1 पछु योहोवा भगवान मूसा सी कयो, 2 इस्राएलियाक सब मण्डली सी कईन तुमु चुखला बोवना रयु; काहकी हाव तुमरो परमेश्वर योहोवा पवित्र छेव। 3 तुमु आपनी आपनी आयाक आरू आपना आपना बासक भीख माननु, आरू मारा आरामक दाहड़ाक माननु; हाव तुमरू परमेश्वर योहोवा छेव। 4 तुमु मुर्तिक तरफ नी फिरनु, आरू देवतान फुटा न्हाखिन नी बनाव लेनु; हाव तुमरू परमेश्वर योहोवा छे।

5 जव तुमु योहोवाक करता मेलबलि करू, तव ओसो बलिदान करनु जेका सी तुमु सी खुश होय जाऊ। 6 उकान मांस बलिदानक दाहड़े आरू दिसरे दाहड़े खाए जासे, पुन तीसरे दाहड़े तक जा रय जाए चा आग्ठा मा धोपाड़ देय जासे। 7 कदाम उकामा सी काहय भी तीसरे दाहड़े खाए जासे, ते यो घाड़्च्या ठरसे, आरू ग्रहण नी कर्‍या जासे, 8 आरू उकान खानेवाळा योहोवाक पवित्र चीजक विटुळ ठरावता छे, एरकरता उकान आपना अधर्मक भार खुद उठावनु पड़से; आरू चो प्राणी आपना लोगहन मा सी नष्ट करे जासे।

9 पछा तुमु आपना देश क खेत काटो तव आपना खेतक कुपरे तक पुरो नी कादनु, आरू काटला खेतक पड़ली ओसला झोठाक नी नेवाड़नु। 10 आरू आपनी दाखक वाड़ीक दाना दानान तुड़ लेनु, आरू आपनी दाखक वाड़ीक झोड़ला अंगुरक नी चुटनु; हेका दाहड़े आरू परदेशी लोगहन क करता छुड़ देनु; हाव तुमरू परमेश्वर योहोवा छेव।

11 तुमु चुरी नी करनु, आरू एक दिसरा सी नी ते कपट करनु, आरू नी झुठ बुलनु। 12 तुमु मारा नावक झुठी शपथ खाईन आपना परमेश्वरक नाव विटुळ नी करनो; हाव योहोवा छेव।

13 एक दिसरा पर आन्धारो नी करनु, आरू नी एक दिसराक लुट लेनु। मजदुरन मजदुरी तार जु आखी रात सोंदारे तक नी रय सके। 14 बोयराक शाप नी देनु, आरू आंधवाक ओगव ठुकर राखनु; आरू आपना परमेशवरक भीख माननु; हाव योहोवा छेव।

15 न्याय मा कुटिलता नी करनु; आरू नी ते कंगालक पक्ष करनु आरू नी मोटला मानसक मुहय देखनु विचार करनु; एक दिसराक न्याय धर्म सी करनु। 16 लुतरा बनीन आपना लोगहन मा नी फिर्‍या करनु, आरू एक दिसराक लुहुय वोहयनेन युक्ति नी बांधनु; हाव योहोवा भगवान छेव।

17 आपना मन मा एक दिसराक प्रति खत नी मेकनु; आपने नाट घर वाळाक नक्कि डाडनु, नी ते उकान पापक भार तुखेक उठावनु पड़से। 18 बदलो नी लेनु, आरू नी आपसा लोगहन सी खत राखनु, पुन एक दिसरा सी आपने समान मोंग राखनु; हाव योहोवा भगवान छेव।

19 तुमु म्हारा नियम जलोमका मान। आपजो तमरा पाळनिया जनवार क दिसरी जातिन जनवार सी प्रजनन झुन करने देनु; आपना खेत मा दुय प्रकारक बीजा एकठा नी वेरनु; आरू झारीन आरू ऊनान मिलावट सी बोवना होया छिंदरा नी पेहरनु।

20 "पछी एकदी बायर दासी होसे, आरू उकान इहाव एकदा मानसक सी होई होसे, पुन चो नीते दाम सी आरू नी सेंतमेंत स्वाधीन करी गई होसे; उकासी कदाम कुई कुकर्म करे, ते उना दुय दाहड़ाक दण्ड ते जोड़े, पुन उका बायरक स्वाधीन नी होयनेक कारण चा दुयु मार नी न्हाखे जासे। 21 पुन चो मानुस मिलापवाळा तम्बूक झोपला पर योहोवाक जु एक गाडरो दोषबलिक कारण ली आया। 22 आरू याजक ओकान कर्‍या होया पापन कारण दोषबलिक गाडराक द्वारा ओकान करता योहोवाक सामने पश्चाताप करे; तव ओकान कर्‍या होया पापक माप कर्‍या जासे।

23 "पछा जव तुमु कनान देश मा पुगीन काहना प्रकारक फोव झाड़को लागाडु, ते ओकान फोव तुमरे करता मानु खतनारहित ठरला रवे; एरकरता उनामा सी काहय नी खादा जासे। 24 आरू चौथा साल मा ओकान सब फोव योहोवाक स्तुति करनेक करता पवित्र ठरसे। 25 तव पाचवा साल मा तुमु ओकान फोव खानु, एरकरता के उकासी तुमुक बैस फोव जोड्या; हाव तुमरा परमेश्वर योहोवा छेव।

26 "तुमु लुहुय लागाड़लो ओसलो मांस नी खानु। आरू नी जादु टोनु करनु, आरू नी शुभ या अशुभ मुहूर्तोक माननु। 27 आपना मानुका मा घेरा मेकिन नी काडनु, आरू नी आपना गालक झोठाक काडनु। 28 मरला धोड़न कारण आपना डिलक बिलकुल नी चीरनु, आरू नी उकमा छाप लागाड़नु; हाव योहोवा छेव।

29 "आपनी पोरायक वेश्या बनावीन विटुळ नी करनु, ओसो नी होय कि देश वेश्यागमनक कारण महापाप सी भर जासे। 30 मारा आरामक दाहड़ाक मान्या करनु, आरू मारा पवित्रस्थानक डर हमेशा माननु; हाव योहोवा छेव।

31 "ओझाओं आरू भुतड़ा साधनेवाळाक तरफ नी फिरनु, आरू ओसोज खोज करीन उनाक अशुद्ध नी होय जानु; हाव तुमरू परमेश्वर योहोवा छेव।

32 "डाहला लोगहन क सामने उभरय जानु, आरू डाहयलाक आदरमान करनु, आरू परमेश्वरक डर हमेशा माननु; हाव योहोवा छेव।

33 "कदाम एकदु परदेशी तुमरा देश मा तुमरे साथे रये, ते ओकाह दु:ख नी देनु। 34 जा परदेशी तुमरे साथे रये चा तुमरे करता आपना देशन समान रवसे, आरू ओकासी आपने समान मोंग राखता; काहकी तुमु भी मिस्र देश मा परदेशी हता; हाव तुमरू परमेश्वर योहोवा छेव।

35 "तुमु न्याय मा, आरू परिणाम मा, आरू तौल मा, आरू नाप मा कुटिलता नी करनु। 36 सच्ची ताकड़ी, धर्मक बटखरे, सच्चु एपा, आरू धर्माक हीन तुमरे जु रये; हाव तुमरू चु परमेश्वर योहोवा छेव जो तुमुक मिस्र देश सी निकाळ ली आया। 37 एरकरता तुमु मारी सब विधिया आरू सब नियमक मानता जाईन हमेशा पालन करू; हाव योहोवा छेव।"