6 तुहुरे यहे सक्कु बातमे खुशी हुई परत, तभुन फेन अब्बे कुछ समयक लग तुहुरिन्हे बहुत मेरके दुःख सहे परी। 7 यी समस्यनके उद्देश्य यी देखाइक लग हो कि तुहुरे जात्तिकमे परमेश्वरकेमे भरोसा करथो। येशू ख्रीष्टकेमे तुहुरिन्के विश्वास सोनसे फेन धेउर मोलके बा। जसिके नाश होजिना सोनहे आगीलेके जाँचजाइत और निखारजाइत। ओस्तेहेँके जब तुहुरिन्के विश्वास समस्यामे फेन बल्गर पलिरहत कलेसे, येशू ख्रीष्ट फिर्ता अइना दिनमे यी तुहुरिन्हे बहुत्ते प्रशंसा, महिमा और सम्मान लेके आई। 8 तुहुरे येशूहे नै देख्ले हुइतो, तभुन फेन तुहुरे हुँकिन्हे प्रेम करथो। तुहुरे हुँकिन्हे अब्बे नै देख्थो। पर तुहुरे हुँकारमे विश्वास करथो। तबेकमारे तुहुरे बहुत खुशी बतो। तुहुरे कतरा खुशी बतो कहिके वर्णन करना शब्दै नै हो। 9 काकरेकी परमेश्वर तुहुरिन्के प्राणहे पूरा रुपमे पापके सजायमेसे मुक्ति देहतताँ। यी तुहुरिन्के येशू ख्रीष्टमे कर्लक विश्वासके ईनाम हो।