1 Daut, waut von Aunfank wia, waut wie jehieet haben, waut wie met onse Uagen jeseenen haben, waut wie bekjikjt un onse Henj aunjefot haben, vom Läwens-Wuat; 1Joh 1:1; 4:14 2 (un daut Läwen wort jeopenboat, un wie haben jeseenen un bezeijen un vekjindjen junt daut eewje Läwen, waut biem Voda wia un wort ons jeopenboat;) 3 waut wie jeseenen un jehieet haben, daut vekjindj wie junt, daut jie uk met ons Jemeenschoft haben; un onse Jemeenschoft es met däm Voda un met sienem Sän Jesus Christus. 4 Un dit schriew wie junt, daut june Freid mucht voll sennen. Joh 15:11; 16:24; 1Joh 5:13

5 Un dit es de Bootschoft, dee wie jehieet haben un junt vekjindjen: Daut Gott Licht es, un en Am es kjeene Diestanis. Jak 1:17 6 Wan wie sajen, daut wie Jemeenschoft met Am haben, un waundlen en de Diestanis, dan lieej wie un doonen nich de Woarheit. 1Joh 2:4 7 Wan wie oba em Licht waundlen, soo aus Hee em Licht es, dan hab wie Jemeenschoft metenaunda, un daut Bloot von Jesus Christus, sien Sän, reinicht ons von aule Sind. Heb 9:14; Opb 1:5 8 Wan wie sajen, wie haben kjeene Sind, dan vefia wie ons selfst, un de Woarheit es nich en ons. 9 Wan wie onse Sinden bekjanen, dan es Hee tru un jerajcht, daut Hee ons de Sinden vejeft un reinicht ons von aule Ojjerajchtichkjeit. Spr 28:13 10 Wan wie sajen, wie haben nich jesindicht, dan moak wie Am to eenem Läajna, un sien Wuat es nich en ons. Ree 3:10-18