Levítico 26

नेम पाळनेन फोव

1 तुमु आपसा जुगु मुरती झुन बोनावता, आरू नी काहनी खुन्दली मुरती आरू खाम्बा काजे उबु कोरू, आरू नी आपसा मुलुकोम वांदने कोरीन दोगड़ाक घोड़ीन उबु कोरू; काहकि हांव तुमरू योहोवा भोगवान छे। 2 तुमु मारा आरामोन दाहड़ान पाळनी पावजु आरू मारा चुखला जागान बीक राखजु; हांव योहोवा भोगवान छे।

3 कोदाम तुमु मारा कायदा पोर चालु आरू मारा हुकुम काजे मानीन तेनुन पाळनी पाळजु, 4 ती हांव तुमरे जुगु टेम टेम पानी पाड़ीस, आरू धोरती आपसी मेर उगाड़से, आरू खोयड़ान झाड़का पोर आपसो आपसो फोव फोळसे; 5 यां लोगुन कि तुमु ओंगुर तुड़नेन टेमे दावनी कोरता रोवसु, आरू वेरनीन टेम पोर वी पेट भोरीन खाया कोरसु, आरू तुमुक गोंहोवता रूटा खाया कोरसु, आरू आपसा मुलुकोम बेफिकरीया रोया कोरसु। 6 आरू हांव तुमरा मुलुकोम सुक शान्ति आपीस, आरू तुमु सुवसू आरू तुमुक बिहाड़नेवावो नी रोवे; आरू हांव तुमरा देसोम जोंगली जोनवारे जे मानसोन नुकासानी कोरे तेनुक रोवने नी देयो, आरू काहनो वी मुलकेम वावा तुमरे भुने तोलवार नी चालाड़े। 7 आरू तुमु आपसा वेरी काजे कुटिन ढासाड़ देसु, आरू चे तुमरी तोलवार सी हिट पोड़से। 8 तुमरेम पाच मानसे सोव जोनाक आरू सोव मानसे होजार जोनाक नी बोदे; आरू तुमरा वेरी तुमरे ओगोव हिट पोड़से; 9 आरू हांव तुमरे भेनी गिनोन निंगा राखीस आरू तुमुक बोरकोत आपीस आरू गिनाये नी ओसा होय जासु, आरू तुमरे पुठी मारू वायदु पुरू कोरीस। 10 आरू तुमु मेकला जुनला ओनो काजे खाया कोरसु, आरू नोवलो ओन रोवसे ते वी जुनलो ओन खासु। 11 हांव तुमरे विच मा रोया कोरीस, आरू मारो जीव तुमरे सी घाड़ाय नी कोरे। 12 आरू हांव तुमरे विच मा चाल्या फिर्या कोरीस, आरू तुमरू भोगवान रोवीस, आरू तुमु मारा मानसे बोना रोवसु। 13 हांव योहोवा, तुमरू परमेश्वर छे। हांव तुमुक मिसर मुलकोम गोथु निकाय लावलु कि तुमु मिसर वावान पावरीया बोनला नी रोवु; आरू हांव तुमरा जुड़ाक तुड़ नाख्यु, ततरू तुमु सुदु उबु कोरीन चालाड़्यु।

