लैव्यव्यवस्था 7

दोषबलि

1 यी दोष-बलिन व्यवस्था छे: ची घण चुखो छे। 2 जिना जागा मा आग्ठा क बलि क पशु क वध करता छे, हेका स्थान मा दोष-बलि लीन पशु क वध कर्‍यो जासे, आरू उकान लुहूय वेदीक चार तरफ छिड़की जासे। 3 उकान माइन सब चरबी क चढ़ावे: हेका चरबो भारी चरबी वाळी सेमटी, आतड्याक ढ़ाकने वाळो चरबो बी, 4 दुयु गुर्दा आरू चो चरबो जो उकान ऊपर आरू कमर क जु रवती छे, आरू गुर्दा क साथ मा काळजान ऊपरली जाळी इनु सब कहो अलग करे । 5 पुजारो हेको वेदी पर धोपाड़े। चु पोरबु क आग्ठा मा अर्पित गुणानन-बलि छे। 6 याजक मायीन सब मानुस ओकामा सी खाय सके; चा काहना चुखलास्थान मा खाया जासे; काहकी चु घण चुखो छे। 7 जोसो पापबलि छे तोसोज दोषबलि भी छे, हेनु दुयन एकुज व्यवस्था छे; जो पुजारा हेनु बलिक चढ़ावीन पाप ढाकीन करे त्यात् हेनु चीजक लेये। 8 आरू जु याजक काहना क करता होमबलि क चढ़ावे उनी होमबलि पशुन खाल क त्यो पुजारो ली लेय। 9 आरू भट्टी मा, या कढ़ाया मा, या तवा पर चुढ़लो सब अन्नबलि उनात् याजकन हुयसे जो हेको चड़ावे। 10 आरू सब अन्नबलि, जो चाहे तेल करीन झारलो चाहे सुकलो हय, चा हारून क सब पोर्‍यान क एक समान जोड्या।

मेलमिलापबलि

11 "मेलबलि क, जेका कुई योहोवा क करता चढ़ावे व्यवस्था यी छे: 12 कदाम चा उका धन्यवाद क करता चढ़ाया, ते धन्यवादबलि क साथे तेल करीन चुड़ली अखमीरी पुड़ी, आरू तेल सी चुपड़ली अखमीरी रोटा, आरू तेल करीन चुड़ला मयदान क पुड़ी तेल सी भेसकला चढ़ावे। 13 आरू चो आपनो धन्यवादवाळा मेलबलि क साथ खमीरी रोटा भी चढ़ाया। 14 आरू ओसो एक एक चढ़ावा मा सी चा एक एक रोटो योहोवा क भेंट करीन चढ़ाया; चा मेलमिलापबलि न लुहूय क छिड़कनेवाळा पुजारान हुयसे। 15 आरू उका धन्यवादवाळा मेलबलि क मांस बलिदान चढ़ावने क दाहड़े खादा जासे; उकामा सी काहय भी भोर तक शेष नी रया जासे। 16 पुन कदाम बलिदान क चढ़ावो मन्नत क के स्वेच्छा क होय, ते उका बलिदन क जेके दाहड़े चो चढ़ाया जासे उके दाहड़े चो खादा जासे, आरू उका मा सी जा शेष रय जासे चो दीसरे दाहड़े भी खादा जासे। 17 पुन जु काहय बलिदान क मांस मा सी तीसरे दाहड़े तक रय जासे तेनाक आग्ठा मा धोपाड़े जासे। 18 आरू उकान मेलबलि क मांस मा सी कदाम काहय भी तीसरे दाहड़े खादा जासे, ते चा ग्रहण नी कर्‍या जासे, आरू नी उकान हित मा गिनियो जासे; चो घाड़्च्या काम समझा जासे, आरू जु कुई उकामा सी खादा ओधोरोम उका क मुनका पर पड़से।

