1 Paulus, Jesus Christus sien Apostel derch Gott sien Wellen, aun de Heilje, dee en Efesus sent un de True en Christus Jesus: 2 Jnod met junt un Fräd von Gott, onsem Voda, un däm Harn Jesus Christus.

3 Jeloft es de Gott un Voda von ons Har Jesus Christus, dee ons jesäajent haft met jieda jeistlicha Säajen en de himlische Städen en Christus; 4 doano aus Hee ons jewält haft en Am ver de Welt-Gruntlajunk, daut wie sullen heilich un onstrof-falich sennen ver Am en Leew; Ree 8:28-30; 1Mo 12:3 5 un haft ons verhäa-bestemt fa de Kjintschoft derch Jesus Christus fa sikj selfst, no daut Wooljefaulen von sien Wellen, 6 fa daut Low von de Harlichkjeit von siene Jnod, en woone Hee ons aunjenäm jemoakt haft* en däm Jeleewden; Mat 3:17 7 en woonem wie de Erleesunk haben derch sien Bloot, de Sinden-Vejäwunk, no däm Rikjtum von siene Jnod, Efs 2:7; 3:8,16; Kol 1:14 8 dee Hee jäajen ons haft äwastreemen loten en aule Weisheit un Ensecht; 9 un haft ons daut Jeheemnis von sien Wellen weeten loten no sien Wooljefaulen, dän Hee sikj väajenomen haud en sikj selfst, 10 fa de Vewaultunk von de Erfellunk von de Tieden, om aules toop to brinjen en Christus, beides, waut em Himmel un opp Ieeden es, en Am, Gal 4:4 11 en woonem wie uk eene Oafschoft erlangt haben, dee wie verhäa-bestemt sent no daut Väanämen von däm, dee aules wirkjt no däm Rot von sien Wellen, Kol 1:12 12 daut wie doa sent fa daut Low von siene Harlichkjeit, wie, dee wie verhäa opp dän Christus hopten; 13 en woonem uk jie hopten, nodäm jie daut Wuat von de Woarheit hieeden, daut Evangelium von june Radunk, en woonem uk jie, nodäm jie jejleeft haben, sent vesäajelt worden met däm Heiljen Jeist von de Vespräakjunk, Efs 4:30 14 woona de Auntolinj von ons Oafgoot es, bat de Erleesunk von daut jekofte Ieejentum, fa daut Low von siene Harlichkjeit. 2Kor 1:22; 5:5

15 Doawäajens uk ekj, nodäm ekj jehieet haud von junem Gloowen aun dän Harn Jesus un von de Leew to aul de Heilje, 16 hia ekj nich opp, fa junt to danken un junt to erwänen en miene Jebäda, Kol 1:4,9 17 om daut de Gott von ons Har Jesus Christus, de Voda von de Harlichkjeit, junt mucht dän Jeist von Weisheit un Openboarunk jäwen, en de Erkjantnis von Am, 2Mo 28:3; Jes 11:2 18 de Uagen von jun Vestentnis oppjedacht, daut jie muchten weeten, woont doa de Hopninj von sien Roop es un woont de Rikjtum von de Harlichkjeit von sien Oafgoot en de Heilje Ps 119:18 19 un woont doa de äwatrafende Grootheit von siene Krauft aun ons es, dee wie jleewen no daut Wirkjen von de Macht von siene Krauft, 20 woone Hee en Christus jewirkjt haft, wäarent Hee Am von de Doodje opperwakjt haft un Am aun siene rajchte Haunt jesat en de himlische Städen, Ps 110:1 21 wiet äwa jieda Ferschtentum un Autorität un Krauft un Harschoft un jieda Nomen, dee jenant woat, nich bloos en dise Welt*, oba uk en de Tookjinftje; Ree 8:38-39; Flp 2:9; Kol 2:10 22 un haft aules unja siene Feet jedonen un jeef Am aus Haupt äwa aules to de Jemeent, Ps 8:6; Mat 28:18; Efs 4:15 23 woone sien Kjarpa es, de Vollheit von däm, dee aules en aules erfelt. Efs 5:30; 1Kor 12:27; Kol 1:19