1 पाँच दिन पाछे यहूदी प्रधान पुजारी हननिया और गोड्गात यहूदी दलके नेतन, तर्तुल्लस नाउँक एकथो वकीलके संग कैसरिया शहरमे अइलाँ और ओइने पावलके विरोधमे हाकिमके आघे मुद्दा पेश करलाँ। 2 जब पावलहे हेरोद रज्वक दरबारमेसे राजपालके आघे नानगिलिस तब् तर्तुल्लस उहिहे असिक कती अभियोग लगाई लागल, "अति माननीय फेलिक्स, अप्निसे राजमे हम्रे शान्ति भेटाइल बती और अप्नि यी जातिक लग सुधार सुरु करल बती।

3 यी बात हर मेरके सक्कु ठाउँमे हम्रे धन्यवादके साथ स्वीकार कर्थी।

4 पर हम्रे चाहति कि अप्निक धेउर समय नै लेके हमार बिन्ती छोटकरीमे दया करके सुनदेबी। 5 काकरेकी हम्रे यी मनैयाहे जेहोँर-तेहोँर दुःख देती नेंग्ना, संसार भरके सारा यहूदिनके बिच्चेम आन्दोलन मचैना और नासरत गाउँक धार्मिक सप्रदायक मुख्य अगुवक रुपमे भेटाइल बती। 6 यी मन्दिर अपवित्र परना फेन कोशिस करल रहे, पर हम्रे यिहिहे पकरलेली। हमार मोशक नियम कानुन अनुसार हम्रे यिहिहे दण्ड फेन देती,

7 पर सेनापति लुसियस हमार थेन आके जबरजस्ती उहिहे हमार हाँथेमेसे छिनके लैगिलाँ, और यकर विरोधमे अभियोग लगुइयनहे अप्निक थेन अइना आज्ञा देलाँ। 8 आब अप्नि अप्निहीँ यकर जाँच कर्बी कलेसे हम्रे यिहिहे लगाइल दोषके यी सक्कु सच्चाई उहिएसे पता लगाई सेक्थी।" 9 उ यहूदी दलके नेतन फेन उ बात सक्कु सही हो कहिके समर्थन करलाँ।

10 हाकिम पावलहे बोल्ना इशारा करल, तब् पावल जवाफ देहल, "बहुत सालसे अप्नि यी यहूदी जातिक मनैनके न्यायधीश रहल बात पता हुइलक ओहोँरसे मै खुशीसे अपन रक्षक लग प्रत्युत्तर देहतुँ। 11 अप्नि पता लगाई सेक्बी कि मै यरुशलेम शहरके मन्दिरमे आराधना करे अइलक बाह्र दिनसे धेउर नै हुइल हो। 12 यने ना ते महिन्हे कौनो मनैयासे बहस करत भेटैलाँ, ना मन्दिरमे या बैठक भवनमे अथवा शहरमे जनतनहे उत्तेजित पारल भेटैलाँ, 13 ना ते महिन्हे अब्बे दोष लगैती रहल बातके यने सबुत देहे सेक्हीँ।

14 पर मै यी अप्निक थेन स्वीकार करतुँ, कि मै हमार पुर्खा परमेश्वरके सेवा करथुँ, जोन ख्रीष्टके डगरहे यहूदी दलके नेतन एकथो झूट दल हो कहिके कथाँ। मै मोशक नियम कानुन और परमेश्वरके अगमवक्तक किताबमे लिखल सक्कु बात विश्वास करके मोरिक पुर्खनके परमेश्वरके आराधना करथुँ। 15 मै परमेश्वरकेमे आशा करथुँ कि धर्मी और अधर्मीन दुन्हुनहे मुअलमेसे परमेश्वर फेनदोस्रे जिउठैथाँ कना बात यने अप्निहीँ स्वीकार करथाँ। 16 तबेकमारे परमेश्वरकेमे और मनैनकेमे मै सदादिन शुद्ध विवेक धरना कोशिस करथुँ।

17 बहुत साल पाछे अपन जातिक गरीबनहे दान देहे और परमेश्वरहे दान चह्राई मै यरुशलेम शहरमे आइल रहुँ। 18 वहे समयमे यने महिन्हे मन्दिरमे शुद्ध हुइना विधि पूरा करत देख्लाँ। वहाँ कौनो भीड़ नै रहे, होहल्ला फेन नै रहे। पर वहाँ एशिया प्रदेशके कौनो-कौनो यहूदी मनै रहिँत। 19 ओइन्हे यहाँ महिन्हे दोष लगाइक लग अप्निक आघे हाजिर हुई परना रहिन। यदि मै कौनो गलत काम करल हुइबुँ कलेसे मोरिकमे आरोप लगाईक लग ओइन्हे यहाँ अप्निक आघे हुई परना रहिन्।

20 या ते यी मनै अप्निहीँ यहाँ कहिँत कि जब मै महासभक आघे ठरह्याइल रहुँ ते मोरिकमे का कसुर भेटैलाँ? 21 सिरिफ यहे एकथो बात किल हो, जोन मै ओइन्के बिच्चेम ठरह्याके चिल्लाके कले रहुँ, ‘परमेश्वर मुअल मनैनहे फेनदोस्रे जिवैहीँ कना बातमे मै विश्वास कर्लक कारण आज अप्निनके आघे मोरिक मुद्दा चलता’।"

22 यी ख्रीष्टके डगरके बारेमे हाकिम फेलिक्सहे ठिक-ठिक ज्ञान हुइलक ओहोँरसे उ यी बात सुनके सेकके ओइन्हे असिक कहिके टारके पठादेहल, "सेनापति लुसियस यहाँ अइहीँ, तब् मै तुहुरिन्के मुद्दक फैसला करदेहम।" 23 तब ऊ पावलके मजासे अख्वारी करहो, और थोरिक छुट देहो, और ओकर कौनो फेन संघरियाहे ओकर सेवा करक लग रोक नै लगैहो कहिके कप्तानहे आज्ञा देहल।

24 थोरिक दिन पाछे हाकिम फेलिक्स ओकर यहूदी जन्नी द्रुसिल्लाहे अपन संग लेके कैसरिया शहरमे आइल। और ऊ पावलहे बलाके ख्रीष्ट येशूमे विश्वास करना बारेमे उहिसे सुनल। 25 जब पावल परमेश्वरके आघे सच्चा काम करना विषयमे बताई लागल। और इच्छक उप्पर नियन्त्रण करना और अइना न्यायक बारेमे बहस करे लागल। तब फेलिक्स डरागिल, और असिक कहल, "अब्बक लग जाऊ, मौका परल बेला मै अप्निहीँ तुहिन्हे बलैम।"

26 पावलके कहल बातसे हाकिम फेलिक्स डरागिल। पर झेलमेसे छुटैलक कारण पावलसे कुछ रुपिया मिली कि कना आशा फेन ऊ करल रहे। तबेकमारे फेन ऊ उहिहे घनिघनी बलाके बातचित करे। 27 पर दुई साल पाछे जब फेलिक्सके बदलामे पर्किअस फेस्तस हाकिम बनल। तब् हाकिम फेलिक्स यहूदी मनैनहे खुशी करक लग पावलहे झेलमे दारके गैल।