1 Mu imbwama yi, ɛmɛmbɛnɛ mi, la lu lɛ Ukpo kwuwo nzu kaa anu iyi Ɔkwu iyi ki yi mu itama le li fulama munamuna akwɛyi enzu oo na yi laa umwɔ, kyamate bɔkɔ lu na yi awu. 2 La lu lɛ Ukpo kpɔ te Ukpo la wa nzu ma mu kwuwo ungwu enzu umbira mbala enzu umbeyi, moo akwu enzu lɛɛbi gba akwu wa mbwalu le mo. 3 Ɔkwu ba akwu onzu uwu bɔkɔ o fulo egbo ma wu, ee shi yi ekpasu, a gba aa wa yi ma mɔwu uwu enzu umbeyi. 4 Kwuwongwu ɔlɛ egbo nzu ina yi ma meka iyi Ɔkwu te apula iyi ki za yi te la lu wo awu, lu yi wo. 5 Ki lɛ Ukpo te Ɔkwu Ɔzhizɔsi la wu yi eyi mo kaa la lu yitu te Ukpo e pwu idɛnyi yi, ki gba ki lɛ Ukpo kpɔ te le shi yi idu iyimo kyamate bɔkɔ Okrasi e wo tayi.

6 Ɛmɛnɛ mi, ki so yi mu ɛnyi iyi Ɔkwu Ɔzhizɔsi Okrasi te la lu mbwalu ɔgwuzɛ uwu umɛnɛ uwu e wo kelu akwɛyi e towo ɛzɔ iyi ki zɔ yi awu ma mo. 7 Lunyi mafyi yi lu yitu te i fate la lu mbwalu kwota nzu. Kinzu ki wo kelu kwuyengwu ki yi mbala yi awu mo. 8 Lunyi mafyi yi lu yitu te ki na kiya ingyirimo rɛshi mu ɔwu uwu ɔzɛnzɛnyi mo. Ki bɔkpɔɔ ki ma wɔnu mu ɛduma iwomo utu la ɔnu kwuwongu kaa la ki kwayi ewulo mo. 9 Ki wo ɛlɛ, akwu kwuwongu ki do te ki na imbwama munyi yi mo le mo, kinzu ba ki wo ɛnyi kaa la lu vɔngɔ munyi nzu. 10 kwuyengwu ki yi mbala yi awu ki koko ki so yi te, <<Onzu uwunawuna uwu bɔkɔ e wo ɛduma mo ba le ri mo.>> 11 Ki so yi ɛlɛ kwuwongu ki pwa te umbafo mekeka yi o yi elu. Umba ba o wo ɛduma mo, o ma mu kenzu ilomo mu iso iyi enzu iyi bɔkɔ i kpa mba ɛnwu ma mo. 12 Enzu mbamba tayi, ki so mbo mu ɛnyi iyi Ɔkwu Ɔzhizɔsi Okrasi te lo ki undu ma mɛzhi kaa lo wo ɛduma kaa lo fya kiya ingyi bɔkɔ o ri. 13 Ɛmɛmbɛnɛ mi , lunyi ba ɛnwu li kwu yi mo mu ɛduma iyeshi iwomo mo.

14 Onzu uwu bɔkɔ e towo iso iyi bɔkɔ ki ka mu kwupwu kwɔlɛ le imbwalu ma, de la lu bɔ wu eyi. Lunyi la lu gɔ mbala wu mo kaa lovya la lu wo wu mo. 15 Lunyi la lu to wu kyamate akwu ogewa yi mo, lunyi ba la lu yi wu mu alu kyamate umɛnɛ tayi.

16 Mi lɛ Ukpo te Ɔkwu mafyi wu uwu akwu undu uwu idu igbomo awu, le shi yi idu igbomo mu kwuyengwunaguna mbala mu ɔgwuzɛ uwunawuna. Ukpo le yi mbala yi lɛɛbi. 17 Imi Ɔpɔlu gba mi ka kwupwu kwɔlɛ le mafyi mi, te gba mi ka epu mi le lɛɛbi.

18 Esheshi iyi Ɔkwu nzu Ɔzhizɔsi Okrasi li yi mbala yi lɛɛbi.