1 Seet, waut fa eene Leew haft de Voda ons jejäft, daut wie Gott siene Kjinja heeten sellen! Doawäajen kjant de Welt ons nich, wiels see kjand Am nich. Joh 1:12; 16; 13 2 Jeleewde, wie sent nu Gott siene Kjinja, un daut es noch nich openboa jeworden, waut wie sennen woaren; wie weeten oba, daut, wan Hee woat openboa woaren, woa wie Am jlikj sennen, wiels wie woaren Am seenen, soo aus Hee es. Ree 8:17; Flp 3:21; Kol 3:4 3 Un een jiedra, dee dise Hopninj opp Am haft, reinicht sikj selfst, jrod soo aus uk Hee rein es. 4 Een jiedra, dee doa Sind deit, deit uk de Jesazloosichkjeit, un de Sind es de Jesazloosichkjeit. 5 Un jie weeten, daut Hee jeopenboat es, om onse Sind wajch to nämen; un en Am es kjeene Sind. Jes 53:4-6,9; Joh 1:29; 8:46; 1Pe 2:24 6 Wäaemma en Am blift, sindicht nich; wäaemma sindicht, haft Am nich jeseenen un uk nich jekjant. Ree 6:11,14 7 Kjinjakjes, lot kjeenem junt veleiden! Wäa de Jerajchtichkjeit eeft, es jerajcht, jrod soo aus Hee jerajcht es. 1Joh 2:29 8 Wäa de Sind deit, dee es vom Diewel; wiels de Diewel sindicht von Aunfank. Doatoo es Gott sien Sän jeopenboat, daut Hee däm Diewel siene Woakjen venicht. Joh 8:44 9 Een jiedra, dee von Gott jebuaren es, deit de Sind nich, wiels sien Somen blift en am, un hee kaun nich sindjen, wiels hee es von Gott jebuaren. 1Joh 5:18 10 Doaraun sent Gott siene Kjinja un de Kjinja vom Diewel openboa: Wäaemma nich Jerajchtichkjeit eeft, dee es nich von Gott, un uk, wäa sienen Brooda nich leeft.

11 Wiels dit es de Bootschoft, dee jie von Aunfank jehieet haben, daut wie ons unjarenaunda leewen sellen. Joh 13:34 12 Nich soo aus Kain, dee vom Beesen wia un sienen Brooda ombrocht. Un wuarom brocht hee am om? Wiels siene Woakjen bees wieren, oba sien Brooda siene jerajcht. 1Mo 4:8 13 Wundat junt nich, Breeda, wan de Welt junt haust. Mat 5:11; Joh 15:18-19 14 Wie weeten, daut wie vom Doot toom Läwen jekomen sent; wiels wie leewen de Breeda. Wäa dän Brooda nich leeft, blift em Doot. Joh 5:24 15 Een jiedra, dee sienen Brooda haust, es een Merda; un jie weeten, daut kjeen Merda eewjet Läwen bliewent en sikj haft. Mat 5:21-22 16 Doaraun hab wie de Leew erkjant, daut Hee fa ons sien Läwen hanjejäft haft; uk wie sent schuldich, fa de Breeda daut Läwen han to jäwen. Joh 15:13 17 Wäa oba de Jieta von dise Welt haft un sitt sienen Brooda Bederfnis haben un schlitt sien Hoat too fa am, woo blift Gott siene Leew en am? 5Mo 15:7; 1Joh 4:20 18 Miene Kjinjakjes, lot ons nich met Wieed leewen, uk nich met de Tung; oba em Woakj un enne Woarheit. Jak 2:15-16

19 Doaraun erkjan wie, daut wie von de Woarheit sent, un woaren onse Hoaten ver Am äwazeijen, 20 wiels, wan ons Hoat ons beschuldicht, Gott jrata es aus ons Hoat un weet aules. Luk 15:20-22 21 Jeleewde, wan ons Hoat ons nich beschuldicht, dan hab wie Friemoot to Gott. 22 Un wautemma wie bedden, kjrie wie von Am, wiels wie siene Jebooten hoolen un doonen, waut ver Am wooljefellich es. Mrk 11:24 23 Un dit es sien Jeboot, daut wie sullen aun dän Nomen von sien Sän Jesus Christus jleewen un ons unjarenaunda leewen, jrod soo aus Hee ons daut Jeboot jejäft haft. Joh 6:29; 15:17 24 Un wäa siene Jebooten helt, blift en Am un Hee en däm. Un doaraun weet wie, daut Hee en ons blift, aun däm Jeist, dän Hee ons jejäft haft. Ree 8:9; 1Joh 4:13