1 Aule Kjnajchts, waut unja daut Joch sent, sellen äare Haren aule Iea wieet hoolen, om daut nich Gott sien Nomen un de Lia velastat woat. Efs 6:5-8; Tit 2:9-10

2 Woone oba jleewende Haren haben, sellen dee nich ve-achten, wiels see Breeda sent, oba sellen väl mea deenstboa sennen, wiels see True un Jeleewde sent un aun de Wooldot deelhauftich. Soont lia un ermon. Flp 1:16

3 Wan jeemaunt aundasch lieet un blift nich bie de heelsome Wieed von ons Har Jesus Christus un bie de Lia, waut no* de Jettlichkjeit es, 2Tim 1:13 4 dee es oppjeblost un weet nuscht, oba haft de Ploag von Froagen un Wuatkjriej, ut woone entsteit Aufgonst, Striet, Lastrunk, beeset Mestruen*, 2Tim 2:14; Tit 3:10-11 5 Zenkjarieen von Menschen, dee eenen vedorwnen Senn haben un de Woarheit aufjelaupst, dee doa meenen, Jettlichkjeit es toom Jewenst. Velot von soone.

6 Oba Jettlichkjeit met Tofrädenheit es een groota Jewenst. Mat 6:25-34; Flp 4:11-12; 1Tim 4:8; Heb 13:5 7 Wiels wie haben nuscht en de Welt nenjebrocht; doawäajen es daut openboa, daut wie woaren uk nuscht rutbrinjen. Hiob 1:21; Ps 49:18; Prä 5:14 8 Wan wie oba Noarunk un Kjleeda haben, lot ons daut jenuach sennen. Spr 30:8 9 Wiels dee doa rikj woaren wellen, faulen en Vesieekjunk un Schlenj un väl tierichte un schätliche Losten, woone de Menschen en daut Vedoawen un Vedaumnis vesinkjen. Spr 28:22; Mat 13:22 10 Wiels de Jeltjia es de Wartel von aulet Beese, wäarent eenje sikj haben dee jelesten loten, sent see vom Gloowen err-jegonen un haben sikj selfst met väl Wee derchjestoaken. Efs 5:5; 1Tim 1:19

11 Oba du, Gottes-Mensch, kleiw ut von soont! Joag oba no de Jerajchtichkjeit, de Jettlichkjeit, dän Gloowen, de Leew, de Jedult, de Saunftmoot. 2Tim 3:17; 2:22 12 Kjamf dän gooden Gloowens-Kaumf; jriep daut eewje Läwen, wuatoo du uk beroopen best un een goodet Bekjantnis ver väle Zeijen bekjant hast. 1Kor 9:25-26; 1Tim 1:18; 4:14; 2Tim 4:7; Heb 3:1

13 Ekj jebeed die ver Gott, dee aules läwendich moakt un ver Christus Jesus, dee ver Pontius Pilatus een goodet Bekjantnis jezeicht haft, Joh 18:36-37; Opb 1:5 14 daut du daut Jeboot helst onen Plaken, onstrofboa, bat de Erschienunk von ons Har Jesus Christus, 15 dee to siene Tiet wiesen woat, wäa de Seelja un auleen Jewaultja, de Kjennich von Kjennichs un Har von Haren es, 5Mo 10:17; Opb 17:14 16 dee auleen Onstoaflichkjeit haft, dee doa wont en een Licht, wua kjeena naunkomen kaun, woonen kjeen Mensch jeseenen haft, noch seenen kaun; däm jehieet Iea un eewje Macht! Amen. 2Mo 33:20; Joh 1:18

17 De Rikje en dise Welt befäl, daut see nich stolt sent, uk nich hopen opp dän onsechren Rikjtum, oba opp dän läwendjen Gott, dee ons rikjlich aules jeft to erjazen; Ps 62:11; Luk 12:15-21 18 daut see Goodet doonen, rikj sent aun goode Woakjen, jieren jäwen, reed toom metdeelen, 19 endäm see sikj selfst eenen gooden Grunt fa de Tookunft oppsaumlen, daut see daut eewje Läwen jriepen. Mat 6:20; Luk 16:9

20 Oo Timotäus, bewoa daut Aunvetrude, un meid de onjeistliche, loose Jeschwauza* un daut Jezank von de faulsch jenande Wissenschoft, 1Tim 4:7; 2Tim 1:12-14 21 woone eenje behaupten un sent vom Gloowen aufjeert. Mucht de Jnod met die sennen! Amen. 1Tim 1:6; 2Tim 2:18