आरू सांतो तक विटळ रये। 23 आरू कदाम खाटलो या दीसरो काहना चीज पर जेका पर ची बोठी होसे हाथ लागाड़नेन टेमे ओकान रुधिर लागाड़ होसे, ते सुनेहरो सांतो तक विटळ रये। 24 आरू कदाम कुई मानुस उका सी प्रसंग करे, आरू ओकान रुधिर ओकाह लाग जाए, ते चु मानुस सात दाहडे तक अशुद्ध रये, आरू जेका जेका खाटला पर चु लुट्यु चा सब विटळ ठरसे।

25 "ओळता कदाम काहनी बायरक आपना नावनीन टेम सी जादा दाहड़ा तक लुहूय वोहयतो रवे, या उका नेमला टेम सी जास्ती टेमे तक मासिकधर्म रवे, ते जव तक चो ओसी दशा मा रवे तव तक चो विटळ रये। 26 उकान मासिक धर्म रवनेक सब दाहड़ा मा जेका जेका खाटला पर चो लुटे चा सब उकान मासिक धर्मान खाटलान समान ठरसे; आरू जेकी चीज पर चा बोठे चा भी उकान मासिक धर्म रयनेक दाहड़ान सारकी विटळ रये। 27 आरू जु कुई उना चीजक हाथ लागाड़े चो विटळ ठरसे, एरकरता चो आपना छिंदरा क धुवीन पानी सी उंगव्या करे, आरू सांतो तक विटळ रवे। 28 पुन जव ची बायर आपना मासिक धर्म सी चुखी हुय जासे, तव सी चा सात दाहड़ा गिन ले, आरू उना दाहड़ाक जाने पर ची चुखी हुसे। 29 पछा आठवे दाहड़े चा दुय पंडुक या कबुतरा क दुय पीला लिन मिलापवाळा तम्बू क झोपला पर पुजारा जुळ जाय। 30 तव याजक एक क पापबलि आरू दिसरान होमबलिक करता चढ़ाया; आरू याजक करता मासिक धर्मान विटळ हुयनेन कारण यहोवान सामने पछतावु करे।

31 "ओका गत तुमु इस्राएलियाक उनाक विटळ हुयने सी अलग मेक्या करे, का ओसो नी होए कि चा योहोवाक निवास क जा उकान वीचमा छे अशुद्ध करीन आपनी विटुळ हुयनेन कारण मर जाय।"

32 जेकान प्रमेह होय आरू जा मानसे वीर्य स्खलित होयने सी विटळ रये; 33 आरू जी बायर मासिक धर्म सी हय; आरू काय मानसे काय बायर अशुद्ध बायर सी प्रसंग सी करे, इना सभा क करता यी नियम छे।