1 Dit saust du oba weeten, daut en de latste Doag woaren jefäadelje Tieden komen. 1Tim 4:1 2 Wiels doa woaren Menschen sennen, dee väl von sikj selfst hoolen, Jeltjieeje, Pucha, Stolte, Lastra, de Elren onjehuarsom, Ondankboare, Heilloose, 3 onen naturale Leew, Onveseenliche, Lastra, Onbeharschte, Wille, haussen daut Goode, 4 Veroda, Ruchloose, oppjeblost, dee Vejnieejen mea leewen aus Gott, 5 dee doa dän Schien von de Gottseelichkjeit haben, oba siene Krauft velieejen see. Von soone drei wajch. Mat 7:15,21; Tit 1:16 6 Wiels ut dise sent, dee sikj han un häa en de Hiesa schlikjen un leiden de Frukjes* jefangen, dee met Sinden beloden sent un met veschiedne Losten jedräwen woaren; 7 see lieren emma un kjennen niemols to de Erkjantnis von de Woarheit komen. 8 Krakjt soo, aus Janes un Jambres Moses wadastunden, jrodsoo wadastonen uk dise de Woarheit; daut sent Menschen von veschmätne Sennen, onjeschekjt toom Gloowen. 2Mo 7:11,22 9 Oba see woaren daut enne Lenjd nich driewen; wiels äare Domheit woat jiedamaun openboa woaren, soo aus uk jane äare wort.

10 Du oba hast miene Lia neiw befolcht, mien Läwens-Wajch, mien Zwakj, mien Gloowen, miene Lankmoot, miene Leew, miene Jedult, 11 miene Vefoljungen, miene Lieden, woone mie toodeel jeworden sent en Antiochia, en Ikonion, en Liestra; woone Vefoljungen ekj doa uthilt; un ut aules haft de Har mie jerat. Ps 34:20; Apj 13:13-14,22 12 Un aule, dee gottseelich läwen wellen en Christus Jesus, woaren Vefoljunk lieden. Mat 16:24; 1Tess 3:3 13 Beese Menschen oba un vefierarische woaren je lenja, je oaja; see vefieren un woaren vefieet. 1Tim 4:1 14 Du oba bliew en däm, waut du jelieet hast un die vesechat es, wiels du weetst, von wäm du jelieet hast. 15 Un wiels du von Kjint opp de Heilje Schreften weetst, kjennen die deeselwje weis-moaken to de Seelichkjeit derch dän Gloowen, dee en Christus Jesus es. Joh 5:39 16 Aule Schreft, von Gott enjejäft, es nitzlich to de Lia, to de Strof, to de Bätrunk, to de Trajchtwiesunk en de Jerajchtichkjeit, 2Pe 1:19-21 17 daut een Mensch von Gott mucht vollkomen sennen, to jieda goodet Woakj jeschekjt. 1Tim 6:11