हुकुम नी माननेन डोन

14 कोदाम तुमु मारी नी सोमवु, आरू एनू आखा हुकुम काजे नी मानसु, 15 आरू मारा कायदा काजे उदुड़ जानसु, आरू तुमरो जीव मारा नियाव सी घाड़ाय कोरू, आरू तुमु मारा आखा हुकुमोन पाळोन नी कोरसु, पुन मारा वायदाक तुड़सु, 16 ती हांव तुमरे सी ओसु कोरीस; मोतलोब हांव तुमरे सी डोगाय जाईस, आरू टीवीन बिमारी आरू सेरी सी मांदु पाड़ीस, आरू जेरेसी तुमरा डुळा धुंदवाय जासे, आरू तुमरे मोन धोनो घाबराय जासे। आरू तुमरा बिज बिगड़ी जासे, काहकि तुमरा वेरी तुमरी मेर खाय जासे; 17 हांव तुमरे भेनी गोथु आड़ु भाय लिस, जेरेसी तुमु आपसा वेरी ओगोव हार जासु। जिनुसी तुमु घाड़ाय कोरे, चेत् तुमरे पोर होक कोरसे। तुमरे पोछोळ कुदु नी पोड़े, तीवी तुमु ढासता रोवसु। 18 आरू कोदाम तुमु इनी वातोन ओळतेन वी मारी नी सोमवु, ती हांव तुमरा पापोन कोरता तुमुक सातगुना वेला आपीस, 19 आरू हांव तुमरा ताकोतोन घाड़ाय काजे तुड़ दीस, आरू तुमरे जुगु वादवा काजे लुहड़ा जोसु वातड़ु, आरू धोरती काजे पीतवो जोसु बोनाय दीस की पानी नी पोड़से। 20 तो्यार धोरती पोर तुमरी आखी मेहनोत वायबार होय जासे; काहकि धोरतीन मेर नी उगे आरू खोयड़ान झाड़े फोव नी फोवे।

21 कोदाम तुमु मारे विरूद् चालतात् रोवसु, आरू मारो कोवनो नी मानु, ती हांव तुमरा पापोन ओनसारे तुमरे पोर आरू सातगुना वेला आपीस। 22 आरू हांव तुमरे विच जोंगली जोनवारे मुकलीस, जे तुमरा पुर्याक तुमरेनचा गोथा चुटलीन जात रोवसे, आरू तुमरा घोरून ढुरोक फाड़ खासे, आरू तुमरी गिनती कोम होय जासे, , जेरेसी तुमरी सोयड़ोक सुनी पोड़ जासे।

23 "ओळी कोदाम तुमु एनू वातो पोर वी मारी आपली गरा सी नी सुदरू, आरू मारे विरुद् चालतात् रोवसू, 24 ती हांव वी तुमरे विरुदच चालीस, आरू तुमरा पापोन कोरता हांव आपसुत् तुमुक सातगुना दीस। 25 हांव तुमरे पोर वेरीन होमलु कोरावीस, जु वायदु तुड़नेन पुरून पुरू बोदलु लेसे; आरू जो्त्यार तुमु आपसा सोहरोम एकठा होयसु ती हांव तुमुरे पोर काळ मुकलीस आरू तुमु वेरीन हातोम धोराय जासु। 26 जोत्यार हांव तुमरे जुगु खानेन ओन तुमरे जुळ गोथु छेटु कोर दीस, तोत्यार दोस बायरा एकुत तोवा पोर रूटा बोनावसे, आरू चे तुमुक रूटा तुली तुलीन आपसे, आरू तुमु रूटा खासु ती वी नी आफरू।

27 ओळी कोदाम तुमु एनी वातोन ओळतेन वी मारी नी सोमवु, आरू मारे विरुद् चालता रोवसु, 28 ती हांव मारो नियाव तुमरे विरुद् चालीस, आरू तुमरा पापोन कोरता तुमुक सातगुना लोगुन वेला ओवी जादा आपीस। 29 आरू तुमुक आपसा पुर्या आरू पुरायटान मास खानो पोड़से। 30 आरू हांव तुमरा डाहडान पुजा कोरनेन उचला जागाक उदार दीस, आरू तुमरी धुपोन वेदी काजे नास कोर दिस। तुमरा देवता काजे उदेरला मुरतिया पोर तुमरा धोड़ नाखीस। आरू मारू जीव तुमरे सी सीगी कोरसे। 31 आरू हांव तुमरा सोहरोक उजाड़ दिस, आरू तुमरा चुखला जागाक उजाड़ दिस, आरू तुमरा सुकोन गोंदायन्या काजे नी सुंगो। 32 आरू हांव तुमरा मुलुक काजे सुनलो कोर दिस, आरू तुमरा वेरी जे जां रोवे चे इनी वातोन कोरता ओका बोकी होय जासे। 33 आरू हांव तुमुक बेसका मुलकोम रिवन्या तिवन्या कोरीस, आरू तुमरे विरूद् आपसुत् तोलवार काजे निकाव लीस। तुमरो मुलुक सुनलो होय जासे। तुमरो सोहोर उजाड़ होय जासे।

