लैव्यव्यवस्था 4

पापबलि न नियम

1 पछो यहोवा न मूसा सी कयो, 2 इस्राएलिया सी यो कोय कि कदाम कोय मनुस उना कामो मा सी जीनाक यहोवा मना करलो छे, काहना काम क विसरीन करीन पापी होय जाए; 3 आरू कदाम अभिषिक्त याजक ओसो पाप करे जेका सी प्रजा दोषी ठरसे, ते आपना पापन कारण चु एक पूरो आरेगलो बयल्यो योहोवा क पापबलि करीन चढ़ाया। 4 त्यो उना बयल्यान क मिलापवाळा तम्बू न झोपला पर योहोवा क ओगव ली जाईन उकान मुनका पर हाथ मेके, आरू उका बयल्यान क योहोवा क सामने बलि करे। 5 आ रू अभिषिक्त पुजारो बयलशयान क लुहूय मा सी काहय लीन मिलापवाळा तम्बू मा ली जाय; 6 आरू पुजारो आपसी आंगळी लुहू मा डुबाड़ी-डुबाड़ीन आरू हेकामा सी काहय लीन चुखला जागान वीच माहयला परदान क ओगळ यहोवान सामने सात वार छिड़के। 7 आरू पुजारो हेका लुहूय मा सी लीन वारू गंधायने वाळा धुपन वेदीन क सिंगड़ा पर जो मिलापवाळा तम्बू मा छे यहोवान क सामने लगाड़े; ओळी बयल्यान क सब लुहूय वेदीन क पाया पर जो मिलापवाळा तम्बून झपला पर छे रेड़ देय। 8 पछु चु पापबलि क बयल्यान क सब चरबी हेका सी अलग करे, आरू जीनी चरबी सी आतड़ा ढाकायला रवता छे, आरू जोतरो चरबो उना मा चिपकली रवती छे, 9 आरू दुयु गुर्दा आरू उना क उपर क चरबो जो कमर क जु रवती छे, आरू गुर्दा समेत कावजा ऊपर ली जाळी, इना सभा क अलग करे, 10 जोसो मेलमिलापन बलिवाळा चढ़ावा क बयल्या सी अलग कर्‍या जाता छे, आरू याजक इनुक होमबलि कर्‍या वेदी पर धोपाड़ीयो। 11 पुन उना केवड़ा क खाल, पाये, मुनको, आतड़ा, गुबर, 12 आरू सब मांस, मतलब पूरो बयल्यो पड़ाव सी बाहरते चुखला जागा मा, जा रूखड़ो नाखे, ली जाईन लाकड़ा पर मेलीन आग्ठा सी धोपाड़़े; जा रूखड़ो न्‍हाखे तेखे व्हा धपाड़े। 13 "कदाम इस्राएल क सब मण्डली अज्ञानतान कारण पाप करे आरू ची वात मण्डली क डुवा सी धोपाय छे, आरू चा योहोवा क काहनी हुकुम क विरूध्द काहय करीन दोषी ठर्‍या छे; 14 ते जव उकान करीन पाप प्रगट होय जाय तव मण्डली एक केवड़ा क पापबलि करीन चढ़ाया। चा उका मिलापवाळा तम्बू क ओगव ली जाय, 15 आरू मण्डळीन डाहला लोगहन आपना आपना हाथ क योहोवा भगवान क ओगळ बयल्या क मुनका पर मेके, आरू चो बयल्या क योहोवा भगवान क सामने बलि कर्‍या जासे। 16 तव अभिषिक्त याजक बयल्यान ज लुहूय मा सी मिलापवाळा तम्बू मा ली जासे; 17 आरू याजक आपनी आंगुळ लुहूय मा डुबाड़ीन हेका वीचमाहयला परदा क ओगव सात वार योहोवा क सामने छिड़के। 18 आरू हेका लुहूय मा सी वेदीन सिंगड़ा पर जो यहोवान ओगळ मिलापवाळा तम्बू मा छे लगाड़े; आरू वाचला सब लुहूय होमबलि न वेदी क पाया पर जो मिलापवाळा तम्बू क झोपला पर छे रेड़ देय। 19 आरू त्यो बयल्यान सब चरबी निकाळीन वेदी पर धपाड़ देय। 20 जसो पापबलिन बयल्या सी करला हुता तसोज हेका सी भी करे; इनीये रीतिये पुजारो इस्राएलियान पाप क ढाके, तव उनाक चो पाप माप करलु जासे। 21 आरू चा बयल्यान क पड़ाव सी बाहरो ली जाईन इनिये रीतिये धपाड़े जसो पेहला बयल्यान क धोपाड़यो हतो; यी मण्डलीन करता पापबलि हुयसे।

