1 Een jiedra, dee doa jleeft, daut Jesus de Christus es, es von Gott jebuaren; un een jiedra, dee dän leeft, dee am jebuaren haft, leeft uk dän, dee von Am jebuaren es. 2 Doaraun erkjan wie, daut wie Gott siene Kjinja leewen, wan wie Gott leewen un siene Jebooten hoolen. 3 Wiels dit es Gott siene Leew, daut wie siene Jebooten hoolen, un siene Jebooten sent nich schwoa. Mat 11:30; Joh 14:15; 15:23-24 4 Wiels aules, waut von Gott jebuaren es, äwawint de Welt; un dit es de Siech, dee de Welt äwawunden haft: Ons Gloowen. Joh 16:33; 1Kor 15:57 5 Wäa es dee, dee de Welt äwawint, wan nich dee, dee doa jleeft, daut Jesus Gott sien Sän es? 1Joh 4:4

6 Dit es dee, dee derch Wota un Bloot jekomen es, Jesus Christus; nich derch Wota auleen, oba derch Wota un Bloot. Un de Jeist es et, dee doa Zeichnis jeft, wiels de Jeist es de Woarheit. Mrk 1:9; Joh 1:33; 19:34-35; 1Joh 4:2 7 Wiels doa sent dree, dee doa Zeichnis auflajen em Himmel: De Voda, daut Wuat un de Heilja Jeist, un dise dree sent eent; 8 un doa sent dree, dee doa Zeichnis auflajen oppe Ieed: De Jeist un daut Wota un daut Bloot, un dee dree sent eenstemmich. 9 Wan wie daut Zeichnis von Menschen aunnämen, es daut Zeichnis von Gott jrata; wiels Gott sien Zeichnis es dit, daut Hee jezeicht haft von sienem Sän. 10 Wäa aun Gott sien Sän jleeft, haft daut Zeichnis en sikj selfst; wäa Gott nich jleeft, haft Am to eenem Läajna jemoakt, wiels hee nich aun daut Zeichnis jleeft, daut Gott jezeicht haft von sienem Sän. Joh 3:32-34; Ree 8:16 11 Un dit es daut Zeichnis, daut Gott ons daut eewje Läwen jejäft haft; un dit Läwen es en sienem Sän. 12 Wäa dän Sän haft, dee haft daut Läwen; wäa Gott sien Sän nich haft, dee haft daut Läwen nich.

13 Dit schreef ekj junt, dee jie aun dän Nomen von Gott sien Sän jleewen, om daut jie weeten, daut jie daut eewje Läwen haben, un daut jie jleewen aun dän Nomen von Gott sien Sän. Joh 20:31 14 Un dit es daut Vetruen, daut wie to Am haben, daut, wan wie waut no sienem Wellen bedden, dan hieet Hee ons. Joh 14:13 15 Un wan wie weeten, daut Hee ons hieet, om waut wie bedden, dan weet wie, daut wie de Bedd haben, dee wie von Am jebät haben.

16 Wan irjentwäa sienen Brooda sindjen sitt, eene Sind nich toom Doot, dee saul bedden, un Hee woat am daut Läwen jäwen, fa dee, dee nich toom Doot sindjen. Daut jeft eene Sind toom Doot; fa dee saj ekj nich, daut hee bedden saul. Mrk 3:28 17 Jieda Ojjerajchtichkjeit es Sind; un daut jeft Sind, dee nich toom Doot es. 18 Wie weeten, daut een jiedra, dee von Gott jebuaren es, sindicht nich, oba wäa von Gott jebuaren es, bewoat sikj, un de Beesa schieet am nich aun. Joh 17:18; 1Joh 3:9 19 Wie weeten, daut wie von Gott sent un de gaunze Welt em Beesen licht. Gal 1:4 20 Wie weeten oba, daut Gott sien Sän jekomen es un haft ons een Vestentnis jejäft, daut wie dän Woarhauftjen erkjanen; un wie sent en däm Woarhauftjen, en sienem Sän Jesus Christus. Disa es de woarhauftja Gott un daut eewje Läwen. Joh 17:3

21 Kjinjakjes, heet junt fa de Aufjetta! Amen.