1 Jeleewde, jleeft nich jiedrem Jeist, oba prieft de Jeista, auf dee von Gott sent; wiels doa sent väle faulsche Profeeten rutjegonen en de Welt. Mat 7:15 2 Doaraun erkjan jie Gott sien Jeist: Jieda Jeist, dee doa bekjant, daut Jesus Christus em Fleesch jekomen es, es von Gott. 3 Un jieda Jeist, dee nich bekjant, daut Jesus Christus em Fleesch jekomen es, es nich von Gott; un daut es de Jeist von däm Antichrist, von däm jie jehieet haben, daut hee kjemt un es nu aul en de Welt.

4 Kjinjakjes, jie sent von Gott un haben dee äwawunden, wiels jrata es Hee, dee en junt es, aus dee, dee en de Welt es. 5 See sent von de Welt; doawäajen räden see von de Welt, un de Welt horcht no äant. Joh 15:19 6 Wie sent von Gott; wäa Gott kjant, horcht no ons; wäa nich von Gott es, horcht ons nich. Doaraun erkjan wie dän Jeist von de Woarheit un dän Jeist vom Errtum. Joh 8:47; 1Kor 14:37

7 Jeleewde, lot ons unjarenaunda leewen, wiels de Leew von Gott es, un wäa doa leeft, es von Gott jebuaren un kjant Gott. 8 Wäa nich leeft, kjant Gott nich, wiels Gott es Leew. 9 Doarenn es Gott siene Leew to ons jeopenboat worden, daut Gott sienen eenjebuarnen Sän en de Welt jeschekjt haft, daut wie derch Am läwen sellen. Joh 3:16 10 Doarenn besteit de Leew: Nich, daut wie Gott jeleeft haben, oba daut Hee ons jeleeft haft un sienen Sän jeschekjt haft aus de Veseenunk fa onse Sinden.

11 Jeleewde, wan Gott ons soo jeleeft haft, sull wie ons uk unjarenaunda leewen. 12 Kjeena haft Gott jeemols jeseenen. Wan wie ons unjarenaunda leewen, dan blift Gott en ons, un siene Leew es en ons vollkomen jeworden. Joh 1:18 13 Doaraun erkjan wie, daut wie en Am bliewen un Hee en ons, daut Hee ons von sienem Jeist jejäft haft. 1Joh 3:24

14 Un wie haben jeseenen un bezeijen, daut de Voda dän Sän jeschekjt haft aus Rada fa de Welt. Joh 3:17 15 Wäa nu bekjant, daut Jesus Gott sien Sän es, en däm blift Gott un hee en Gott. 1Joh 5:5 16 Un wie haben de Leew erkjant un jejleeft, dee Gott to ons haft. Gott es Leew; un wäa en de Leew blift, blift en Gott un Gott en am. 17 Doarenn es de Leew bie ons vollkomen jeworden, daut wie Friemoot haben aum Jerechts-Dach, wiels soo aus Hee es, sent uk wie en dise Welt. 1Joh 2:28 18 Forcht es nich en de Leew, oba de vollkomne Leew drift de Forcht ut, wiels de Forcht haft Kwol; wäa sikj oba fercht, es nich vollkomen jeworden en de Leew. 19 Wie leewen Am, wiels Hee ons ieescht jeleeft haft. 20 Wan irjentwäa sajcht: Ekj leew Gott un haust sienen Brooda, dan es hee een Läajna. Wiels wäa sienen Brooda nich leeft, dän hee sitt, woo kaun hee Gott leewen, dän hee nich sitt? 1Joh 3:17 21 Un dit Jeboot hab wie von Am, daut, wäa Gott leeft, saul uk sienen Brooda leewen. Mrk 12:29-31