22 "जव कुई मुखि मानुस पाप करीन आपना परमेश्वरन योहोवा क काहनी हुकुम क विरूध्द मा विसर भूले सी काहय करीन दोषी होय जासे, 23 आरू उकान पाप उका पर प्रगट होय जासे, ते वा एक निर्दोष बुकड़ो बलिदान करने क करीन ली आया; 24 आरू बुकड़ा क मुनका पर आपना हाथ धरे, आरू बुकड़ा क उका जागा पर बलि करे जा होमबलि योहोवा भगवान क ओगव बलि कर्‍या जाता छे; या पापबलि ठरसे। 25 तव पुजारो आपनी आंगुव सी पापबलि क लुहूय मा सी काहय लीन होमबलि क वेदी क सिंगड़ा पर लागाड़े, आरू उकान लुहूय होमबलि क वेदी क पाय पर नाख दे। 26 आरू चा उकान कुल चरबा क मेलबलि क समान वेदी पर धोपाड़े; आरू याजक उकान पाप क विषय मा पश्चाताप कर, तव चु माप कर्‍यु जासे।

27 "कदाम साधारण लोगहन मा सी कुई विनअकल सी पाप करे, हेनू काम क जिनू सी योहोवा भगवान मना कर्‍यु हेके करे ती त्यो दोषी हुयसे, 28 ते चा उका पाप क कारण एक निर्दोष बुकड़ी बलिदान क करता ली आया; 29 आरू चु आपना हाथ पापबलिपशु क मुनका पर मेके, आरू होमबलि क जागा पर पापबलिपशु क बलिदान करे। 30 आरू याजक उकान लुहूय मा सी आपनी आंगुव सी काहय लीन होमबलि क वेदी क सींगड़ा पर लागाड़े, आरू उकान सब लुहूय क उका वेदी क पाय पर माख दे। 31 आरू ची उकान सब चरबा क मेलमिलाप बलिपशुन चरबीन क सारको अलग करे, तव याजक ओका वेदी पर योहोवा क करता सुखदायक सुगन्ध क करता धोपाड़े; आरू ओका प्रकार याजक करता पश्चाताप करे, तव उका मापी जोड़से।

32 "कदाम चु पापबलि क करता एक गाडरीन पीलो ली आयो, ते चु पूरो आरेगलो मादा होय, 33 आरू चु आपना हाथ पापबलि क मुनका पर मेके, आरू उकान पापबलि क करता चोज बलिदान करे जा होमबलिपशु बलि कर्‍या जाता छे। 34 तव याजक आपनी आंगुळ सी पापबलिन लुहूय मा सी काहय लीन होमबलि क वेदी क पाय पर नाख दे। 35 आरू त्यो हेकी सब चरबी क मेलबलिवाळा गाडरान पीलान चरबी समान अलग करे, आरू याजक उका वेदी पर योहोवा क हवन क ऊपर धोपाड़े; आरू ओका प्रकारन याजक उकान पाप क करता पश्चाताप करे, आरू तिनाक माप कर दे जासे।