19 "ओळतेन जो मांस काहना अशुद्ध चीज हाथ लागाड़े जासे चो नी खाया जासे। ओळतेन मेलबलि क मांस जोतरा शुद्ध होय चाज खाए, 20 पुन जु अशुद्ध होईन योहोवा क मेलबलि क मांस मा सी काहय खाए चा आपना लोगहन मा सी नाश कर्‍या जासे। 21 आरू कदाम कुई अशुद्ध चीज क हाथ लागाड़ीन योहोवा क मेलबलिपशु क मांस मा सी खाए, चा भी आपना लोगहन मा सी नाश कर्‍या जासे, चाहे चु मानुस क कुई अशुद्ध चीज या अशुद्ध पशु या कुई भी अशुद्ध आरू घाड़्च्या चीज होसे।"

22 ओळतेन योहोवा मूसा सी कयो, 23 "इस्राएलिया सी इनीये रीतिये कय: तुमु लोगहन नी ते बुयल क काहय चरबो खानो आरू नी गाडरा निते बुकड़ी क। 24 आरू जु पशु खुद मर जाए, आरू जु दीसरा पशु सी फाड़े जासे, ओकान चरबो दीसरा काम मा लेनो, पुन उका काहना प्रकारण सी खानो नी। 25 जु कुई ओसो पशु क चरबो खासे जेरामा सी लोगहन काहय योहोवा क करता बलिदान करीन चढ़ाया करता छे, चो खानेवाळो आपना लोगहन मा सी नाश कर्‍या जासे। 26 आरू तुमु आपना घर मा काहना भाँतिन क लुहूय, चाहे चिल्ला क चाहे पशु क होय, नी खानो। 27 हर एक प्राणी जौ काहनी भाँतिन लुहूय खासे चो आपना लोगहन मा सी नाश कर्‍या जासे।" 28 ओळतेन योहोवा मूसा सी कयो, 29 "इस्राएलिया सी ओका प्रकार कयो: जो योहोवा क करता मेलबलि चढ़ाया ची उको मेलबलि मा सी योहोवा क जु भेंट ली आया; 30 चा आपनाज हाथ सी योहोवा क हव्य क, मतलब छाती समेत चरबो क ली आया कि छाती हालावने क भेंट करीन योहोवा क सामने हालाया जासे। 31 आरू याजक चरबा क ते वेदी पर धोपाड़्या, पुन छाती हारून आरू ओकान पोर्‍या क होसे। 32 आरू तुमु आपना मेलबलि मा सी डाखर्‍यु जाँग क भी उठावने क भेंट करीन याजक क आपनु; 33 हारून क पोर्‍या मा सी जो मेलबलि क लुहूय आरू चरबा क चढ़ाया डाखर्‍यु जाँग उका क भाग होसे। 34 काहकी इस्राएलिया क मेलमिलापबलि मा सी हालावने क भेंट क छाती आरू उठावने क भेंट क जाँग क लीन हाव ते याजक हारून आरू उकान पोर्‍योक आप्या छे कि यो हमेशा इस्राएलिया क तरफ सी उनाक हक बवनो रया।

35 "जिन दाहड़े हारून आरू ओकान पोर्‍याक योहोवा क समीप याजक पद क करता लाया जासे ओकी दाहड़े योहोवा क बलिदान मा सी उनाक यी अभिषिक्त भाग ठराया गोया; 36 मतलब जिन दाहड़े योहोवा उनाक अभिषेक कर्‍या उके दाहड़े ओका हुकुम देदो कि उनाक इस्राएलिया क तरफ सी या भाग नित्य जोड़े कर्‍या; उनाक पीढ़ी पीढ़ी क करता उनाक यो हक जड़ीयो गोया।" 37 होमबलि, अन्नबलि, पापबलि, दोषबलि, याजक क संस्कार बलि, आरू मेलबलि क व्यवस्था यी छे; 38 जव योहोवा सीनाय बोयड़ा क उजाड़ी जागा मा मूसा क हुकुम देदा कि इस्राएली मार करता काय काय चढ़ावो चढ़ायो, तव ओको उनाक यी व्यवस्था देदी हती।