34 जोत्यार लोगुन तुमु आपसा वेरीन मुलकोम रोवसु आरू तुमरी जागा सुनली पोड़ रोवसे, तोत्यार लोगुन धोरती आरामोन सालोन खुसी सी पाळनी पाळसे। धोरती आराम कोरसे आरू आरामोन सालोन खुसी सी पाळनी कोरसे। 35 जोतरा दाहडा हुयो सुनलो पोड़ रोवसे तोतरा दाहड़ा तिनाक आराम रोवसे, मोतलोब जो आराम तुमरे होंया रोवते तुमरा आरामोन टेम मा नी जोड़्यो होसे चो तव जोड़से। 36 आरू तुमरे मा गोथो जे वाचला रोवसे आरू आपसा वेरी मुलकोम होसे तिन्दरा मोनोम बिक बोसाड़ दीस; आरू चे पान्टा खोकेड़से ती वी ढास जासे, आरू चे ओसा ढाससे जोसा तोलवार सी वाचने ढासे, आरू कुदु पोछोव नी पोड़े ती वी चे झोटवायता ने पोड़ता जासे। 37 जोत्यार कुदु पोछोव नी आवे ती वी ओसा जासे जोसा तोलवारोन बीके एक दिसरान आफठायीन पोड़ जासे, आरू तुमरेम आपसा वेरी ओगोव उबरोवने हेमो नी रोवसे। 38 तोत्यार तुमु मुलको मा पुगीन नास होय जासु, आरू तुमरा वेरीन जागा तुमुक खाय जासे। (तोत्यार तुमु मुलको मा पुगीन मोर जासु, तुमरा वेरीन जागा मा गाड़ाय जासु) 39 आरू तुमरेम गोथा वाचला रोवसे चे आपसा वेरीन मुलकोम आपसा गुनान कोरता गोळ जासे; आरू आपसा डाहडान गुनान कामोन कोरता वी चे तिन्दरेन्द तोसा गोळ जासे।

40 पुन कोदाम चे आपसा आरू आपसा बासोन गुनाक मान लेय, मोतलोब जे मारे साते धुकु कोरीन आरू मारा कोयान नी चाल्या। 41 ओतरान कोरता हांव हेन्दरे विरुद् चाल्यु, आरू हेनुक वेरीन मुलकोम ली आवलु, कोदाम चे आपसा वातड़ा जीयोक निचवो कोरसे, आपसा गुनान डोन काजे मान लेसे। 42 ती हांव याकुब, इसहाक आरू ओबराहाम पुठी वायदु बांदलु चु फोम कोरीस, हांव तुमरा जागा काजे फोम कोरीस। 43 पुन चो देस हेन्दरे गोथो पेहेल सुनलो होयीन पोड़लो रोवसे, आरू हेन्दरे विगुर रोवीन वी आपसा आरामोन टेम काजे मानतो रोवे; आरू चे मानसे आपसा गुनान डोन काजे मानसे, ओतरान कोरता कि हुये मारा हुकुम काजे नी मान्या, आरू हेन्दरा जीयो काजे मारा नेम सी घाड़ाय होती। 44 ओतरा पोर वी जोत्यार चे आपसा वेरीन मुलकोम होसे तोत्यार हांव तेनुक ओस कोरीन नी छुड़ो, आरू नी हेनुसी ओसु सिगी कोरो कि हेन्दरो नास कोर नाखो आरू आपसा वायदा काजे तुड़ दोम जो हांव हेनुसी वायदु कोरलु होतु; काहकि हांव हेन्दरू योहोवा भोगवान छे; 45 पुन हांव हेन्दरी भोलाय जुगु हेन्दरा बासो सी बान्दला वायदा काजे फोम कोरीस; जेनुक हांव आड़जात्यान डुळा ओगोव मिसर मुलकोम गोथु निकावीन लायु कि हांव हेन्दरु भोगवान कोवायो; हांव योहोवा भोगवान छे।

46 जे-जे नेम कायदा आरू नेम आरू हुकुम योहोवा भोगवान आपसे वोगे गोथु इसराएली मानसो जुगु सिनाय बोयड़ा पोर मुसान लारे कोयु चे येत् छे।