1 Paulus, Jesus Christus sien Apostel derch Gott sien Wellen, no de Veheetunk von daut Läwen, daut en Christus Jesus es, 2 aun mienen jeleewden Sän Timotäus: Jnod, Boarmherzichkjeit un Fräd von Gott, däm Voda, un Christus Jesus, onsem Harn.

3 Ekj dank Gott, däm ekj von miene Väa-Elren häa deen en een reinet Jewessen, daut ekj onen opphieren aun die denkj en miene Jebäda Dach un Nacht, Apj 23:1; 24:16; Flp 3:5 4 voll Velangen, die to seenen, wan ekj aun diene Tronen denkj, daut ekj met Freid erfelt woa; 2Tim 4:9 5 endäm ekj mie aun dän onjeforwnen Gloowen en die erinna, woona ieescht en diene Grootmutta Lois wond un en diene Mutta Eunike; ekj sie oba jewess, daut uk en die. Apj 16:1-3 6 Om woone Sach haulwen ekj die erinna, daut du de Gow von Gott erwakjst, dee en die es derch daut Opplajen von miene Henj. 1Tim 4:14 7 Wiels Gott haft ons nich dän Jeist von de Forcht jejäft, oba von de Krauft un de Leew un de Selfstbeharschunk*. Ree 8:15

8 Doawäajen schäm die nich met daut Zeichnis von ons Har uk nich met mie, sien Jebungna, oba lied Triebsaul met daut Evangelium, no Gott siene Krauft no; Ree 1:16; 1Pe 4:16 9 dee ons jerat haft un ons met eenem heiljen Roop beroopen, nich no onse Woakjen, oba no sien Väanämen un Jnod, dee ons jejäft es en Christus Jesus ver de Tiet von de Welt, Tit 3:5 10 nu oba jeopenboat derch de Erschienunk von ons Heilant Jesus Christus, dee däm Doot de Macht jenomen haft un daut Läwen un Onstoaflichkjeit aun daut Licht jebrocht derch daut Evangelium, 1Kor 15:55,57; Heb 2:14 11 to woont ekj jesat sie, een Prädja un Apostel un Liera fa de Heiden. 1Tim 2:7 12 Om woone Uasoak haulwen ekj uk soont lied; oba ekj schäm mie nich, wiels ekj weet, aun wäm ekj jejleeft hab un sie äwazeicht, daut Hee mie kaun miene Bielaj bewoaren, bat aun janen Dach.

13 Hool aun daut Väabilt von de heelsome Wieed, dee du von mie jehieet hast, en Gloowen un Leew, dee en Christus Jesus es. 1Tim 6:3; Tit 2:1 14 Dise goode Bielaj bewoa derch dän Heiljen Jeist, dee en ons wont. 1Tim 6:20

15 Dit weetst du, daut sikj aule von mie jedreit haben, dee en Asien sent, von woone Fiegelus es un Hermogenes. 2Tim 4:16 16 Mucht de Har Boarmherzichkjeit jäwen to Onesiforus sien Hus; wiels hee haft mie foaken oppjefrescht un haft sikj met miene Kjäden nich jeschämt; 2Tim 4:19 17 oba aus hee en Room wia, socht hee mie rajcht flietich opp un funk mie. 18 Mucht de Har am jäwen, daut hee Boarmherzichkjeit finjt bie däm Harn aun janem Dach! Un wooväl hee mie bie Efesus jedeent haft, weetst du aum basten.