Jeistliche Säajnungen en Christus
3 Jeloft es de Gott un Voda von ons Har Jesus Christus, dee ons jesäajent haft met jieda jeistlicha Säajen en de himlische Städen en Christus; 4 doano aus Hee ons jewält haft en Am ver de Welt-Gruntlajunk, daut wie sullen heilich un onstrof-falich sennen ver Am en Leew; 5 un haft ons verhäa-bestemt fa de Kjintschoft derch Jesus Christus fa sikj selfst, no daut Wooljefaulen von sien Wellen, 6 fa daut Low von de Harlichkjeit von siene Jnod, en woone Hee ons aunjenäm jemoakt haft1:6 Ooda: bejnodicht haft. en däm Jeleewden; 7 en woonem wie de Erleesunk haben derch sien Bloot, de Sinden-Vejäwunk, no däm Rikjtum von siene Jnod, 8 dee Hee jäajen ons haft äwastreemen loten en aule Weisheit un Ensecht; 9 un haft ons daut Jeheemnis von sien Wellen weeten loten no sien Wooljefaulen, dän Hee sikj väajenomen haud en sikj selfst, 10 fa de Vewaultunk von de Erfellunk von de Tieden, om aules toop to brinjen en Christus, beides, waut em Himmel un opp Ieeden es, en Am, 11 en woonem wie uk eene Oafschoft erlangt haben, dee wie verhäa-bestemt sent no daut Väanämen von däm, dee aules wirkjt no däm Rot von sien Wellen, 12 daut wie doa sent fa daut Low von siene Harlichkjeit, wie, dee wie verhäa opp dän Christus hopten; 13 en woonem uk jie hopten, nodäm jie daut Wuat von de Woarheit hieeden, daut Evangelium von june Radunk, en woonem uk jie, nodäm jie jejleeft haben, sent vesäajelt worden met däm Heiljen Jeist von de Vespräakjunk, 14 woona de Auntolinj von ons Oafgoot es, bat de Erleesunk von daut jekofte Ieejentum, fa daut Low von siene Harlichkjeit.