1 Aulsoo, ekj bedd junt, ekj, de Jefangna en däm Harn, daut jie wirdich waundlen no de Beroopunk, to woone jie beroopen sent, Kol 1:10; 1Tess 2:12 2 met aule Deemoot un Saunftmoot, met Jedult, eena dän aundren vedroagen en de Leew. Kol 3:12-13 3 Siet flietich, de Eenheit vom Jeist to bewoaren en däm Frädens-Baunt. Kol 3:15; Flp 2:2 4 Doa es een Kjarpa un een Jeist, soo aus jie uk beroopen sent en eene Hopninj von june Beroopunk. Ree 12:5 5 Een Har, een Gloowen, eene Doop, 1Kor 8:6 6 een Gott un Voda fa aula, dee äwa aula es un derch aula un en junt aula. 1Kor 12:6

7 Oba to eenem jiedren von ons es de Jnod jejäft no de Mot von Christus siene Gow. Ree 12:3,6; 1Kor 12:11 8 Doawäajen sajcht Hee: "Aus Hee noppjefoaren wia no de Hecht, fieed Hee de Jefangenschoft jefangen un jeef de Menschen Gowen". Ps 68:18; Kol 2:15 9 (Oba daut "Hee es noppjefoaren", waut es daut aundasch, aus daut Hee ieescht raufjefoaren es en de unjaschte Städen von de Ieed? 10 Dee raufjefoaren es, es deeselwja, dee uk noppjefoaren es äwa aule Himmels, om daut Hee aules erfellen mucht.) 11 Un Hee jeef eenje aus Apostel un eenje aus Profeeten un eenje aus Evangelisten un eenje aus Hoads un Lierasch, Apj 21:8; 1Kor 12:28 12 om de Heilje vollkomen to moaken fa daut Woakj vom Deenst, fa daut Oppbuen von Christus sien Kjarpa, 1Kor 14:26; 1Pe 2:5 13 bat wie aula aunkomen to de Eenheit vom Gloowen un to de Erkjantnis von Gott sien Sän, to eenem volljewosnen Maun, to de Mot von Christus siene volle Jestault; 14 soo daut wie nich mea onmindje Kjinja sent, dee romjeschmäten un romjedräwen woaren von jieda Wint von Lia, dee derch dän Menschenkonst kjemt, derch Hinjalest, äant toom Errtum to vefieren; 1Kor 14:20; Heb 13:9; Jak 1:6 15 oba de Woarheit räden en Leew, lot ons en aules waussen en däm nenn, dee daut Haupt es, Christus, Efs 1:22; 5:23; Kol 1:18 16 von woonem de gaunza Kjarpa aunenaunda toopjebut un vebungen es, derch daut Biedroagen von jieda Jelenkj, no de Mot von de Wirkjunk von jieda Jliet, fa daut Waussen vom Kjarpa, fa daut Oppbuen aun sikj selfst en Leew. Kol 2:19

17 Dit saj ekj dan un bezeij en däm Harn, daut jie nich mea waundlen, soo aus de aundre Heiden waundlen, en de Nutzloosichkjeit von äa Senn, Ree 1:21-24 18 dee äa Vestaunt vediestat es, aufjesondat von daut Läwen von Gott, derch de Onweetenheit, dee en äant es, wäajens daut Hoatwoaren von äa Hoat, Efs 2:12 19 woone, wiels see aule Jefeelen veloaren haben, sikj de Onveschämtheit äwajäft haben, om aule Onreinichkjeit met Jiez ut to eewen. 20 Oba jie haben Christus nich soo jelieet, 21 wan jie sest Am jehieet haben un en Am jelieet sent, soo aus de Woarheit en Jesus es: 22 Daut jie, en waut dän verhäajen Waundel betraft, dän oolen Mensch auflajen, dee no de vefierarische Losten vedorwen es, Kol 3:9-10; Ree 8:13; Gal 6:8 23 un siet ernieet em Jeist von jun Senn, Ree 12:2 24 un trakjt dän nieen Mensch aun, dee no Gott jeschaufen es en Jerajchtichkjeit un woarhauftje Heilichkjeit.

25 Doawäajen lajcht de Lieej auf un rät de Woarheit, een jiedra met sienem Näakjsten, wiels wie sent Jlieda unjarenaunda*. Sach 8:16 26 Oajat junt, un sindicht nich. Lot de Sonn nich unjagonen äwa junem Oaja; Ps 4:4; Jak 1:19-20 27 jäft däm Diewel uk nich Rum. 28 Wäa jestolen haft, saul nich mea stälen, oba saul väl mea oabeiden un met siene Henj waut Goodet schaufen, daut hee waut haft, däm to jäwen, dee Bederfnis haft. 2Mo 20:15; 1Tess 4:11 29 Lot kjeen schlajchtet Jeräd ut jun Mul gonen, oba daut, waut goot es fa de needje Oppbuunk, soo daut et de Toohorcha Jnod jäwen mucht. Efs 5:4; Kol 4:6 30 Un betriept nich dän Heiljen Jeist von Gott, met däm jie vesäajelt worden sent fa dän Dach von de Erleesunk. Jes 63:10; Efs 1:13-14 31 Aule Bettanis un Wutt un Oaja un Jeschrech un Lastrunk, lot wajch von junt, met aul de Boosheit toop. Kol 3:8 32 Oba siet unjarenaunda frintlich, metliedent, vejäft eenaunda, jrod soo aus uk Gott junt en Christus vejäft haft. Mat 6:14; 18:22-35; Kol 3:13