1 De Eltesta, aun de uterwälde Fru un äare Kjinja, dee ekj en de Woarheit leew; un nich ekj auleen, oba uk aule, dee de Woarheit erkjant haben, 3Joh 1:1 2 om de Woarheit haulwen, dee en ons blift un met ons en Eewichkjeit sennen woat. 3 Jnod, Boarmherzichkjeit un Fräd saul met junt sennen, von Gott, däm Voda un von däm Harn Jesus Christus, däm Voda sien Sän, en Woarheit un en Leew.

4 Ekj freid mie sea, daut ekj von diene Kjinja funk en de Woarheit waundlen, soo aus wie een Jeboot jekjräajen haben vom Voda. 5 Un nu bedd ekj die, Fru, nich, aus wan ekj die een nieet Jeboot schriew, oba daut, waut wie von Aunfank jehaut haben, daut wie ons unjarenaunda leewen. 1Joh 2:7 6 Un dit es de Leew, daut wie no siene Jebooten waundlen; dit es daut Jeboot, soo aus jie von Aunfank jehieet haben, daut jie doarenn waundlen sellen. 7 Wiels doa sent väle Vefiera en de Welt jekomen, dee nich bekjanen, daut Jesus Christus en daut Fleesch jekomen es. Daut es de Vefiera un de Antichrist. 1Joh 2:18; 4:1-3 8 Seet junt väa, daut wie nich velieren, waut wie utjeoabeit haben, oba eenen vollen Loon kjrieen. Gal 4:11 9 Een jiedra, dee äwaträt, un nich en Christus siene Lia blift, haft Gott nich; wäa en Christus siene Lia blift, dee haft beides, dän Voda un dän Sän. 1Joh 2:23 10 Wan irjentwäa no junt kjemt un dise Lia nich brinjt, dän nämt nich en daut Hus opp un heet am uk nich welkom. 11 Wiels wäa am welkom heet, dee nemt Deel aun siene beese Woakjen. 2Tess 3:6

12 Ekj hab junt noch väl to schriewen; oba ekj wull daut nich met Papia un Tint, oba ekj hop, no junt to komen un mintlich met junt to räden, daut onse Freid mucht vollkomen sennen. 3Joh 1:13 13 Doa jreessen die diene uterwälde Sesta äare Kjinja. Amen.