1 Ɛmɛnɛ mi, ki gyi te la ki so yi iso meka iyi igbama iyi Ɔkwu nzu Ɔzhizɔsi Okrasi, akwɛyi ɔ kpala nzu ɛlu kaa ki bi du wu, mi so yi te, 2 egbo yi li kpasha naa li fomo efyefya mo kwuwongu iso iyira iyi enzu umbafo naakwupu ungwu bɔkɔ o zɔ te kwu ngyi munyi nzu te kwɔfyi ungwu igbama iyi Ɔkwu nzu Ɔzhizɔsi Okrasi kwu bo-o. 3 La lu nyama onzu uwunawuna le kyoro yi mo mu ɔgwuzɛ uwunawuna mo, mo kwuyengwu bɔkɔ enzu o towo Ukpo mo, akwɛyi onzu uwoyi uwu bɔkɔ kwogba wu akwu ɔyi awu aa wɔ dɛ ishi Ɔkwu nzu Ɔzhizɔsi Okrasi a gbama le. 4 Onzu uwoyi awu e towo Ukpo mo mbala kiya ingyinangyina ingyi bɔkɔ akwu ingyi Ukpo naa kiya ingyinangyina ingyi bɔkɔ o gbo ngyi ɔya. E to ɛnwu e fulo kadu mu ɔtɛpu uwu Ukpo akwɛyi a zɔ te uwu akwu Ukpo. 5 Lunyi la lu lolo te, kwuyengwu bɔkɔ mi yi mbala yi awu mi koko mi so yi iso ɛlɛ lɛɛbi. 6 Lunyi ba lu yitu kiya ingyi bɔkɔ ki shi bɔkɔ onzu uwoyi ele o do wawu kwudu mo. Kwuye kwu nyɔ bɔkɔ Ukpo a wala onzu uwoyi awu kwudu. 7 Mo ekpasu iyi Onzu uwoyi awu i yi mu ɛduma iwomo mekeka iyi enzu oo. Ukpo uwu bɔkɔ a kpa onzu uwoyi kwota awu, a rangwu tayi nzhii ba kwuyengwu bɔkɔ o ra la onzu uwoyi ele ma. 8 Mizhikembo iyi ɛlɛ onzu uwoyi ele a wɔ kwudu, akwɛyi kwuyengwu bɔkɔ Ɔkwu nzu Ɔzhizɔsi a gbama, a na wu ekpasu ma akwɛyi a ngbɛ onzu uwoyi ele ɛdɔ ma mu ɛnyɔ ifumo iyi kenzu wu mbala ekpasu iyi igbama wu. 9 Onzu uwura ele a nyɔ mu ekpasu iyi onzu uwoyi, e wo apula iyi amɛ mbala iyi kenzu iyama iyi imulo gyɔɔ, 10 mbala kwukyoro iwomo ungwɔku la enzu umba bɔkɔ o yi mu ɔgwuzɛ uwu lukwu. O kpo ɛdɔma kwuwongu o towo iso iyi ototo ma iyi bɔkɔ i shi o fya isama iyi Ukpo. 11 Kwuwo kwɔlɛ Ukpo e shi kwukyoro ugwɔku te lakwu to mbo egbo mo, akwɛyi o nyama la kwukyoro kwɔlɛ. 12 Kwuwo kwɔngu, Ukpo e lo onzu uwunawuna inyashi uwu bɔkɔ e shi egbo wu mu iso iyi ototo ɛlɛ mo, ba o mu ɔnyɛ mu ira iwomo.

13 Ɛmɛnɛ mi umba bɔkɔ Ukpo a gyi yi, akwa nzu ɛga te la ki gbɛlɛ Ukpo ɛnyi kwuyengwunangwuna kwuwo yi, kwuwongu Ukpo a ŋa yi mu iyemo iyi kwudu kwɔlɛ kaa la lu fya isama iyi Ukpo mu ɛduma iwomo iyi Kwundu Ɔkɛrikɛri kaa le shi la lu ŋɔ kɛrikɛri mbala egbo ishimo mu iso iyi ongbulolo iyi Ɔzhizɔsi Okrasi. 14 Ukpo a ya yi ma i zɛ mu rɛnu ingyi Ɔzhizɔsi ingyi bɔkɔ ki tanu ngyi le, kaa lunyi la lu kyo la lu ri kulewu ungwu inzumbɛku iyi Ɔkwu nzu Ɔzhizɔsi Okrasi. 15 Kwuwo kwɔlɛ ɛmɛnɛ mi, ɛzu iyi bɔkɔ ki zɔ yi, kwuyengwu bɔkɔ ki yi mbala yi, kala iyi bɔkɔ ki ka yi mu kwupu awu, la lu ra yi gbagiri.

16 Ki lɛ Ɔkwu nzu Ɔzhizɔsi Okrasi mbala Ada Ɔsu Ukpo uwu e kpo lukwu nzu awu, mu esheshi wu iwomo, a ka nzu ɛnwu ma iyɔkpɔɔ mbala eyi ifulomo iyeshi, 17 te la ka yi ɛnwu ma kaa la lu fya ekpasu iyi ɛduma iyi esheshi iwomo mbala iso iyi esheshi isomo.