1 Miene Kjinjakjes, dit schriew ekj junt, daut jie nich sindjen. Un wan irjentwäa sindicht, dan hab wie eenen Veträda bie däm Voda, Jesus Christus, dän Jerajchten. Ree 8:34; Heb 7:25 2 Un Hee es de Veseenunk fa onse Sinden, oba nich auleen mau fa dee onsaje, oba uk fa dee von de gaunze Welt. Joh 11:51-52; Kol 1:20; 1Joh 4:10 3 Un doaraun moakj wie, daut wie Am kjanen, wan wie siene Jebooten hoolen. 4 Wäa doa sajcht: Ekj kjan Am un helt siene Jebooten nich, dee es een Läajna, un en däm es de Woarheit nich. 5 Wäa oba sien Wuat helt, en däm es woarhauftich Gott siene Leew vollkomen jeworden. Doaraun erkjan wie, daut wie en Am sent. Joh 14:21-23 6 Wäa doa sajcht, daut hee en Am blift, sull uk selfst soo waundlen, aus Hee jewaundelt haft. Joh 13:15; 1Pe 2:21-23

7 Breeda, ekj schriew junt nich een nieet Jeboot, oba daut oole Jeboot, daut jie von Aunfank hauden. Daut oole Jeboot es daut Wuat, daut jie von Aunfank jehieet haben. Joh 13:34; 2Joh 1:5 8 Un wada schriew ekj junt een nieet Jeboot, daut doa woarhauftich es en Am un en junt; wiels de Diestanis vejeit un daut woare Licht schient nu. Joh 8:12; Ree 13:12 9 Wäa doa sajcht, daut hee em Licht es un sienen Brooda haust, dee es bat nu noch en de Diestanis. 1Joh 4:20 10 Wäa sienen Brooda leeft, dee blift em Licht, un kjeen Aunstoos es en am. 11 Oba wäa sienen Brooda haust, dee es en de Diestanis un waundelt en de Diestanis un weet nich, wua hee hanjeit, wiels de Diestanis siene Uagen veblent haft.

12 Ekj schriew junt, Kjinjakjes, wiels junt de Sinden vejäft sent derch sienen Nomen. 13 Ekj schriew junt, Vodasch, wiels jie dän kjanen, dee von Aunfank es. Ekj schriew junt, junge Mana, wiels jie dän Beesen äwawunden haben. Joh 1:1 14 Ekj hab junt, Kjinja, jeschräwen, wiels jie dän Voda kjanen. Ekj hab junt, Vodasch, jeschräwen, wiels jie dän kjanen, dee von Aunfank es. Ekj hab junt, junga Mana, jeschräwen, wiels jie stoakj sent, un Gott sien Wuat en junt blift, un jie haben dän Beesen äwawunden. Efs 6:10

15 Leeft nich de Welt, uk nich, waut en de Welt es. Wan irjentwäa de Welt leeft, en däm es däm Voda siene Leew nich. Jak 4:4 16 Wiels aules, waut en de Welt es, de Fleescheslost un de Uagenlost un daut huachmootje Läwen, es nich vom Voda, oba von de Welt. 17 Un de Welt vejeit met äare Lost. Wäa oba Gott sien Wellen deit, dee blift en Eewichkjeit.

18 Kjinja, daut es de latste Stund, un soo aus jie jehieet haben, daut de Antichrist kjemt, soo sent uk nu väle Antichristen jeworden; doaraun weet wie, daut et de latste Stund es. Mat 24:24; 2Tess 2:3-4; 1Pe 4:7 19 See sent von ons rutjegonen, oba see wieren nich von ons. Wiels wan see von ons jewast wieren, wieren see jo bie ons jebläwen; oba daut sull openboa woaren, daut see nich aula von ons sent. Apj 20:30; 1Kor 11:19 20 Un jie haben de Saulwunk von däm Heiljen un weeten aules. 21 Ekj hab junt nich jeschräwen, aus wan jie de Woarheit nich wisten; oba wiels jie dee weeten un daut kjeene Lieej ut de Woarheit es. 22 Wäa es de Läajna, wan nich dee, dee daut velicht, daut Jesus de Christus es? Daut es de Antichrist, dee dän Voda un dän Sän velicht. 23 Wäaemma dän Sän velicht, dee haft dän Voda uk nich; wäa dän Sän bekjant, dee haft uk dän Voda. Joh 5:23; 1Joh 4:15 24 Waut jie aulsoo von Aunfank jehieet haben, daut saul en junt bliewen. Wan en junt blift, waut jie von Aunfank jehieet haben, dan woa jie uk en däm Sän un en däm Voda bliewen. 25 Un dit es daut Vespräakjen, daut Hee ons vesproaken haft: Daut eewje Läwen.

26 Dit hab ekj junt jeschräwen äwa dee, dee junt vefieren. 27 Un de Saulwunk, dee jie von Am jekjräajen haben, blift en junt, un jie haben daut nich needich, daut junt irjentwäa belieet; oba soo aus junt de Saulwunk von aules lieet un es woarhauftich un es kjeene Lieej, un soo aus dee junt jelieet haft, soo woa jie en Am bliewen. Jer 31:34; Joh 16:13; 2Kor 1:21-22

28 Un nu, Kjinjakjes, blieft en Am, om daut, wan Hee jeopenboat woat, wie Friemoot haben un nich beschämt woaren ver Am bie sien Wadakomen. 1Joh 4:17 29 Wan jie weeten, daut Hee jerajcht es, weet jie uk, daut, wäaemma doa Jerajchtichkjeit eeft, von Am jebuaren es. 1Joh 3:7,10